HOSEA 11 - Bibilia Kui Mdedie fo Kimochi

Ikunda lya Mndumii-Ruwa nyi lieṟie nyashi yake

¹ Kuwokia Israeli awei mana mtutu nyi njiwemkundi, kuwokia Misri nyi njilemlaha nyi mana oko.

² Kikawa chandu njileengeṟa iwalaha, na wudo nawo waleengeṟa injidicha; Wakaengeṟa iindia Baali na idutsia uvumba sanamu tsa maruwa hengi.

³ Nyi inyi njilelosha Efraimu ichumia, na inyi njimonyi njilewaduo mahinyi hako; kyaindi walemanya ke nyi inyi njiwewaembeṟa pfo.

⁴ Ambuya njilewasongoya ko shiwoho sha isaṟia, iyee, kui shiwoho sha ikunda, chandu mfee ekeira mana mṟasa kyerinyi kyake, nyiwudo na inyi njiwekeri kowo; Kii kidi ngahongoma na iwainenga kelya.

⁵ Kyasia, nyi wechiwuya na Misri; na mangi o Ashuru nechiwasongoya, kyamba nyi waleleha injiosha.

⁶ Oshu nyi luhenda isokia mṟinyi yawo, luwehenda ifunja funja mongo yawo, luwewarumatsa ipfo njomombonyi tsawo.

⁷ Ambuya wandu wako nyi walenjidicha, wakakukumba wusingenyi, manya kuwode mowaashuo pfo.

⁸ A nyi wuda njechiidima ikuda iyo Efraimu? A ngesa nyi wuda njechiidima ikukumba iyo Israeli? Ngesa njechiidima ikuhaluo cha mṟi fo Adma? Njechiidima ikuwutia cha mṟi fo Seboimu ? Mrima foko fokenjiima; isaṟia lyako likaengeṟa iwada mrike kiidi kyako.

⁹ Ambuya njikeri itirisiya, ambuya njihenda irumatsa se Efraimu pfo, kyamba inyi nyi Ruwa manya chi mndu o wandu pfo, njikeri mwele kiidi kyanu, koikyo njechicha inyamaṟapfo.

¹⁰ Ambuya wechicha injiosha inyi Mndumii-Ruwa, ili njechiringona cha miiso, kiheri kyo chechiringona nyi wechinjicheya wechichumia wawuka ora lo kyukanyi wechidedema.

¹¹ Wechicha wawuka Misri wechichumia cha shilehe, wechirunduka wawuka Ashuru cha mbeta, na inyi njechiwawihiṟa kanyi kowo, nyi inyi Mndumii-Ruwa ngahamba.

¹² Efraimu nanjiṟingichia ko madedo ha wongo, na mba ya Israeli ko wulembi; ma wulalu Yuda nakeri iangalala ko Ruwa, nao nyi akeri mwele, nao nyi mhendeli.