IWUKA 14 - Bibilia Kui Mdedie fo Kimochi

Waisraeli waambada ipalyipalyi lya Shamu

¹ Mndumii-Ruwa kadeda na Mose, kambia,

² “Wia wana wa Waisraeli, ke wawuye wasie moo kufui na Pi-hahirothi, makidi hawi ha Migdoli na ipalyipalyi, iambuyana na Baali-Sefoni; mochikuala oshangunyi loke kufui na ipalyipalyi.

³ Nao Farao nechideda kya mbonyi tsa wana wa Waisraeli, Waleṟumbaṟumba kulya-nuka ya msanga iya ilewaima walawukepfo.

⁴ Na inyi njechiumiṟa mrima fo Farao, nao namuoshe numa, inyi njii Mndumii-Ruwa.” Kyasia wakawuta wado.

⁵ Mangi ya Misri kawio ke wandu walya wamedicha; na mrima fo Farao, na mrima ya waṟundi wake ikahalutso ilawe cha ya wanduwo, nawo wakahamba, “Nki ki ikyo lowuta, lukalekia wana wa Waisraeli wahende walaluṟundiese?”

⁶ Kaṟeheṟa ikari lyake, kaduo wandu wake hamu nao;

⁷ Kairase makari masambuṟe mahana haṟandaṟu (600), makari hose ha Misri, na wachili huye ya makari ho hose.

⁸ Mndumii-Ruwa kahaluo mrima fo Farao mangi ya Misri fukauma, nao kaosha wana wa Waisraeli; kipfa wana wa Waisraeli walewukapfo kui wutimbiri.

⁹ Wamisri wakawaosha numa yawo, frasi tsose na makari hose ha Farao, na waskari wake wechumia na frasi, na itorito lyake, nawo wakawakoya wasiiye moo kufui na ipalyipalyi, kufui na Pi-hahirothi kuambuyanyi na Baal-sefoni.

¹⁰ Na Farao kekiafukia, wana wa Waisraeli wakairia meso hawo, ambuya, Wamisri wakeri icha numa yawo; wakaowuo mnu. Wana wa Waisraeli wakafihiṟia Mndumii-Ruwa.

¹¹ Wakawia Mose, “Ngesa! Kipfa kya ili kulaweipfo shipfu kulya Misri noluwutapfo kundu lupfiiye kunu nuka ya msanga? Nki ilyi kuleluwutia kudi, iluwuta orukenyi lo Misri?

¹² Idedolyi chilyo lulekuwia kulya Misri, lukahamba, kudeye lusingie Wamisri? Kyamba nyi nanga iṟundia Wamisri kota lochipfia kunu nuka ya msanga.”

¹³ Mose kawia wandu, “Mulaowuo, hoṟokenyi tupu muwone okiṟo lo Mndumii-Ruwa echimuwutia inu; cha kipfa Wamisri wa muwawonyi inu mochiwawonase mlunganapfo.

¹⁴ Mndumii-Ruwa nechimkapanyia nyo, nanyo mochitsia sau.”

¹⁵ Mndumii-Ruwa kawia Mose, “Nki ilyi uinjieṟeṟia inyi? Wia wana wa Waisraeli wahende mbele.

¹⁶ Na iyo iria ndichi yapfo, nahoṟoye owoko lopfo huya ipalyipalyi, na ilyidumbutsana; na wana wa Waisraeli wechiida makidi hawi ha ipalyipalyi handu hahadutsu.

¹⁷ Na inyi, njechiumiṟa mrima ya Wamisri, nawo wechimuosha waide napfo, na inyi njechikuwonyia, kiṟumi ko Farao, na ko itorito lyake lyose ko makari hake na ko walya wake wekedoya frasi.

¹⁸ Na Wamisri wechimanya ke Inyi njii Mndumii-Ruwa ilyi njechikuwonyia kiṟumi ko Farao, na makari hake, na wedoya frasi tsake.”

¹⁹ Nahong'u malaika ulya o Ruwa, awesongoya itorito lya Waisraeli mbele, kakure kawuya na numa yawo; na ngo iya ya ipuchi ikakure alya kusonguo kowo, ikahoṟoka numa yawo;

²⁰ Ikakaa makidi hawi ha itorito lya Misri na itorito lya Waisraeli; kyaindi ipuchi lilya liwewuta ngeela ko Waisraeli kiheri kya kio, na mema ko Wamisiri, nawo walaidime isembelia Waisraeli kio taṟaṟaa.

²¹ Mose kahoṟuo owoko loke huya ipalyipalyi; Mndumii-Ruwa katana ipalyipalyi lyiwuye na numa kui otanu sa luapfinya luwuka ora lo ngamenyi, kio taṟaṟaa, katana handu hahadutsu kulya ipalyipalyinyi, mṟinga fukahawukana.

²² Wana wa Waisraeli wakaida kiidi kya ipalyipalyi handu hahadutsu na mṟinga fuwei omombo ora lowo lo kulyo na ora lowo lo kumoso.

²³ Na Wamisri walya wakawaituma numa, wakaida na kiidi kya ipalyipalyi, frasi tsose tsa Farao, na makari hake, na walya wedooya frasi.

²⁴ Kiheri kya aheṟa Mndumii-Ruwa kaimehia ichekeṟo lya Wamisri kulya ngonyi ya modo na ya ipuchi kahataṟa ichekeṟo lilya lya Wamisri.

²⁵ Kawutapfo shidenga shilya sha makari hawo, tane hahenda kyombuho; Wamisri wakahamba, “Ludichie kulya kusonguo ko Waisraeli; cha kipfa Mndumii-Ruwa naiwakapanyia.”

²⁶ Mndumii-Ruwa kawia Mose, “Hoṟoya owoko lopfo huya ipalyipalyi, kundu mṟinga fuwuyese huya Wamisri, huya makari hawo, na huya frasi tsawo.”

²⁷ Mose kahoṟuo owoko loke huya ipalyipalyi na koikitambaṟuka ipalyipalyui lyikawuya kui pfinya yalyo; Wamisri wakadichia kusonguo kolyo, na Mndumii-Ruwa kawaarisia Wamisri kuleshe ipalyipalyinyi.

²⁸ Mṟinga fulya fukawuya fukafihisuo makari na wedoya frasi, na ichekeṟo lyose lya Farao lyileida na ipalyipalyinyi numa yawo; kuletsuhaa mndu ma umupfo.

²⁹ Kyaindi wana wa Waisraeli wakachumia handu hahadutsu makidi hawi ha ipalyipalyi; na mṟingafo fuwei nyi njomombo ora lowo lo kulyo na ora lowo lo kumoso.

³⁰ Nyi wudo Mndumii-Ruwa aleashuo wana wa Waisraeli mkonu fulya mawokonyi ha Wamisri; Waisraeli wakawona Wamisri mbai ya ipalyipalyi, wapfiie.

³¹ Waisraeli wakawona iṟunda lilya lying'anyi Mndumii-Ruwa alewutia Wamisri, nlyondi wanduwo waleichika Mndumii-Ruwa, wakaidikia Mndumii-Ruwa, na mṟundi oke Mose.