HOSEA 13 - Bibilia Kui Mdedie fo Kimochi

Mwanduye fo ifurumia fo Israeli

¹ Kiheri Waefraimu walededa, wandu nyi walededema; Waefraimu nyi wawewode pfinya ing'anyi mnu kiidi kya Israeli; kyaindi kiheri walewooka iindia Baali; wakakuendie opfu.

² Waefraimu wakaengeṟa ideko, wakasungusia sanamu tsa aṟeṟa, sanamu tsilesungusio ko mawoko hawo, tsilesungusio nyi Waaria wakahamba: “Aitsi, tsiindiyenyi.” Wasoṟo wakahekia momu ihache!

³ Kyasia, iwa nyi wechihenda ideka cha mtiima fo ngamenyi, chandu mlewi fokedeka owinyi, na chandu mawala hekedao nyi owira, alya hando waweelia, na cha mtsu fukeri iwuka bombenyi.

⁴ Mndumii-Ruwa nyi ahamba adi; “Inyi nyi Mndumii-Ruwa njii Ruwa onu, ambuya nyi njilewawuta kulya Misri, manya kuwode se ruwa ungi sile na inyi, manya kuwode se mndu echiidima iwakiṟapfo.

⁵ Nyi inyi njilemuembeṟa kiheri muwekeri kulya nuka, kiidi kya oruka lulya luwei nuka ya msanga.

⁶ Kyaindi kiheri mulelya mukaihuda, mukawoka ikudosa mukatana monjihadima.

⁷ Wulalu njihenda iwa cha miiso konu nyo mose, nyi njechiwaowelia njienyi cha rumu.

⁸ Njechiwarundukia cha ngaṟe yasoko maaleo hayo. Njechimuranduo shipeta sho shanu, njechimuliia oo oo cha miiso, njimuranduo na imudumbuo shiteng'eta cha indo lya ngeṟenyi.

⁹ “Njihenda imurumatsa nyo Waisraeli; Nyiu echimuikanyia?

¹⁰ Mangi onu nyi ku ahenda nache imukiṟa? Wanene walya wanu nyiku wai wamuringe? Nanyo muwenyi muleterewa mangi kundu namuchilie.

¹¹ Ngawemuinenga mangi ko nyashi, na kui nyashi yako ngamusoka.

¹² “Wuwicho wo Efraimu nyi wuipfo, na nyi wuwuṟehie, madeko hake nyi hamasuṟume kikumbinyi.

¹³ Mawawio cha ha iwoneka lya mana nyi hakeri imchea. Kyaindi o nyi akeri mana mtondo, kiheri kikashika kya ifeo lya mana, oo nekeleha iwuka wusunyi wo mae.

¹⁴ Ambuya njechikiṟa wandu wa wawuke ko waṟumu pfo, ma njechiwakiṟa kiidi kya opfupfo! Iyo opfu nyiku matuuro hapfo hakeri? Na ipfo ko waṟumu nyiku arisikio lyapfo likeri? Inyi njechiwasaṟia se pfo.

¹⁵ “Manya kokoya Efraimu awechioṟa se cha maṟa, inyi Mndumii-Ruwa njechiende otanu lo ora lo ngamenyi, otanu sa lochiidia ipfo nuka, na maṟungu ha mṟinga haumie, soka tsake natso tsiweumiṟia mṟinga, shioṟa shake shose sha wuhuru wung'anyi nyi shechidao.

¹⁶ Kikiwaṟi Samaria Wakoṟo yo kipfa kya injileha, Wandu wake wechipfia shidenyi; Wakoku wawo wechipfa; Waka wakapikie wechiranduyo ndeu tsawa.”