HOSEA 9 - Bibilia Kui Mdedie fo Kimochi

Hosea ahamba ngapo ya Israeli

¹ Ambuya, nyo Waisraeli manya mulachihio, ma mlasungusie mfuho ing'anyi cha wandu wengi wa mkambo, kyamba nyi mulewa wandu waṟuhui, mukalekana na Mndumii-Ruwa onu; mukakuchihiṟa na wueri wo wuṟuhui wulewutikia handu hehuya Ngano.

² Kyaindi ambuya Ngano na ipipa lya mvinyo shechiidima imuihutsapfo; mochiidima iwona mvinyo mhyapfo.

³ Ambuya wechikaa orukenyi lo Mndumii-Ruwapfo, Ee wana wa Efraimu nyi wechiwuya wusingenyi kulya Misri, wechihenda ilya shelya sha ngafu kulya Ashuru.

⁴ Ambuya wechihenda iwutia Mndumii-Ruwa mwano fo mvinyopfo; manya wechiidima imchihiṟa ko shidaso shawopfo; kelya wechilya kifananyi na kelya keawuka kilionyi, iwo wose wechilya kelya kyo nyi wechikufanyitsa ngafu, kelya kyo nyi kechiwaihutsa wo wawenyi tupu; kyechiwa iendo na mbenyi ya Mndumii-Ruwa sepfo.

⁵ Ambuya, nyi kiki mochiwuta mkonu fulya mnene fumteseheṟe? Ang'u mkonu fulya fo mfuho fo Mndumii-Ruwa?

⁶ Kiheri kyo mochidicha ngapo tsa oruka lonu, Misri yechiwaambia koke kyaindi shipfu shanu shimuwedie kulya Memfisi. Sangari yechioṟa kiidi kya shisa shanu sha fesa; na msha nyi yechioṟa ipfo mahemenyi hanu.

⁷ Mfiri ya ngapo yameafukia, na mfiri yetaa kiṟache yameafukiada, Waisraeli kimbaṟi mumanye mkonu fo; ambuya nyi mokehamba miikimbi nyi tondo, na ichu asongoyo nyi mumuyo nyi msuko; nyi mokehamba mudo kifpa kya mawicho hanu hang'anyi, na kipfa kya kituwa kyanu king'anyi.

⁸ Ambuya, miikimbi nyi akeri mringi o Waifraimu handu ha Mndumii-Ruwa, kyaindi orio handu aida nekyedeho cha kilehe, manya mbenyi ya Mndumii-Ruwa oke nasuikie.

⁹ Nyo nyi musoṟowie kiidi ka wunyamaṟi chandu kiwekeri kulya Gibea; Mndumii-Ruwa nyi echikumbuo madeko hawo, nao nechiwakapa kipfa kya wunyamaṟi wowo.

Madeko ha Israeli na kilya kilewakoya

¹⁰ Mndumii-Ruwa nyi ahamba le; kiherikyo njilekoya Waisraeli, nyi wawei cha msabibu fuwedoye kundu ko nuka; Kiheri kyo njilekoyana na waku wanu, wawei cha mbeu ya kuwoka ya mashidi ha msinepfu , kyaindi kiheri waleshika Baal-peori, wakalya mma yeindia Baali. Wakawa kindo kisuikie cha kindokyo walekikunda.

¹¹ Wucha wo Efraimu nyi wosaramaya cha shilehe; ambuya wana wechifeosepfo, kuwodese wana wafeosepfo, manya kuwodese waka ikapikapfo.

¹² Kokoya weching'anyisha wana njechidaho manya umu na moopfo, ochia nyi lowo kyamba nyi njechiwada wawe wahumba.

¹³ Chandu kiwei kuwoka, Efraimu nyi awei cha mbeu njicha injidonge pichinyi licha; Kyaindi wulalu kyakoya Efraimu naduo wana wake wahende iwoho.

¹⁴ Hoi Mndumii-Ruwa wakape! A nyi uda ochiwakapa? Kehaluo waka wawo wawe wahumba, uwewaima mawee heonza wana wawo!

Mwanduye fo Mndumii-Ruwa ko Waisraeli

¹⁵ Ambuya wuwicho wowo nyi wulewokia kulya Gilgali; nyi wudo Mndumii-Ruwa ahamba. Ipfo nyipfo njiilewoka iwasuo. Kipfa kya mawuto hawo mawicho, ambuya nyi njihenda iwafuna kanyi koko, manya njechiwakunda sepfo; Wanene wawo wose nyi walelekana na inyi.

¹⁶ Wandu wa Efraimu nyi walekapo, wakawa cha ikidi liwode mri sa njiumu, wechifee wana sepfo, manya kokoya wafee, nyi njechiwawaha wanawo wawo wawakundi.

Miikimbi adeda kya Israeli

¹⁷ Kyamba waleha imwadanyia, Mndumii-Ruwa oko nyi echiwakumba, nawo nyi wechihenda iṟahaṟaha kiidi kya mkambo ya wandu.