HOSEA 12 - Bibilia Kui Mdedie fo Kimochi

¹ Orio kindo wandu wa Israeli wawuta mfiri puti nyi sha wulya na sherumatsa. Wuṟiingi, wongo, wunesi na wuwahi wuiengeṟeka kiidi kyawo. Wawadana na Waashuru na ikapa mbucha na Wamisri.

² Mndumii-Ruwa nyi awode mondu na Yuda; ambuya nyi ahenda ikapa Yakobo sumuhana na madeko hawo, na iwataa sumhana na mawuto hawo.

³ Mandi Yakobo awei wusunyi wo mae nyi alewada kitsinano kya wawae. Kiheri aleng'ana kalimbana na Mndumii-Ruwa.

⁴ Kalimbana na malaika kambinga; Kafihiṟa mchenyeṟe katerewa nasaṟio, kulya Betheli nalekoyana na Mndumii-Ruwa, nao Mndumii-Ruwa kadeda nao.

⁵ Mndumii-Ruwa menyi matorito, Mndumii-Ruwa nyilyo rina lyake,

⁶ Wuyenyi ko Mndumii-Ruwa onu, kuwadenyi na ikunda na wukiilohi, muwekaa mkusirienyi ko Mndumii-Ruwa kiheri kyose.

Madedo hengi ha mwanduye

⁷ Efraimu nyi afananyi na mndu mokapa mbucha, ekeṟunda na kipimo kekelemba, kawelemba nakyo wandu.

⁸ Efraimu kahamba, “Inyi nyi njii msuṟi! Inyi njilekusuṟisha!” Kuwode wuwicho wo iwona kiira pfo, manya kudo ilyo chi idekopfo.

⁹ Mndumii-Ruwa nyi ahamba adi; “Inyi nyi Mndumii-Ruwa, njii Ruwa opfo; nyi inyi njilekuwuta kuwuka Misri! Inyi njikeri ihenda ikudamiṟase kiidi kya mahema cha mfiri ya kuwoka, chandu ukeri iwuta wulalu ko mfiri njiangu tupu, kiheri kya mfiri mnene ya shitengo.

¹⁰ Inyi njilededa na Waikimbi, nyi inyi njilewaloṟa ndodo tsifoi, koikyo kiidi kyawo njikeri ionguo kilya njikundi.

¹¹ Kulya Gileadi nyi handu ha wunyamaṟi, kulya Gilgali walewuta mapung'a ha shidaso, koikyo rasio tsawo nyi tsechiwa cha mbumbi tsa maho, kiidi kya mfongo ii mademenyi?

¹² “Yakobo naledichiya orukenyi lo Aramu, akeripfo kaṟunda kundu nawone mka, kalisa machondi kundu nawone mka.

¹³ Kui wuikimbi Mndumii-Ruwa nalewuta Waisraeli orukenyi lo Misri; na kui wuikimbi, Mndumii-Ruwa nalewaringa.

¹⁴ “Waefraimu nyi walewichuṟa Mndumii-Ruwa mnu, Koikyo Mndumii-Ruwa nechiwataa kya madeko hawo, nyi echiwakapa kya mawuto hawo walewuta.”