HOSEA 5 - Bibilia Kui Mdedie fo Kimochi

Walosha wawicho wa Israeli

¹ Keadanyienyi lanye wakohanyi! Keadanyienyi nyo Waisraeli! Keadanyienyi nyo oshari lo kimangi. Nyi kiwemuwaṟi muhoṟokie wusumhanyi, kyaindi nyi mulehaluka mdeho kulya Mispa. Mukawehaluka mdeho ipfo Tabori;

² Mkawesuma ṟungu lileshe lyewadeha ipfo Shitimu, Kyaindi njechimukapa nyo moose.

³ Ambuya inyi njiwaichi wandu wa Efraimu, Waisraeli waidima idekeka koko pfo. Nyo wandu wa Efraimu nyi muleṟuhuya, ambuya Waisraeli wose nyi walekufanyitsa.

Hosea adedia weindiya maruwa hengi

⁴ Mawuto hawo nyi hawaima walaidime iwuuya Mndumii-Ruwa owo, Mrima yawo nyi iichuo wuṟuhui, wanjiichi inyi Mndumii-Ruwa pfo.

⁵ Ikudosa lya Waisraeli nyi liwonekanyi na pata; Wandu wako Efraimu nyi wechiomboka kipfa kya wuwicho wowo, na wandu wa Yuda nyi wechiomboka handu hamu nawo.

⁶ Ambuya nyi wechihenda na mapo hawo ha mbe na machondi; wechishiha Mndumii-Ruwa; kyaindi wechiidima imbona pfo, kyamba amekuletsana nawo.

⁷ Kyamba nyi waleda ikusiria ko Mndumii-Ruwa, wafee wana wa mkika ambuya meri fui okombe, nyi fochiwameṟa handu, hamu na madema hawo.

Shida kiidi kya Yuda na Israeli

⁸ Kapenyi ombe ipfo Gibea na taṟumbeta ipfo Rama. Kapenyi king'oṟa ipfo Beth-aweni. Nyo wana wa Benyameni wakituwa wapfo nyi wakeri nduma yapfo.

⁹ Efraimu nyi yechiwa nuka mresi . Iki nyi kindo kya lohi kihenda iwutika kiidi kya Israeli.

¹⁰ Wanene wa Yuda nyi wekeilacha mṟasa ya teri. Ambuya inyi nyi njihenda, iwaletsia nyashi yako cha mṟinga.

¹¹ Efraimu nyi walelya wukiwa, kawesoko na shilya shiwembaṟi, kyamba nyi alekunda iosha wutondo.

¹² Koikyo inyi nyi njikeri cha ilondo ko Efraimu, na itiinga liwicho ko, wandu wa Yuda.

¹³ Kiheri wandu wa Efraimu, walemanya ndaṟe yawo, na Wayuda wakawemanya itiinga lyawo, wana wa Efraimu nyi, walehenda ko mangi, o Ashuru kundu nawaikanyie, kyaindi echiidima imukanyia, manya ichiṟa itinga lyanupfo.

¹⁴ Kyamba inyi njechihenda iwa cha miiso ko Efraimu, na imana lya miiso ko wandu wa Yuda. Kyamba inyi njimonyi njihenda iwaranduo randuo na iwaduo, manya kuwode mndu echiidima iwakiṟa pfo.

¹⁵ Ambuya nyi njiwuya na handu hako na ikuashuo na wo, mṟasa mandi wechiwona ideko lyawo wanjiwuuye, wukiwa wowo nyi wochiwatewa wanjipfule wechihamba;