HABAKUKI 2 - Bibilia Kui Mdedie fo Kimochi

¹ Inyi njechihoṟoka kiheri kya kamba lyako, njechikaa huye kitonyohu njiambuye ikyo echinjiwia, na chando njehaluo kiidi kya ieṟeṟa lyako.

Ruwa nahaluo Habakuki

² Mndumii kanjihaluo, kahamba, “Ṟehia ndodo ii iwe pata iṟehie ihohu, kundu mosoma naisome cha mṟinga.

³ Ndodo ii nyi ya kiheri kiteseheṟe, ikambiṟa mtsitsionyi foyo manya yechihamba wongopfo; ma ikakeleo, iwede, kipfa na kikaki na iche ilechikeleo.

⁴ Ambuya ngoo yekudosa yechisaramaya; indi mndu mhoṟotsu nyi echikaa awode moo foidikia Mndumii.”

Wanyamaṟi wechisaramaya

⁵ Ee hamu na isho mvinyo fokelemba, mndu o orikiki elekekaa kanyi koke nekeengeṟa lango tsake cha ko wapfu, nakeri cha opfu, echiwa iihutsapfo; o nekesanyia wandu na njoshari tsa wandu kui mhanda.

⁶ Ngesa, iwa wose wechiwuta ofano koke, na iwoka ikumba shisunguṟu wehamba, “Ochia lo ulya moengeṟa masaa halai hake! Mṟasa indii? Na ochia mokudika mhanda fo kilacha.”

⁷ Ngesa wechikure walya wekumaada wechikure walya wekulisa wukiwa, iyo nowe mowado shidenyi?

⁸ Nowode wafoi kulewada shidenyi, walya watsuhee wechikuduo iyo; kipfa kya samu tsa wandu kipfa kya wukika wulewutika kiidi kya isanga li na mṟi fu na wandu wose waleepfo.

⁹ “Ochia nyi lo ulya ekesanyia masaa kui wuwicho kundu nawike sungu yake huye, nakuletse na owoko luwicho.

¹⁰ Iyo nyi uleṟundia mba yapfo shindo sha wusutsu kochiwaha wandu na idetsa moo fopfo.

¹¹ Ambuya iho lyechifuha omombonyi na mriti fochihaluo mashidinyi.

¹² “Ochia nyi lo ulya echiwika mṟi kui samu, ekewika mṟi ing'anyi na wukika.

¹³ Ambuyenyi, mbonyi iwukye ko Ruwa menyi matorito; ke wandu watambahanyie modo, na wandu wa mkambo wakuwinyishe kya wulya?

¹⁴ Kipfa wuyana wochiichuṟo wulaanyi wo wuitoṟi wo Mndumii chando mṟinga foichuo ipalyipalyinyi.

¹⁵ “Ochia nyi lo mndu ulya echinanza manomae, kawikapfo wuṟoi wukamnanza kundu nawone kitaṟe kyake.

¹⁶ Noichuo sonu handu ha kiṟumi iyo nofanane na walawadine; kirahu kya owoko lo kulyo lo Mndumii kihalutse nokiambie, na sonu ing'anyi yechicha huyapfo na huye ya kiṟumi kyapfo.

¹⁷ Kipfa wunyamaṟi wulewutyo Lebanoni wochikuhalukia, na irumatso lya mando hai na moo kochikuendie wuowu; kipfa kya samu ya wandu na wunyamaṟi wulewutyo isanga li, na wandu wose wakeripfo.

¹⁸ “Sanamu tsengusia nyi kiki tsaidima, ma ulya aleisungusia? Sanamu yesalaṟa, ii mlosha o wongo kiki yaidima manya ulya alesalaṟa itane awikaho kikusirio kyake na iwikapfo sanamu tsiladeda?

¹⁹ Ochia nyi lo ulya echiwia ikidi kure; na iwia iho henda! Ngesa kindoki kechidimailosha? Ambuya kikishikie na sahabu na fesa, ma kuwode moo pfo.

²⁰ Indi Mndumii nai hekalunyi lyake yele; wuyana wose wutsie sau oshangunyi loke.”