HOSEA 6 - Bibilia Kui Mdedie fo Kimochi

Idumbuya lilai lya lohi

¹ “Ndenyi luwuye na ko Mndumii-Ruwa! Ambuya nyio amonyi aleluranduo, kyaindi nao amonyi nyi echiluchiṟa; Nyio alelufaṟa, nyio amonyi echichiṟa shifaṟe shadu.

² Mfiri iwi ikameida nyi echiluinenga se moo, iyee, na mfiri fo kaṟaṟu nyi echiluṟutsa, kundu luidimese ikaa handu hamu nao.

³ Ko ikyo lumanye, luweengeṟa imanya Mndumii-Ruwa, icha lyake nyi lii lya lohi, cha icha lya mkonu, ambuya nyi echilucheya, cha mataṟataṟa ha mvuo, chandu mvuo ya kisie yekenosa oruka.

⁴ “Kyaindi Mndumii-Ruwa nyi ahamba adi, ‘Njikuwutie ki iyo Efraimu? Njikuwutie ki iyo Yuda? Ikunda lyanu koko nyi likeri cha mtiima fo ngamenyi, likawefanana na ṟauṟa ya ngamenyi yekehaduka owinyi.

⁵ Nyikyo kitewe njilemuchea kui madedo ha waikimbi, ngawemuarisa kui madedo hako, na mwanduye foko nyi fokecha cha ili mnengeṟi fodo.

⁶ Kyamba kindo kinjichihiṟie ipfo konu nyi wuhoṟotsu, manya chi shidaso pfo, imanya Mndumii-Ruwa manya chi shidaso shemaya modonyipfo.’”

Wunyamaṟi woichuo kose wuyanenyi

⁷ Ambuya nyo mulefunja mkundana chandu Adamu alewuta; kyamba walenjiwutia kui wuhoṟotsupfo,

⁸ Gileadi nyi mṟi fo wandu wawicho, nyi mṟi fuichuo samu,

⁹ Kyamba chandu wasoki wekeowia wandu, njienyi kundu wawasoke, nyi wudo wakohanyi walekoyana wechiowelia. Wakawaha wandu njienyi wechihenda Shekemu, ambuya nyi walewuta wuwicho wuṟatsie.

¹⁰ Ambuya, nyi njilewona kindo kiwicho mnu kiidi kya mba ya Israeli, wana wa Efraimu nyi waiengeṟa ikufanyitsa.

¹¹ Ko ora lopfo iyo Yuda, nyi umteseheṟie kiheri ochisambuo ngapo.