IWUKA 20 - Bibilia Kui Mdedie fo Kimochi

Mawawaso ikumi ha Ruwa

¹ Ruwa kadeda madedoha hose kahamba,

² “Inyi nyi Mndumii-Ruwa, Ruwa opfo njilekuwuta orukenyi lo Misri, mmbenyi ya wusinga.

³ Kulawade Ruwa ungi shile na inyi.

⁴ “Ulakusungusie ofano lo pacha, manya ofano lo kindo kyose kii huye ruwehu, manya kindo kii wanda orukenyi, manya kii mṟingenyi wanda ya oruka,

⁵ kulashiindie manya ishiṟundia; kyamba inyi Mndumii-Ruwa, Ruwa opfo nyi Ruwa njiwode wunyenyi, njekewuwuya njonyamaṟo tsa wandee wa wandu ipfo ko wana wawo, mṟasa kishari kya kaṟaṟu na kya kaana kya iwo wanjisuo,

⁶ na inyi njekesaṟia shiku ka shiku iwo wanjikundi, na iwada mawawasoho hako.

⁷ “Kulasende rina lya Mndumii-Ruwa, Ruwa opfo kya maai, cha kipfa Mndumii-Ruwa alechida alakapa ichu masenda rina lyake kya maai.

⁸ Manya mkonu fo Ruwa nofutane mwele.

⁹ Mkonu iṟandaṟu ṟunda shiṟundio, noachikie shindo shapfo shose;

¹⁰ kyaindi mkonu fo mfungade nyi sabato ya Mndumii-Ruwa, Ruwa opfo, mkonufo kulaṟunde iṟunda lyose, iyo, manya mana opfo, manya mana opfo okika, manya isinga lyapfo, manya mṟundi mka, manya shuma shapfo, manya mhenu akeri ipfo mṟinyi fopfo.

¹¹ Kyamba mkonu iṟandaṟu Mndumii-Ruwa nalewika ruwehu na oruka, na ipalyipalyi, na shose shiipfo, kasia moo mkonu fo mfungade; ko ikyo Mndumii-Ruwa kawikia mkonu, fo sabato mboṟa kafuheṟemtsa:

¹² “India ndeo na mayo; mkonu yapfo iengeṟeke kiidi kya oruka ochiinengo nyi Mndumii-Ruwa, Ruwa opfo.

¹³ Kulawaahe.

¹⁴ Kulaṟuhuye.

¹⁵ Kulaiwe.

¹⁶ Kulahambeho sha wongo kundu nowonyie odoo owingo,

¹⁷ kulalange mba ya odoo, ulalange mka o odo, manya isinga lyake manya kisinga kyake kika, manya mmbe tsake, manya nzoi tsake, manya orio kindo ki kyake kyose.”

Wandu waowuo

¹⁸ Wandu wose wakawona mbawa, na ikuṟuṟuma na ṟu lya iranda, na fumvu lilya lyikaduka mtsu; na wandu wekiwona isho wakadedema, wakahoṟoka haleshe.

¹⁹ Wakawia Mose, “Deda naso iyo, naso lochiicho, indi Ruwa naladede naso, lulache ipfiia iya.”

²⁰ Mose kawia wandu, “Mulaowuo, kyamba Ruwa nacha kundu namuheshe, kundu mlawute wunyamaṟi.”

²¹ Kyasia, wanduwo wakahoṟoka haleshe, nao Mose katikiria meema fulya fung'anyi kundu Ruwa awei.

Wuwawaso wo rasio

²² Mndumii-Ruwa kawia Mose, “Wia wana wa Waisraeli kudi, nyo muwenyi mowona ke ngadeda nanyo kuwuka ruwehu.

²³ Mulasungusie maruwa hengi hamu na inyi; maruwa ha fesa, manya maruwa ha sahabu, mulakusungusie.

²⁴ Mochinjisungusia rasio lya teri, na iyo nochilekia shidaso shapfo huyake; shidaso shemaya modonyi, na shidaso sha ofoṟo, machondi hapfo, na mmbe tsapfo, orio handu njechiwikaho ngumbuo ya rina lyako, oo nyi hondo njechikuchea na ikuwikia mboṟa.

²⁵ Na iyo konjiwikia rasio lya maho, ochinjiwikia lya maho mapachepfo; cha kipfa kokoya iyo osungusia na kindo kipache kyapfo nyi oiteṟefutsa.

²⁶ Kingise, ochido ihenda rasionyi lyako huye kui ngasipfo, kitaṟe kyapfo kilache iwono huyake.”