IWUKA 15 - Bibilia Kui Mdedie fo Kimochi

Kiimbo kya Mose

¹ Nahong'u Mose na wana wa Waisraeli wakaimbia Mndumii-Ruwa kiimboki wakadeda, wehamba, “Njechiimbia Mndumii-Ruwa, kyamba nawode kiṟumi king'anyi, Frasi na modoya frasi nalewakumba ipalyipalyinyi.

² Mndumii-Ruwa nyi pfinya tsako, na kiimbo kyako; Nao nawei okiṟo loko, O nyi Ruwa oko, na inyi njechimṟumisha; Nyi Ruwa o wande oko, na inyi njechimwichimbiṟa.

³ Mndumii-Ruwa, nyi mndu o shida, Mndumii-Ruwa, nlyo rina lyake.

⁴ Makari ha Farao na ichekeṟo lyake nalewakumba ipalyipalyinyi, wachili wake wasambuṟe walesoṟowia ipalyipalyinyi lya Shamu.

⁵ Mfu fukawashikia, Walesoṟowiapfo cha iho.

⁶ Mndumii-Ruwa, owoko lopfo lo kulyo luleinengo kiṟumi na wuidimi, Mndumii-Ruwa, owoko lopfo lo kulyo luipoṟipotsa wakituwa.

⁷ Kui mfoeṟa fo wunene wopfo nokeombotsa wandu iwo wekekutengetia; Nokedika nyashi yapfo, nayo ikakombetsa cha masaho maumu.

⁸ Kui otanu lo shiwale shambuo tsapfo mṟinga fulehoṟotso, Mṟinga fukahoṟoka cha sohu, Kundu kuṟungukie kukawadana oṟoonyi lo ipalyipalyi.

⁹ Mkituwa kahamba, “Njechiwaosha, njechiwawada, njechihawa shilya ngaende shidenyi, Mrima foko fochiihutso nyiwo; Njechisomuo oshu loko, owoko loko lochiwakombetsa.

¹⁰ Kuledihina kui otanu lopfo, ipalyipalyi lyikawapfinyikia. Wakasoṟowia cha mboro kiidi kya mṟinga fufoi.

¹¹ “Ee wo Mndumii-Ruwa, kiidi kya maruwa nyiu ai cha iyo? Nyiu ai cha iyo, mwele kiidi waele. Msa aoweshie kiidi kya kiṟumi kyapfo, mowuta maṟiho?

¹² Kulehoṟuo owoko lopfo lo kulyo, Oruka lukawameṟa,

¹³ lyo kui isaṟia lyapfo kuleteteṟa wandu kulewakiṟa. Kui wuidimi wopfo kulewaloṟa mṟasa handu hapfo haele.

¹⁴ Mkambo ya wandu waleicho, waidedema, Wekekaa Ufilisti okooṟa lulewawada.

¹⁵ Nalyo wasu wa Edomu wakaṟihio, Wandu wa Moabu wawode pfinya idedema lyikawawada, Wandu wose wekekaa Kanaani wakasalaa.

¹⁶ Wuowu na fowa shilewaolokia; kui wuidimi wo owoko lopfo watsie sau cha iho; itane wandu wapfo wechiambada, Hoi Mndumii-Ruwa, Itane wandu wapfo wechiambada iwo kulewahuṟa.

¹⁷ Nochiwaitsa napfo, na iwadonga fumvuhu lya kyoṟa kyapfo; Hando halya kulekusungusia, Hoi Mndumii-Ruwa, kundu nokukaieho, Alya haele kulehaikara, Mndumii-Ruwa, kui mawoko hapfo,

¹⁸ Mndumii-Ruwa, nechiikolonyia mlungana na mlungana.”

¹⁹ Kyamba frasi tsa Farao na makari hake na wedoya frasi wake waleida na ipalyipalyinyi, Mndumii-Ruwa, kawihiṟa mṟinga fo ipalyipalyi huyawo; kya indi wana wa Waisraeli walechumia handu hahadutsu kulya ipalyipalyinyi.

Kiimbo kya Miriamu

²⁰ Na Miriamu mwikimbi o kika, mshiki o Aroni, kaira ipalu owokonyi loke; waka wose wakakure wakaosha numa yake, wawode mapalu wechishina.

²¹ Miriamu kaimba nawo wakamiidikia, “Imbienyi Mndumii-Ruwa, kyamba nalewinza kui kiṟumi, Frasi na wedoya frasi nalewakumba ipalyipalyinyi.”

Mṟinga mbawo fo Mara

²² Mose kaduo Waisraeli wahende mbele kuwuka ipalyipalyinyi lya Shamu nawo wakachea nuka ya msanga ya Shuri; wakachumia kyaṟo kya mkonu iṟaṟu walawone mṟinga.

²³ Wekishika handu kokelaho nyi Mara walaidime inyo mṟinga fo Mara, cha kipfa fuweiwawa; kui kipfa kya ikyo rina lya handu halya kukalaho nyi Mara.

²⁴ Nalyo wandu wakanunuwia Mose, wehamba, “Lunyo ki ki?”

²⁵ Nao kaeṟeṟia Mndumii-Ruwa ; Mndumii-Ruwa, kamloṟa ikidi, kaliwika kulya mṟingenyi, mṟinga fukaloda. Kyasia, kawawikiapfo iwawaso na mdumbuye, kawaheshiapfo;

²⁶ Kawawia, “Kokoya mochiadanyia ṟu lya Mndumii-Ruwa, onu kui pfinya tsose na iwuta shisumhanyi oshangunyi loke, nodehe madu hapfo uicho mawawaso hake, na iwada mawawaso hake, Inyi njechiende ndaṟe tsilya njileendie Wamisripfo; huyapfo pfo kyamba Inyi njii Mndumii-Ruwa njekekukiṟa.”

²⁷ Wakaafukia Elimu, kuwode soka tsa mṟinga ikumi na tsiwi na makangachi makumi mfungade; wakahoṟotsa mahema hawo kufui na mṟinga.