IWUKA 12 - Bibilia Kui Mdedie fo Kimochi

Pasaka

¹ Mndumii-Ruwa kadeda na Mose na Aroni orukenyi lo Misri, kawawia,

² “Merifu fochiwa mawokioonyi, ha meri konu; fochiwa nyi meri fo kuwoka fo maka konu.

³ Dedenyi na kisanzio kyose kya Waisraeli muwawie, ‘Mkonu fo ikumi fo meri-fu orio mndu naire ichondi, kui itala lya mba ya ndeawo, ichondi kui wandu wa mba imu;

⁴ na kokoya wandu wa mba nyi waangu ko ichondi limu kyasia o na wamṟasa oke ai kufui na mba yake waire ichondi limu, kui itala lya wandu, kui kiheo kya mliie fo orio mndu, nyi wudo mochiwika itala lyanu ko ichondi lilya.

⁵ Kichondi kyanu nokoye kilawode tewe, kisuwa kya maka fumu; mochimmbuta ponyi lya machondi ang'u mburu.

⁶ Nanyo mochimteseheṟa tane mkonu fo ikumi na kaana fo meri fo ifo; na kisanzio kyo kyose kya Waisraeli wechimshinja kyukanyi.

⁷ Nawo wechiira samu njiangu waishie shiekonyi, shiwi sha mongo na kiwangowangonyi sha mba tsilya wechiliiapfo.

⁸ Wechilya nyama ya kichoondi kyo injikahaṟe modonyi kio kyo, hamu na mkate fulamtarang'ashe; hamu na mboha tsiwode mtarang'ao.

⁹ Manya mlalye injiwishi, manya injikoṟe mṟingenyi, indi injikahaṟe modonyi; mdo foyo handu hamu na masasio hayo, na nyama tsayo tsa ndewunyi.

¹⁰ Manya mlatsuhaṟe kindo kyose kyakyo mṟasa ngamenyi, na kindo kechitsuhaa tane ngamenyi mochikikoṟa na modo.

¹¹ “Na nyi wudi mochilya; mochikoya mukupfungie kiṟota shitsinyi shanu, muṟee shadu shanu madendenyi, na ndichi tsanu mawokonyi hanu; nanyo mochilya mochihukia; nyi pasaka ya Mndumii-Ruwa.

¹² Kyamba njechiida kiidi kya oruka lo Misri kiokyo, na inyi njechikapa wana wawee wose orukenyi lo Misri, wa wandu na shuma; na inyi njechianduya maruwa hose ha Wamisri; Inyi nyio Mndumii-Ruwa.

¹³ Na samu iya yechiwa kichano konu kiidi kya mbatso mochikaa; na inyi ili njechiwona samuyo, njechiitola mbatso tsanu, mulahoyo nyi ngapo yo yose imunyamaṟe, ili njechikapa oruka lo Misri.

¹⁴ Na mkonu fu fochiwa ngumbuo konu, nanyo mochifuhaluo fuwe mnene ko Mndumii-Ruwa; mochifuhaluo fuwe mnene ipfo shisharinyi shanu shose, kui iwawaso lya mlungana.”

Mkonu mnene fo mkate ilanjitarang'ashe

¹⁵ Mochilya mkate ilantarang'ashe ko mkonu mfungade; mkonufo fo kuwoka mochiira orio mtarang'ao fose fulawono kiidi kya mba tsanu manyale, cha kipfa mnducho oose echilya mkate fumtarang'ashe wokia mkonu fo kuwoka tane mkonu fo mfungade, mrima foke fochiletsano kuleshe na Waisraeli.

¹⁶ Mkonu fo kuwoka ipfo konu kochikaapfo kisanzio kiele, na mkonu fo mfungade kochikaa-pfo kisanzio kiele; kochiṟundo kiṟundio kyo kyose kiidi kya mkonuyopfo, shile na iyo sa orio mndu kimbaṟi nalye, ikyo tupu kiwutike konu.

¹⁷ Nanyo mochiringa mkonu fo mnene fo mkate ilantarang'ashe; kyamba kiidi kya mkonu fo ifo inyi njilewuta matorito hanu orukenyi lo Misri; ko ikyo mochiiringa mkonuyo kiidi kya njoshari tsanu tsose, lyiwe nyi iwawaso lya mlungana.

¹⁸ Meri fo kuwoka, mkonu fo ikumi na kaana fo meri, ilyi kyukanyi, mochilya mkate ilantarang'ashe, itane mkonu fo makumi hawi na fumu fo meri ilyi kyukanyi.

¹⁹ Mkonu mfungade kulawono mtarang'ao mmbenyi tsanu manyale; cha kipfa mnducho oose echilya ikyo kikiwike mtarang'ao, mrimafo fochiletsano kuleshe na chila ya Waisraeli, nawe mndu mokaa wuhenunyi ang'u nawe mndu amfee wuhenunyi.

²⁰ Manya mulalye kindo kyo kyose kikitarang'ashe; mochilya mkate ilantarang'ashe kanyi konu kose.

Pasaka ya kuwoka

²¹ Nalyo Mose kalaha wameku wa Waisraeli, na iwawia, “Hendenyi, mkuwonyie machondi chandu shishari shanu shikeri, mulishinje pasaka.

²² Nanyo muire iṟamba lya iande, mulikape kulya samunyi injiwike mboṟikonyi na ilikapa kiwangowangonyi na shiekonyi shiwi sha mongo kui samuyo ikeri ipfo mboṟikonyi; kingise mndu o kiidi kyanu oose nalaitole mongo fo mba yake itane ngamenyi.

²³ Cha kipfa Mndumii-Ruwa nechiida kundu nakape Wamisri-wo; na kiheri echiwona samu yo kiwango wangonyi na ipfo shiekonyi shiwi, Mndumii-Ruwa nechiitoola mongofo, manya elechilekia monyamaṟa naide na mba konu imukapa-pfo.

²⁴ Nanyo mochiringa kindoki ke nyi iwawaso kopfo na ko wana wapfo mlungana.

²⁵ Kechiwa, mandi mochishikia ipfo orukenyi Mndumii-Ruwa echimuinenga, chando aleteṟia, nlyondi mochiwada wuṟundi wu.

²⁶ Na kechiwa, ili wana wanu wechimbesa, ‘Kitewe kya kiṟundioki kyanu nkiki?’

²⁷ Nlyondi mochiwawia, ‘Nyi mṟumo fo pasaka ya Mndumii-Ruwa, cha kipfa naleitoola huya mba tsa wana wa Waisraeli kulya Misri, kiherikyo awekapa Wamisri, kaashuo mba tsadu.’” Wanduwo wakaaramtsa mdo yawo wakaadapfuma.

²⁸ Kyasia wana wa Wasraeli wakawewuta wado mbonyitsi; chandu Mndumii-Ruwa alewawasa Mose na Aroni, nyi wudo walewuta.

Ngapo ya ikumi: Ipfa lya orio kiwee kya Wamisri

²⁹ Koikishika, kio mahelehele, Mndumii-Ruwa kakapa wana wawee wose wa orukenyi lo Misri, wokia mana mbee o Farao awedamie loṟikehu lo wuitoṟi, itane mana mbee o mndu mpfungo ai mmbenyi ya wapfungo; na mahache hose ha kuwoka ha shuma.

³⁰ Farao kakure kio, o na waṟundi wake wose, na Wamisri wose; kukakaapfo kieṟeṟo king'anyi kulya Misri; kyamba kulawewode mba ma imu kulalepfa mndu.

³¹ Kalaha Mose na Aroni kio, kahamba, “Kurenyi, wukenyi kunu ko wandu wako, nyo na wana wa Waisraeli, kehendenyi, mkeṟundia Mndumii-Ruwa chando mlehamba.

³² Irenyi machondi hanu mmbe tsanu chando mlehamba, hendenyi konu, mkenjiwikia na inyi mboṟa-da.”

³³ Wamisri da nawo wakaweitika wandu, iwawuta kulya orukenyi owinyi faṟa kyamba walehamba, “Lomemaa ipfa lose.”

³⁴ Wandu wakaira mso fo mkate yawo fulamewiko mtarang'ao, na shihia shawo sheruwikia wakashiwika nguonyi wakakudika makosohu hawo.

³⁵ Wana wo Waisraeli wakawuta chandu idedo lilya lya Mose; wakaduo shihia sha fesa na shihia sha sahabu, na maṟao ko Wamisri.

³⁶ Mndumii-Ruwa katewa Wamisri wakakunda Waisraeli-itane wawainenga orio kindo wamekukundia. Nawo wakaduo Wamisri wapfungo wa shida.

³⁷ Wana wa Waisraeli wakaira kyaṟo wokia Ramesesi mṟasa Sukothi, nawo itala lyawo waweshikie cha wandu shiku mahana haṟandaṟu (600,000) wandu wasoṟo waweichumia na madende, kuutapfo itala lya wana watutu.

³⁸ Na kituṟu king'anyi kya wandu wawelonganyi nawo wakado handu hamu nawo; na machondi na mmbe shuma shifoi mnu.

³⁹ Nawo wakakahaṟa mkate ilantarang'ashe ya mso fulya, walefuduo mandi walewuka kulya Misri, kyamba, fulawembike mtarang'ao, cha kipfa walewuto wawuke Misri, waleidima itirimapfo, nawo walawemekuteseheṟie kichau.

⁴⁰ Kyasia, wana wa Waisraeli walekaa kulya Misri maka mahana haana na makumi haṟaṟu (430).

⁴¹ Kiwei masionyi ha makayo mahana haana na makumi haṟaṟu (430), nyi kiwei mkonu fulya fulya ke matorito ha Mndumii-Ruwa, halewuka orukenyi lo Misri.

⁴² Nyi mkonufo fochiringo mnu oshangunyi lo Mndumii-Ruwa kipfa kya ili alewawuta orukenyi lo Misri; iki nkyo kio kya Mndumii-Ruwa, kiwaṟi iringo mnu nakamu nyi wana wa Waisraeli wose ipfo shisharinyi shawo.

Wuwawaso wo Pasaka

⁴³ Mndumii-Ruwa kawia Mose na Aroni, “lwawaso lya pasaka nyi ili; mndu mhenu nalalye;

⁴⁴ kyaindi mṟundi oose o mndu icho amhuṟe na fesa, komemarisa imdina, oo nlyondi echilya pasaka.

⁴⁵ Mokaa konu cha wuhenunyi, na mṟundi motao wueri, walalye pasaka.

⁴⁶ Ilyiiyo mmbenyi imu; kuladuo nja ya mba nyama yo yose; manya mlafunje fuo lyake ilyo lyose.

⁴⁷ Na kindoki kiwuto nyi kisanzio kya Waisraeli wose.

⁴⁸ Na ili mhenu echidamia hamu na iyo, na ikunda iwikia Mndumii-Ruwa pasaka, wasoṟo wake wose wakemedino, nlyondi wechitikiria na iwika pasaka; nao nechiwa kimu cha mndu amfeye kunu orukenyi; indi mndu oose alamdine nalalye

⁴⁹ Iwawaso nyi ilyo limu ko mndu amfeye konu, na ko mhenu ai kiidi kyanu wuhenunyi.”

⁵⁰ Nyi wudo wana wa Waisraeli wose walewuta; chando Mndumii-Ruwa alewatutuma o Mose na Aroni, nyi wudo walewuta.

⁵¹ Fuwei mkonu na fulya fulya fumu, Mndumii-Ruwa iwuta wana wa Waisraeli orukenyi lo Wa Misri kui matorito hawo.