HABAKUKI 3 - Bibilia Kui Mdedie fo Kimochi

Kiterewo kya Habakuki

¹ Kiterewo kya muikimbi Habakuki.

² “Hoi Mndumii, ndeicho mbonyi tsapfo, na inyi ngaowuo; Hoi Mndumii, ṟutsa iṟunda lyapfo kiidi kya maka; Kiidi kya maka, onguo mbonyi tsake Kiidi kya nyashi kumbuo isaṟia.

³ Ruwa kacha awuka Temani, Icho ai mwele awuka fumvunyi lya Parani. Wuitoṟi woke wukashikia ruwehu, na oruka lukaichuo kiṟumi kyake.

⁴ Ngeela yake iwei cha sa; Nawewode mfi ya sa owarihu koke; Nyiho kuweikuṟike pfinya yake.

⁵ Kusonguo nyi mbe ndaṟe Na ngataṟa tsikamuosha.

⁶ Kahoṟoka, kadihinyitsa wuyana; Kaambuya, kaowesha wandu wa mkambo, Na mafumvu ha kacha hakarahanyika; Shitoṟomoso sha kacha shikahongoma; mhendie yake ikawa cha ya mboho.

⁷ Ndewona mahema ha Kushani wukiwenyi; Shitambaa shemasa sha oruka lo Midiani shikadedema.

⁸ Ngesa Mndumii nalesukiṟo nyi meda? Ngesa nyashi yapfo iwei huya meda, Ang'u ipalyipalyinyi, mṟasa kodo na frasi tsapfo, na magari hapfo ha shida kowona wuwinzi?

⁹ Madedo hapfo hakamanyika na pata Nyamu waleinengo wandu wa oshari lu tsikawa madedo mawanzi; Kohawa oruka na meda.

¹⁰ Mafumvu halekuwona, hakaowuo; mfu ikasoka; Njoṟoo tsa mapalyi palyi tsikaṟuṟuma, Tsikairia masinano huye.

¹¹ Mnengeṟi na meri shikakaa handu hasho, Shechiwona sa ya mfi yapfo yedicha mnu. Na ngeela ya pfumu lyapfo lyeaka-aka,

¹² Nyi kulehenda kiidi kya oruka kui nyashi, Kotuura wandu wa mkambo na nyashi.

¹³ Kowono kipfa kya okiṟo lo wandu wapfo, Kipfa kya okiṟo lo mesia opfo ulemshimbuo; Kopaṟa mdo fo mba ya wetahacha, Karumatsa nakamu walya waweimosha.

¹⁴ Kokapa mdo ya waapfinya kui maṟiinga hawo wawenyi; wakacha cha otanu sa lwapfinya kundu wanjirahanyitse; Kokoya wechechihiyo imeṟa wangoeda kui kiṟika.

¹⁵ Kochuma ipalyipalyi na frasi tsapfo, Kinungu kya mṟinga fuwode pfinya,

¹⁶ Ngaicho na ndeu yako ikadedema, Momu yako ikadedema kya ṟu lilya; Ndaṟe ikaida mafuonyi, Ngadedema mtara; Kundu njiwedie mkonu fulya fo kiwi, Ili siṟi ya wandu wa mbahanyi wechicha Ikapana.

¹⁷ Kipfa mkuyu fochiwaṟa shiwaṟo-pfo, Manya ndunda tsa msabibu tsechiwono-pfo; Wukiwa wo msinepfu wowa wo wulya, Kochiwono-se kilimu demenyi-pfo, Kuwode kindo mfiṟihenyi-pfo, Kuwode mbe tsewono mfiṟihenyi-pfo,

¹⁸ Indi njechichihiyo kipfa kya Mndumii, Njechiṟumisha Ruwa o okiṟo loko

¹⁹ Mndumii-Ruwa, ai Mndumii, nyi pfinya tsako. O nyi akarishie madende hako cha ha sumbuda, Nyi echinjiduo tete handu hake ha huye.”