IWUKA 2 - Bibilia Kui Mdedie fo Kimochi

Ifeo lya Mose

¹ Mndu umu o kanyi ko Lewi kakure kaalika mana o Lewi.

² Mka ulya kakapika kafee mana, nao kekiwona nyi kimana kicha kakiṟika ko meri iṟaṟu.

³ Kiheri alewona aidima ikiṟikasepfo, kamsungusia kisanduku kya natsi kakishia kimia, kawikapfo kimana kilya, kakiwika maṟenyi ha mbai ya meda fo Nili.

⁴ Mshiki o kimana kilya kahoṟoka haleshe nawone kindo kechimmbutikia.

⁵ Nahong'u mana o kika o Farao kasoka, nasambe kulya madenyi, arianyi na shisinga shake wakachumia mbai ya meda; nao kawona kisanduku kilya maṟenyi, kaduma kisinga kyake nahende ikiende.

⁶ Kakipfunguo, kawonapfo kimana, ambuya, mana ulya naifihiṟa. Nahong'u kamsaṟia, kahamba, “Ichu nyi umu o wana wa Kiebri.”

⁷ Kyasia, mshiki o mana ulya kawia mana o Farao, “Ngesa! Njihende ilaha momlela kiidi kya waka wa Kiebri, nache na kopfo nakuonzie kimanaki?”

⁸ Mana o kika o Farao kambia, “Ee! Henda.” Mana ulya okika kahenda kalaha mae o kimana kilya.

⁹ Mana o Farao kambia, “Duo manachu, njikanyia imwonza, na inyi njechikuinenga wueri wopfo.” Mndu mka ulya kaduo kimana kilya, kakionza.

¹⁰ Mana ulya kang'ana, mae kamwende na ko mana o kika o Farao, kawa mana oke. Kamdumbuya rina lyake nyi Mose, kahamba, “Nyi ili alewuto mṟingenyi.”

Mose adichiya orukenyi lo Wamedi

¹¹ Nalyo mafiri halya, Mose kekiwa mndu ashitsie, kakure nahende ko wana wa mae, Waebri, kawona maṟio hawo. Kawona Mmisri kechikapa Mwebri, umu o wana wa mae.

¹² Kyasia, kaambuya ipfo na ipfo, nao kekiwona ke kwuipfopfo, kakapa Mmisri ulya kambaha kamṟika.

¹³ Kakure ili lya ngama, ambuya, wandu wawi wa Kiebri waikapana. Kawia ulya aiwonyia odoye, “Nki ili uikapa odoo?”

¹⁴ Ulya kahamba, “Nyiu akuwikie nowe mnene odu, na mletsi odu? Ngesa! Nokundi injiwaha inyi chandu kulewaaha Mmisri ulya?” Mose kaowuo, kahamba, “Ate! Mbonyitsi tsilemanyika wai?”

¹⁵ Nahong'u Farao kekimanya mbonyitsi, kakusaṟa iwaaha Mose; kyaindi Mose kadicha ashangunyi lo Farao, kakaa orukenyi lo Wamedi, kadamia kufui na ṟungu lya mṟinga.

¹⁶ Kyasia, mkohanyi o Wamedi nawewode wana wa waka mfungade, nawo wakacha idahia mṟinga, wakaichuṟa nungu tsa mṟinga, waidime irutsa ipo lya shuma shawo mṟinga.

¹⁷ Walisi wakacha wakawafuna; kyaindi Mose kahoṟoka katarama wanawo, karutsa ipo lilya mṟinga.

¹⁸ Wekishika ko ndeawo Reueli, kahamba, “Nkyawa kida ili mowuya mudi owinyi inu?”

¹⁹ Wakahamba, “Nyi Mmisri umu aluashuo mawokonyi ha walisi-wo, ngoseṟa yaisho, kaludahia mṟinga, karutsa shuma shadu.”

²⁰ Ndeawo kawia wana wake, “Nku ai wulalu? Nki ili moda mndu cho? Mlahenyi nache ilya kelya.”

²¹ Mose kaidikia kakaa ko mnducho, nao kainenga Mose mana oke o waka, Sipora nawe mka oke.

²² Icho kambonyia mana o womi kamdumbuya rina lyake nyi Gershomu , kipfa nalehamba, “Njilewa mhenu; orukenyi luhenu.”

Kieṟeṟo kya Waisraeli wusingenyi

²³ Numa ya mafiri halya hafoi mangi ya Misri kapfa; wana wa Waisraeli wakasumukia kipfa kya wusinga wulya; wakafuha, kieṟeṟo kyawo kikashika huye ko Ruwa kipfa kya wusinga wulya.

²⁴ Ruwa kaicho isumukia lyawo, Ruwa kakumbuo mkundano foke alefuwika na Abrahamu na Isaki na Yakobo.

²⁵ Ruwa kawona wukiwa wo Waisraeli, kawasaṟia.