HOSEA 8 - Bibilia Kui Mdedie fo Kimochi

Madeko hang'anyi ha Israeli

¹ Kapenyi iranda! Kyamba mkituwa nyi aicha cha mbeṟo, nasokie mba ya Mndumii-Ruwa, kyamba nyi waletehiya mkundana foko, wakaweleha wuwawaso woko.

² Waisraeli wekenjifihiṟia wechihamba, “Mndumii-Ruwa odu nyi lukuichi.”

³ Israeli nyi waleleha shindo shilya shicha, koikyo mkituwa nyi echimcheya.

⁴ “Ambuya nyi walekusambuṟia, wamangi sa njilalewasambuṟa. Wakawewika wanene sa njilawewaichi, wakawesungusia maruwa ha fesa na sahabu, ikyo nyi kyo kechiwainenga wasaramaye.

⁵ Nyo Wasamaria ambuya nyi, njisuo sanamu yo yapfo ya ihache. Nyashi yako nyi ikeri iwaakia, nyi mochikaa mui wadeko mudo itane indii?

⁶ Nyo Waisraeli nyi nawudo wudo! Sanamu yo yanu nyi mwaria aleisungusia, ikeri Ruwa manya le pfo, ee, sanamuyo ya ihache, ya Samaria nyi ikeri ihenda ifunjo funjo!

⁷ “Ambuya nyi wakeri iwaya otanu, nawo waihenda isambuo kiwiriwiri. Ambuya shilimu shawo shikeri mdemenyi, shechioṟa shilimu pfo. Manya kokoya shechikumbia shilimu sho nyi shechilio nyi wahenu.

⁸ Waisraeli wawameṟe, Nyi wasanganyi sanganyi na wandu wa mkambo, wamekuwia mbocha piu.

⁹ Ambuya, nyi walehenda iterewa Waashuru wawaikanyie, wakawekuwia cha nzoi iṟahaṟaha njienyi, Efraimu nyi aleakuo wakunde wake,

¹⁰ nyi walepfula wakunde wawo kiidi kya mkambo ya wandu, kyaindi njikerihenda iwasanyia owinyi, nawo nyi wechiwona wulemeri wo mhanda walediko nyi wamangi.

¹¹ “Ambuya wandu wa Efraimu nyi walewika marasio hafoi, naho hakawaengeṟia njonyamaṟo.

¹² Kokoya njiwechiwaṟehiya mawawaso hako hafoi, ma kudo wawehawona cha kindo kihenu kowo tupu.

¹³ Ambuya wo nyi wakundi iwuta mwano na shidaso, nyi wekewuta shidaso wakawelya nyama tso, kyaindi inyi Mndumii-Ruwa shekenjichihiṟapfo, Inyi njihenda ikumbuo njonyamaṟo tsawo, njihenda iwakapa kipfa kya madeko hawo, ambuya nyi njihenda iwawihiṟa wusingenyi kulya Misri.

¹⁴ Ambuya, Waisraeli nyi walehadima ichu alewaumba, wakakuwikia mba tsawo tsa usuṟi, Yuda wakaengeṟa mṟi ifoi na iikara njomombo tsake, kyaindi njihenda idika modo fuhende ikoṟa mṟi yo na iolotsa njomombo tso tsayo.”