HAGAI 1 - Bibilia Kui Mdedie fo Kimochi

Ruwa awawasa hekalu liwiko ko uhya

¹ Maka fo kawi fo Mangi Dario meri fo kaṟandaṟu, meri limu, idedo lya Mudumii lilechea Zerubabeli, mana o Shealitieli, mchili o Yuda, na Yosua mana o Yehosadaki, mkohanyi ang'anyi kui dumbu lya miikimbi Hagai kehamba,

² Mndumii menyi Matorito nyi ahamba adi, ke wandu wa wekehamba, “Iha chi maheri hawaṟi icha pfo, iki chi kiheri kewika mba ya Mndumii pfo.

³ Idedo lya Mndumii likacha kui dumbu lya muikimbi Hagai kehamba,

⁴ Ngesa kiheri ki nkii kicha konu ikaa mbenyi tsanu njicha na mba yako ikae inyamaṟikye?

⁵ Mndumii menyi matorito nyi ahamba, achikienyi mahio hanu na muweteseheṟa ohendo lonu.

⁶ Ambuyenyi mulewaaya mbeu tsifoi mukasambuo kitutu; mkowelya manya mulaihude; mukanyo mulawute wuangari; mkaṟaa nguwo indi kuwode moicho mrikepfo; na icho moambia wueri kawika mfukonyi futochikyetochikye.

⁷ Mndumii menyi matorito nyi ahamba kusaṟenyi kya ohendo lonu.

⁸ Donyi na mtsudu, muhende imanya mashidi muwike mba, na inyi njichihiṟo nyiyo, njiichiko, Mndumii ahamba.

⁹ Muwelangye shifoi, ate mkawona shyangu; lilya muleende na kanyi ngashiwiwita. Nkipfa kya iki? Mndumii menyi matorito ahamba. Nyi kipfa kya mba yako ii ikeri inyamaṟika, nanyo mukadichya orio mndu kanyi koke.

¹⁰ Kipfa kyanu ngina ikaimo ilalekye ṟauṟa, na madema hakaimo halaṟae ndunda.

¹¹ Njechiende kuari na mbaṟi fung'anyi fucheye madema hose, na mafumvu, na mvinyo mhya, na mafuda, na orio kindo kii kunu shi, na huya wandu na shii na moo, na maṟunda hanu ha mawoko.”

Wandu waindia iwawaso lya Mndumii-Ruwa

¹² Nahong'u Zerubabeli, mana o Shealitieli, na Yosua, mana o Yehosadaki, mkohanyi ang'anyi hamu na iwo wawetsuhee, wakaindiya ṟu lya Mndumi Ruwa owo na madedo ha muikimbi Hagai, chando Mndumii-Ruwa owo awemdumye, wandu wakaowuo oshangunyi lo Mndumii.

¹³ Nahong'u Hagai mdume o Ruwa kiidi kya Mndumii kawia wandu, “Inyi njii nanyo,” Mndumii ahamba.

¹⁴ Nalyo Mndumii kaira mrima fo Zerubabeli, mana o Shealitieli, mchili o Yuda, na mrima fo Yosua, mana o Yehosadaki, mkohanyi ang'anyi, na mrima fo iwo wawetsuhee; wakahenda, wakaṟundya mba ya Mndumii menyi matorito, Ruwa owo;

¹⁵ meri makumi hawi na kaana, meri fo kaṟandaṟu maka fo kawi fo mangi Dario.