IWUKA 11 - Bibilia Kui Mdedie fo Kimochi

Mbonyi tsa iwoho lya orio kiwee kya Misri yahambo

¹ Mndumii-Ruwa kawia Mose, “Kutsuheṟepfo ngapo imu, sa njechiende huya Farao na huya Misri; numa nechimuinenga nyo momu muwuke kunu; nao ili echimuinenga momu, nechimufuna kichi kichi mukure kunu.

² Kyasia, iyo deda madunyi ha wanduwa, na orio mndu msoṟo nakunde kui kiheri kyake, na orio mndu mka nakunde kui kiheri kyake, shihia sha fesa, na shihia sha sahabu.”

³ Mndumii-Ruwa kainenga wanduwo iidikio oshangunyi lo Wamisri. Ngoseṟa ya isho, Mosechu nawei mnene ang'anyi kulya orukenyi lo Misri, oshangunyi lo waṟundi wa Farao, na oshangunyi lo wandu wake.

⁴ Mose kahamba, “Mndumii-Ruwa nahamba adi, kui kio kya mahelehele inyi njechikure njiide Misri kose,

⁵ Na wawee wose wa orukenyi lo Misri wechipfa, wokia mana mmbee o Farao adamie loṟikehu loke lo wuitoṟi ushike mana mmbee o kisinga ki numa ya ifeo; na orio kiwee kya shuma shose.

⁶ Nlyondi kochikaapfo kilio king'anyi orukenyi lo Misri lose, sa ofano loke lulalembono kiheri kyose, manya ofano loke lochikaa luwono manyalepfo.

⁷ Kyaindi ipfo ko wana wa Waisraeli kuipfo manya kite kechipomapfo, kochiho olele kiidi kya wana wa Israeli, kundu muwuteho imanya chandu Mndumii-Ruwa ailetsana Wamisri na wana wa Waisraeli.

⁸ Na waṟundiwo wapfo wose wechisoka na koko inyi, nawo wechinjindia wehamba, kure iyo, na wanduwa wapfo wose waitumanyi na iyo; na numa ya isho njechikure.” Nahong'u kawuka ko Farao na nyashi ing'anyi.

⁹ Mndumii-Ruwa kawia Mose, “Farao echimuidikia nyopfo; kundu ṟiho tsako tsiengeṟeke ipfo orukenyi lo Misri.”

¹⁰ Mose na Aroni walewuta ṟihotso tsose oshangunyi lo Farao; Mndumii-Ruwa kaumiṟa mrima fo Farao, nalainenge wana wa Waisraeli wawuke kulya orukenyi loke.