IWUKA 10 - Bibilia Kui Mdedie fo Kimochi

Ngapo ya nyanya: Nzihe

¹ Mndumii-Ruwa kawia Mose, “Ida na ko Farao; kyamba inyi njechiumiṟa mrimafo foke, kundu njiidime iloṟa shichano shako kiidi kyawo;

² Na iyo noidime ihamba madunyi ha mana opfo, na madunyi ha mchuku opfo, nyi mbonyi njiki njilewutia Misri na shichano shako njileloṟa kiidi kyawo; wawuteho imanya ke inyi nyi Mndumii-Ruwa.”

³ Kyasia, Mose na Aroni wakaida na ko Farao, na immbia, “Mndumii-Ruwa o Waebri, nahamba adi, Ngesa! Nochileha mṟasa indi ihendelia oshangunyi loko? Inenga wandu wako momu wakuhendie, kundu wanjiṟundie.

⁴ Ang'u, koleha iinenga wanduwo wako momu wakuhendie, ambuya, ngama njechiende nzihe tsiide na orukenyi lopfo;

⁵ natso tsechipfumba teri ya oruka, mndu nalaidime iwona orukalo; natso tsechilya mtsuhaṟofo isho shiletsuhaa shilekia numa ya mvuo iya ya manzaho, tsechilya orio ikidi lyechido kipfa kyanu ipfo mademenyi;

⁶ na mba tsapfo, na mbatsa waṟundi wapfo, na mba tsa Wamisri tsose tsechiichuo nzihe; ofano lotso lulambono nyi wandewo wapfo, manya wasahuyo wapfo wokia walewooka ikaa wuyana mṟasa inu kudi.” Naho kaembeṟuka kawuka ko Farao.

⁷ Nyilyondi waṟundi wa Farao wakambia, “Mnduchu nechiwa mdeho koduso mṟasa indii? Inenga wanduwa momu wakuhendie, wakeṟundia Mndumii-Ruwa, Ruwa owo; ate omemanya ke Misri yamenyamaṟika?”

⁸ Mose na Aroni wakaendose na ko Farao; nao kawawia, “Hendenyi, mukeṟundia Mndumii-Ruwa, Ruwachu onu; kyaindi nyi waki wechihenda?”

⁹ Mose kamhaluo, “Lochihenda na wanake wadu, na wameku wadu, na wana wadu, na wana wadu wa kika, lochihenda na machondi hadu na mmbe tsadu; cha kipfa kiluwaṟi isungusia Mndumii-Ruwa mkonu mnene.”

¹⁰ Kyaindi kawawia, “Ee, Mndumii-Ruwa nakae hamu nanyo, chando njechimuinenga momu mkuhendye hamu na wana wanu; ambuyenyi, kyamba, ‘Kuwode wuwicho ipfo kundu muihenda.

¹¹ Chi wudopfo; hendenyi nyo wandu mushitsie, muhende iṟundia Mndumii-Ruwa; cha kipfa nkyo kindo mukundi.’” Nawo wakafuno oshangunyi lo Farao.

¹² Mndumii-Ruwa kawia Mose, “Hoṟuo owoko lopfo huya oruka lo Misri, huya nzihe, kundu tsilye shilimu shose sha orukenyi, isho shose shiletsuhaṟo nyi mvuo iya ya maho.”

¹³ Kyasia Mose kahoṟuo ndichi iya yake huya oruka lo Misri, na Mndumii-Ruwa kaende otanu kuwuka ora lo ngamenyi huya oruka, mkonu puti, na kio taṟaṟaa; koikitambaṟuka otanu lulya lo ora lo ngamenyi lukaende nzihe.

¹⁴ Na nzihe tso tsikarunduka huya oruka lose lo Misri, tsikalaa orukenyi lose lo Misri, tsiwenjiwawo iki kiwicho-wicho; kulalemekaepfo nzihe cha itso kiheri kyo kyose, manya numa ya itso kochiwoneka tsingi cha itsopfo.

¹⁵ Cha kipfa tsileshikia oruka lose, itane meema focha; tsikalya shilimu shose sha orukenyi, na ndunda tsose tsa mashidi tsiletsuhaṟo nyi mvuo iya ya manzaho; kuledeo manya iṟa limupfo, ikidi manya kilimu kya mdeminyipfo, kulya orukenyi lose lo Misri.

¹⁶ Nahong'u Farao kalaha Mose na Aroni owinyi; kahamba, “njilewutia Mndumii-Ruwa onu wunyamaṟi handu hamu nanyo daa.

¹⁷ Kyasia wulalu, ngamuterewa, njihoṟienyi wunyamaṟi woko kambalyi limu tupu, muterewe Mndumii-Ruwa, Ruwachu onu, nakenjiwuta opfu lu tupu.”

¹⁸ Kawuka ko Farao, na iterewa Mndumii-Ruwa.

¹⁹ Mndumii-Ruwa kaembeṟutsa otanu lo ora lo kyukanyi lurie pfinya ing'anyi, sa luleira nzihe tsilya lukatsiduo ipalyipalyinyi lya Shamu; kulatsuhae nzihe maimu kulya orukenyi lo Misri.

²⁰ Kyaindi Mndumii-Ruwa kahaluo mrima fulya fo Farao fukawa muumu, alainenge wana wa Waisraeli momu wahende kowo.

Ngapo ya kenda: Meema

²¹ Mndumii-Ruwa kawia Mose, “Hoṟoya owoko lopfo ruwehu, kuwade meema orukenyi lo Misri, wandu wawade wade meemenyi.”

²² Kyasia Mose kahoṟuo owoko loke woambuya huye ruwehu; kukawada meema fuputikanyi puti orukenyi lose lo Misri ko mkonu iṟaṟu,

²³ mndu na odoye walaidime iwonana, manya mndu nalaidime ikure o handu awei ko mkonu iṟaṟu; kyaindi wana wa Waisraeli wose wawewode ngeela orio handu wawei hose.

²⁴ Farao kalaha Mose, kambia, “Ee, hendenyi, muhende iṟundia Mndumii-Ruwa; machondi hanu na mmbe tsanu tupu tsechideo; wana wanu da wechihenda hamu nanyo.”

²⁵ Mose kahamba, “Kikuwaṟi noluinengie mawokonyi hadu na shuma shedasa na sha mwano fomaya modonyi, kundu luidime ishinjia Mndumii-Ruwa odu kidaso.

²⁶ Mapo hadu daa hechihenda handu hamu naso kochideo numa manya mbahachu imupfo; kyamba kiluwaṟi iira kiidi kya isho luidime iṟundia Mndumii-Ruwa, Ruwa odu; naso luichi, ma ili lochishika ipfo, nyi kindo kya mbaṟi njiki sa kiluwaṟi iṟundia nakyo Mndumii-Ruwa.”

²⁷ Kyaindi Mndumii-Ruwa kaumiṟa mrima fulya fo Farao nalawainenge momu wakuhendie kowo.

²⁸ Farao kawia Mose, “Ida na kulya, ambuya, kulaambuyese kyamu kyako; cha kipfa mkonufo ochinjiambuya kyamu kyako nochipfa.”

²⁹ Mose kahamba, “Nodeda kya sumhana inyi njechikuambuyase kyamu kyapfopfo.”