HOSEA 14 - Bibilia Kui Mdedie fo Kimochi

Ndaho ya Hosea ko Waisraeli

¹ Wandu wa Samaria nyi wechikapo ko ideko lyawo, kyamba nyi walelekana na Mndumii-Ruwa owo, nyi wechiwoho ko oshu, shiwana shawo nyi shechipoṟipotso, na waka wawo wakapikie nyi wechirandulio.

Iwuya na ko Mndumii na mchumie mhya

² “Lanye Waisraeli, wuyenyi na ko Mndumii-Ruwa, Ruwa onu;

³ Mterewenyi mhoṟie, mudumbuye mochihamba, ‘Uluhoṟie madeko hadu hose, keambia shiinengo shadu, naso nyi lochikuadapfuma ko mrima.’

⁴ Kyamba Ashuru yeidima ilukiṟapfo, lochiidima ikusiriase frasi tsa shida se pfo. Ambuya manya lochilahase shindo sho lushisungusie luwenyi ke nyi Ruwase pfo. Ipfo kopfo hoi Mndumii ngoeda tsekesaṟio.”

Mndumii-Ruwa awika kyasa kya ohendo luhya ko Israeli

⁵ Mndumii-Ruwa nyi ahamba, “Inyi njechisanja madeko hawo, njihende iwakundase ko ikunda lyako, kyamba njechiwasuo se pfo.

⁶ Nyi njihenda iwa cha ṟauṟa ko Waisraeli, nawo nyi wechihenda ioṟa cha yungiyungi, wawedosa mri cha meresi fo Lebanoni.

⁷ Maṟunda hawo hechioṟa na ilandaa, wucha wowo nyi wochiwa cha wo mizeituni, mpfaamo fowo nyi fochiwa cha fo shiwaṟo sha Lebanoni.

⁸ Ambuya nyi wakeri iwuya wakae wanda ya wuringi woko, nyi wechioṟa cha dema licha lya msabibu. Wewada kiṟumi cha mvinyo fo Lebanoni.

⁹ Lanye wandu wa Efraimu, Nyi kyaiki mukuwadase na sanamu? Inyi nyi njechiadanyia shiterewo shanu, inyi njikeri momuembeṟa, inyi nyi njemuwikia mṟinga cha mberoshi. Kunu koko nyipfo kundu mochiwona ndunda tsanu.

¹⁰ Ichu ose awode wuṟango namanye mbonyi tsi, mndu ai momanya namanye, kyamba nyi tsa Mndumii-Ruwa, nyi tsitsihoṟotsu wandu wa wasumuhanyi nyi wechitsiosha, kyaindi wanyamaṟi wechikapa ho mtulia.”