IWUKA 21 - Bibilia Kui Mdedie fo Kimochi

Iwawaso lya masinga

¹ “Kyasia, mawawaso ochiwika oshangunyi lo wandu nyi iha.

² Kohuṟa isinga lya Kiebri, nechikuṟundia maka iṟandaṟu; maka fo mfungade nechiwuka kopfo wulya.

³ Kokoya naleida na kopfo o amonyi tupu nechiwukapfo ado o amonyi; kokoya nawealikie, mka oke nechikure nahende handu hamu nao.

⁴ Kokoya nyi mndumii oke amnengie mkacho, nao kamfea wana, wa womi ang'u wa waka; mkacho na wanawo wechiwa masaa ha mndumii cho oke nao miicho nechiwukapfo o amonyi.

⁵ Kyaindi isingalyo lyikahamba na pata, “Inyi njikundi mndumii oko, na mka oko na wana wako; inyi njikundi iwuka wusingenyipfo;

⁶ O nlyondi mndumii cho oke echimwende oshangunyi lo Ruwa na imwende na alya mongo, ang'u alya kisingitinyi kya mongo; na mndumii oke nechitocha kudu koke na menya nlyondi echimṟundia mkonu yose.

⁷ “Mndu kakumba mana oke o kika nawe kisinga, o echilekio iwuka wusingenyi cha masinga ha kisoṟopfo.

⁸ Kokoya mndumii cho amkosie alachihiyo nao, nechimkumba ko ndee; awode momu fomkumba ko wandu wahenupfo, kipfa alembutia wusumuhanyipfo.

⁹ Kokoya namkosia mana oke, nechimbutia chandu kiwaṟi mbuka tsa wana wake wa kika.

¹⁰ Kokoya aduo mka ungi, echiima mka ulya okuwooka, nechimnenga kelya, nguo tsake na shose shilya shimbaṟi nao.

¹¹ Kokoya alambutia shindoshi, nechimlekia nakuhendie wulya, alamkose.”

Muanduye fo mbaahi

¹² “Mnducho oose echikapa mndu, tane apfa mnducho kiwaṟi nawoho.

¹³ Kyaindi kokoya nambaha alakusirie, nyi inyi Ruwa ngambika mawokonyi hake, kyasia njechikuloṟa handu echihadichia nakae ho ko ofoṟo.

¹⁴ Kyaindi, mndu kawaha odoye akusirie nechiwoho ma kokoya adichiya rasionyi lyako.

¹⁵ Mokapa ndee ang'u mae, kiwaṟi nawoho.

¹⁶ Ichu moiwa mndu, na imkumba, ang'u amhaluo isinga lyake, icho kiwaṟi nawoho,

¹⁷ Mosesa ndee ang'u mae, kiwaṟi nawoho.

¹⁸ Wandu wakaloyana, na umu kakapa odoe na iho, ang'u na nzina, alapfe, kyaindi kalaṟo kitaṟenyi kyake;

¹⁹ ili echikurese na ihenda nja na ndichi, oo ulya alemkapa nlyondi echilekio; indi nechimtaa kipfa kya maanya fulya foke fuledeka, namwinduṟa tane achia na kamu.

²⁰ Mndu kakapa isinga lyake, ang'u kisinga kyake kya kika na ndichi nao kapfia mawokonyi hake mndu cho netao kiṟache.

²¹ Kyaindi isinga lilya lilampfe komesia mkonu fumu ang'u iwi, mnducho echiwoho pfo kyamba isinga lilya nyi masaa hake.

²² “Wandu wasoṟo wakakapana, wakawika mndu mka mlemo shifaṟe tane adetsa kimana kyake, indi nalawawio ngoseṟa, icho amnanga kifaṟekyo, kimbaṟi natae njooko chandu mii o mkacho echihamba na iidikio nyi weanduo mondu.

²³ Kyaindi kokoya kuwode shifaṟe shifoi, nlyondi echitaa moo kwi moo,

²⁴ riso kui riso, iheho kui iheho, owoko kui owoko, kudende kui kudende,

²⁵ irumatsa kui irumatsa, kifaṟe kui kifaṟe ipirichuka kipfa kya ipirichuka.

²⁶ “Mndu kakapa isinga lyake risonyi, ang'u riso lya kisinga kyake kya kika, kalinyamaṟa; nechimlekia nakuachie kipfa kya riso lyake.

²⁷ Ang'u kakapa isinga iheho lyikakuṟuka, ang'u heho lya kisinga kyake kya kika, nechimlekia nakuachie kipfa kya iheho lyake.”

Wuwawaso wo wenyi masaa

²⁸ “Kokoya mmbe yakapa mndu na membe kapfa, mmbeyo yechiwaaho kui ikumbio maho na nyama yake ilalyio; kyaindi menyi mmbeyo echianduyo mondu pfo.

²⁹ Kyaindi kokoya mmbeyo iweichiwie ikapa wandu wokia kacha, nao menyi mmbe kawawaso kya mbonyitso, manya nalaipfunge, nayo ikawaha mndu; mmbeyo yechiwooho na menyi oyo da.

³⁰ Kyaindi, kokoya aidikio itaa njooko ya moo foke, nechitaa ikyo kyose echiteṟio.

³¹ Kokoya mmbeyo yawaaha mana o kiumi ang'u o kika, muanduye na ifoifo.

³² Kokoya mmbeyo yawaaha isinga lya kiumi ang'u lya kika; menyi mmbe nechitaa njooko ya fesa 30, na mmbe yo yechiwoho ko ikapo na maho.

³³ “Mndu kapfunuo ṟungu ang'u kasuma ṟungu, nao nalalyishikie, numa mmbe ang'u nzoi ikaolokapfo ikapfa,

³⁴ menyi o iṟungu lyo nechitaa menyi kiumakyo fesa na kiumakyo kipfu kechiwa kyake.

³⁵ Mmbe ya mndu ikawaaha mmbe ya mndu ungi; wanduwo wawawi wechikumba mmbeyo iina moo, na ihawana fesa na ihawanase nyama tsa mbe iya yawoho.

³⁶ Ang'u kikamanyika ke mmbeyo wokia mawokioonyi iwekekapa na membe, na menyi oyo nalaipfunge; nechitaa mmbe kui mmbe, na mmbeyo ilepfa yechiwa yake.”