HAGAI 2 - Bibilia Kui Mdedie fo Kimochi

Wucha wo hekalu lihya

¹ Meri fo mfungade, meri makumi hawi na limu ya meri fo, idedo lya Mndumii likacha kui dumbu lya muikimbi Hagai, lyekamba,

² “Wulalu deda na Zerubabeli, mana o Shealitieli, mchili o Yuda na Yosua, mana o Yehosadaki, mkohanyi ang'anyi, na wandu watsuhee uhambe,

³ Kiidi kyanu nyiu atsuhee ho alewona kiṟumi kya mba i lilya mbooko? Na wulalu mwiwonyi kuda? Na iwaṟi chando mwiwonyi wulalu?

⁴ Indi wulalu kuwanze tse ukarie, Iyo Zerubabeli, Mndumii akuwia, na iyo Yosua wa mkahari mana o Yehosadaki, mkohanyi ang'anyi nanyo wandu wose wa oruka lu, Mndumii ahamba, muhende iṟunda kipfa inyi njii nanyo Mndumii menyi matorito ahamba;

⁵ Chando njilehamba lilya mulewuka Misri, na Mumuyo foko fukakaa huye yanu ma mulaowuo.

⁶ Kipfa Mndumii Menyi matorito nahamba adi, ‘Limu se kioweṟe sa kitutu, njechisingitsa ngina, na oruka, na ipalyipalyi na handu hahadutsu;

⁷ njesingitsa wandu wa mkambo yose na shindo shilya shishilange mnu nyi mkamboya wandu shechicha na inyi njilawuo kiṟumi kya mba-i, Mndumii Menyi matorito ahamba.

⁸ Fesa nyi tsako, na sahabu nyi yako Mndumii o matorito.

⁹ Kiṟumi kya ifurumia kya mbai kechiida Kiṟumi kilya kya mbooko na handu-ha mochiwona ofoṟo,’” Mndumii Menyi Matorito ahamba.

Wandu wose wafanyi ngafu

¹⁰ Meri makumi hawi na kaana, meri fo kenda maaka fo kawi fo mangi Dario, idedo lya Mndumii likacha kui dumbu lya muikimbi Hagai lyehamba,

¹¹ Mndumii menyi matorito, nahamba adi, Kewesenyi wakohanyi mbonyi tsa uwawaso ke,

¹² Mndu kaduo nyama njele ikakuwasha nao nguwonyi yake, kakushia na mkate ang'u ikato, ang'u mvinyo ang'u mafuda, ang'u kando kose, ngesa kindo kyo kechiwa kyele? Wakohanyi wakahaluo ote!

¹³ Nalyo Hagai kahamba, kokoya mndu echifana ngafu ili awada mnying'a kawada kindo kimuho kya ishi, ngesa kechiwa ngafu? Wakohanyi wakahamba, kechiwa ngafu.

¹⁴ Nahong'u Hagai kahamba, nyi wudo wandu wa oshari lu wai oshangunyi loko, Mndumii ahamba; na iṟunda lya mawoko hawo nawudo lyi, na orio kindo wechiwuta cha kidaso kifanyi ngafu.

Mndumii-Ruwa awikia kyasa kya ona

¹⁵ Wulalu ngamuterewa, kusaṟenyi necha; wokia mkonu iya yose ilemeida itane mkonufu fo inu; wokia lilya mandi iho lilandewiko huya lingi mbenyi ya Mndumii.

¹⁶ Maheri ho mndu aleshikia kiheo kya makumi hawi kuwewode ikumi tupu; na mndu kiheri aleshika hekamya mvinyo naambiṟe kiheo kya makumi hatanu, ate nyi makumi hawi tupu.

¹⁷ Njilemkapa na kwari na mu fung'anyi, na mtiima na mvuo ya maho, kiidi kya maṟunda hanu hose; indi mulenjihalukiapfo Mndumii ahamba.

¹⁸ Kusaṟenyi ngamuterewa wokia mkonu fu fo inu na mkonu yechiituma; wokia meri makumi hawi na nyanya meri fo kenda, ee, wokia mkonu lulewika otende lo hekalu lya Mndumii, kusaṟenyi isho.

¹⁹ Alewo na kuwode mbeu kikumbinyi? Ee, msabibu, manya ikidi lya ndunda lyose lilewikapfo, wokia wulalu mkonufu fo inu njechimuwikya ona.

Kyasa ko Zerubabeli

²⁰ Nahong'u idedo lya Mndumii likachea Hagai lya kawi mfiri fo makumi hawi na kaana fo meeri ke

²¹ Deda na Zerubabeli mchili o Yuda uhambe, Njechisingi-tsa ruwehu na oruka;

²² Njechipfuluo loṟika lo mangi na inyamaṟa pfinya tsa wamangi wa mkambo ya wandu; njechipfuluo makari, na iwo wadamye pfo, iwo wadamye huya frasi wechioloka wanda, orio mndu kwi oshu lo manomae.

²³ Kiidi kya mkonu fulya, Mndumii menyi matorito ahamba njechikuduo iyo Zerubabeli mṟundi oko, mana o Shealitieli Mndumii ahamba, na inyi njikuhaluo iyo ufanane na rachi injitsanyie ofano; kipfa ngakusambuṟa Mndumii menyi Matorito ahamba.