IWUKA 1 - Bibilia Kui Mdedie fo Kimochi

Wana wa Israeli waliso wukiwa kulya Misri

¹ Kyasia marina ha wana wa Waisraeli waleida na Misri nyiho iha; Orio mndu na kishari kyake walecha handu hamu na Yakobo.

² Reubeni, na Simioni, na Lewi na Yuda;

³ na Isakari, na Zebloni, na Benyameni;

⁴ na Dani, na Naftali, na Gadi, na Aseri.

⁵ Kishari kyose kiwukie kitsinyi kya Yakobo nyi makumi mfungade (70), na Yosefu chu nawei Misri wokia mawookionyi.

⁶ Yosefu Kapfa, na wana wa mae wose, na wandu wose wa oshari lulya.

⁷ Na wana wa Waisraeli wawekepfumbuka mnu, na iengeṟeka wakafo wakawada pfinya, wakaichuṟa oruka lulya.

⁸ Kyasia, kukakure mangi ingi njihya kulya Misri, alaichi Yosefu.

⁹ Kawia wandu wake, “Ambuyenyi, wandu wa wana Wasraeli wafoi, na wawode pfinya kota so.

¹⁰ Kyasiang'u! Luwawutie sha wuṟango, walacheiengeṟeka; kukocha shida, wo walashike ikulunga na wakituwa wadu na ikapana naso, na idicha iwuka kunu orukenyi.”

¹¹ Kyasia, wakawika wewahoṟokia wawalise wukiwa wo maṟio hawo. Nawo wakawikia Farao mṟi yewikapfo kisa, Pithom na Ramesesi.

¹² Kyaindi chandu walewalisa wukiwa nyi wudo walepfumbuka na iengeṟa ilaa kulya na kulya. Wamisri walewado nyi wuowu kipfa kya wana wa Waisraeli.

¹³ Wamisri wakawada wana wa Waisraeli cha masinga kui wunesi;

¹⁴ wakawainenga maṟunda maumu wakakaa ko wukiwa; maṟunda ha chokaa na matofali, na orio mbaṟi ya iṟunda lya mademenyi.

¹⁵ Naho mangi ya Misri kadeda na walya weende wana Waebri, umu rina lyake nyi Shifra, na o kawi rina lyake nyi Pua;

¹⁶ kahamba, kiheri mochitarama waka wa Kiebri ili mandi waifee, na mkamekoya nyi mana o kisoṟo, wahenyi indi mkamekoya ke nyi mana o waka mdenyi na moo.

¹⁷ Kyaindi walya weende wana waweowoye Ruwa, walawute chandu waletutumo nyi mangiyo ya Misri, kyaindi wakasuṟuma wanawo wa kisoṟo wai na moo.

¹⁸ Naho mangi ya Misri kalaha walya weende wana kawawesa, “Nki ki mlewuta iki, isuṟuma wana wo wa kisoṟo wai na moo?”

¹⁹ Walya weende wana wakawia Farao, “Nkipfa wakawo wa Kiebri walai cha waka wa Kimisri;” wo nyi wai ngohoda, wo; wekefee wana ili walamekoyo.

²⁰ Kyasia, Ruwa kawutia walya weambia wana mecha; na wanduwo wakapfumbuka mnu, wakaengeṟeka na iwada pfinya tsing'anyi mnu.

²¹ Nyi kipfa kya ili walya weende wana wawewode wuindi ko Ruwa, Ruwa kawasumba oshari lung'anyi.

²² Numa Farao kawawasa wandu wake, kahamba, “Orio mana o kisoṟo echifeo nakumbo medenyi fo Nili, na orio mana o kika mochimda na moo.”