HOSEA 4 - Bibilia Kui Mdedie fo Kimochi

Mndumii-Ruwa anunuwa kya Israeli

¹ Adanyienyi Mndumii-Ruwa, nyo Waisraeli. Mndumii-Ruwa nanunuwa kipfa kya wandu wa oruka lu. Kuwodese wuhendeli ma mrima mcha orukenyi-pfo; kuwodese mndu aichi Ruwa kunu orukenyi-pfo.

² Ilya nyamu, wongo, uwahi, wuiwi na wuṟuhui wuichuopfo. Wunyamaṟi wuongeṟa ifo, na samu ipusuyo orio mkonu.

³ Koikyo, oruka lose lui ngumia, wandu wose wa orukalu wakeri isaramaya, handu hamu na mando ha ngeṟenyi na malehe; ma makunga ha ipalyipalyinyi hairumatso.

Mndumii-Ruwa anunuwa kya wakohanyi

⁴ Kyaindi wandu walawonyio owingo, ma ikekedio, kipfa inyi njikukekedia iyo mkohanyi.

⁵ Iyo nochikapa mtulia mfiri, nao miikimbi nechikapa mtulia kio handu hamu na iyo. Njechirumatsa mayo Israeli.

⁶ Wandu wako warumara kipfa walanjiichi; kipfa iyo mkohanyi noleha iwapfunda. Ngakuleha ulawe mkohanyi oko. Kipfa nohadima mdumbuye ya Ruwa opfo, na inyi njechihadima iwikia mboṟa wana wapfo.

⁷ Chandu wakohanyi waleongeṟeka, na wudo wose waleengeṟa injitwaṟa. Koikyo, njechihaluo kiṟumi kyawo kiwe sonu.

⁸ Kipfa wakuihutsa ko shiano sha wunyamaṟi wo wandu wako. Wawodo mnu nyi macha hewawona wewuta wunyamaṟi.

⁹ Kyaindi isho shechiwakoya, nasho shechikoya wakohanyi; njechiwahoṟuo kipfa kya mchumie fowo, njechiwatana watae kipfa kya mawuto hawo wamonyi.

¹⁰ Wechilya, kyaindi wechiihuda-pfo; wechimelukameluka, kyaindi wechiwona wana-pfo, kipfa wanjida inyi Mndumii-Ruwa, na ioshana na maruwa hengi.

Ruwa asesa miindie ya maruwa ha wongo

¹¹ Mvinyo mhya na fo kacha, fokesoka wandu wulaanyi.

¹² Wandu wako weketerewa wulaanyi ko mashidi; wukidi wowo wo lasha nyiwo wokewainenga otambahaluo. Macha hawo hewuta wuṟuhui nyiho hawadetsa; wawuta wuṟuhui ko ioshana na maruwa hengi, wakanjida inyi Ruwa owo.

¹³ Wakeri iwuta shidaso shawo shitonyohu sha mafumvu; ee da, wawuta shiano mafumvunyi, wanda ya Mialoni, Migude na Moya, kipfa maṟinje hayo nyi mecha. Koikyo wana wanu wa kika wechiwuta wumelukimeluki, na wamali wanu wechiwa waṟuhui.

¹⁴ Kyaindi njechihoṟuo wana wanu wa kika kiheri wawuta wumelukimeluki-pfo, ma wamali wanu kiheri waiwuta wuṟuhui-pfo, kipfa, wasoṟo wawenyi nyiwo waioshana na wamelukiwo, na iwuta nawo shidaso kiidi kya miindie ya wumeluki. Wandu wa watuṟie wuṟango kya lohi wechirumara!

¹⁵ Kya lohi nyo Waisraeli mui wamelukimeluki! Kyaindi mulatewe wandu wa Yuda wawade mti! Ma mulahende handu haele ipfo Gilgali, manya mulahende kulya Beth-aweni. Manya mulalye nyamu mochihamba, Chandu Mndumii-Ruwa ai na moo!

¹⁶ Waisraeli wai walang'a cha nzoi. Nkili Mndumii-Ruwa echiwalisa, cha machondi patenyi ling'anyi lya maṟa?

¹⁷ Wandu wa Efraimu wamekupfunga na sanamu. Koikyo! Waleke waengeṟe ichumia chandu wakunda!

¹⁸ Wakamenyo mvinyo fufoi, wekekuombotsa wumelukinyi wo wamonyi; wakakundia ihutsio sonu kota iinengo kiṟumi.

¹⁹ Kyasia, wechidao nyi kiwiṟi, na wechiwona sonu kipfa kya wunyamaṟi wowo.