IWUKA 17 - Bibilia Kui Mdedie fo Kimochi

Mṟinga fowuka kiidi kya iho lya iṟaṟa

¹ Mamiingi fose fo wana wa Waisraeli fukawoka kyaṟo wokia nuka. Nuka ya msanga ya Sini, kui kyaṟo kyawo, chandu Mndumii-Ruwa awewawawasie, wakashika Refidimu; napfo kuwewode mṟinga wandu wanyopfo.

² Ko ikyo wanduwo wakanunuwia Mose, wakahamba, “Luinenge mṟinga lunyo.” Mose kahamba, “Nki ili muideda na inyi? Nki ili muihesha Mndumii-Ruwa?”

³ Wandu wakaangaa; nawo wakanunuwia Mose, wakahamba, “Nki ili kuleludosa kuwuka Misri, iluwaha so na wana wadu na shuma shadu?”

⁴ Mose kafihiṟia Mndumii-Ruwa, kechihamba, “Njiwutie kiki wanduwa? Kutsuhee kitutu na wo wanjikapena maho.”

⁵ Mndumii-Ruwa kawia Mose, “Henda kusonguo kowo, noire wameku maata wa wana wa Waisraeli handu hamu na iyo; na ndichi iya yapfo kulekapa nayo meda, noiduo owokonyi lopfo, nohende.

⁶ Ambuya, njechihoṟoka oshangunyi lopfo ipfo, huya iṟaṟa lilya kulya Horebu, na iyo nochikapa iṟaṟa lyo, na mṟinga fochichapfo, wandu waidime inyo.” Mose katana ado oshangunyi lo wameku wa wana wa Waisraeli.

⁷ Kadumbuya rina handu halya rina nyi Masa, na Meriba; kipfa kya madedo ha wana wa Waisraeli, na kipfa kya ili walehesha Mndumii-Ruwa wechihamba, “Ngesa! Mndumii-Ruwa, nai kiidi kyadu ang'u ote?”

Shida na Waamaleki

⁸ Kiherikyo Waamaleki wakawachea, wakakapana na Waisraeli kulya Refidimu.

⁹ Mose kawia Yoshua, “Lusambuṟie wandu, nokure nokapane na Waamaleki, ngama njechihoṟoka huya kitoṟomoso kilya kya fumvu, njiwode owokonyi loko ndichi iya ya Ruwa.”

¹⁰ Nahong'u Yoshua kawuta chandu Mose alemmbia, kakapana na Amaleki; na Mose na Aroni na Huri wakado huyafumvu lilya.

¹¹ Kikashikia, kiheri Mose ameiria owoko loke, Waisraeli wakawinga; na kiheri alesotsa owoko loke, Waamaleki wakawinga.

¹² Kyaindi mawoko ha Mose hawei malemeri; kyasia wakaira iho, wakalileṟia shiake kalidamilia. Aroni na Huri wakaṟihika mawoko hake, umu oralu na ungi oralu; mawoko hake hakawanga tane mnengeṟi foolokia.

¹³ Yoshua karumatsa Amaleki na wandu wake kui wuohi wo oshu.

¹⁴ Mndumii-Ruwa kawia Mose, “Ṟehia mbonyitsi kitapunyi iwe ngumbuo, ionguo madunyi ha Yoshua; ke njechiangatsa ngumbuo ya Waamaleki nakamu, ilakaese wuyanenyi.”

¹⁵ Mose kawikaho rasio, kalilaha rina lyake nyi Mndumii-Ruwa nyi bendeṟa yako.

¹⁶ Kahamba, “Mndumii-Ruwa nalya nyamu; Mndumii-Ruwa nechiamtsa shida na Waamaleki kishari numa ya kishari.”