HABAKUKI 1 - Bibilia Kui Mdedie fo Kimochi

¹ Otambahaluo mwikimbi Habakuki aleluwona.

Mwikimbi nakeri inunuwa

² “Hoi Mndumii njifihiṟe itane indii iyo ulakunde iicho? Njikufihiṟia kipfa kya wukika, ulakunde ikiṟa?

³ Nkili unjiloṟa wuwicho, na injiolongia wuminyi? Kifa inyamaṟa na wukika shii oshangunyi loko; kuwode shiloyo na marekiano.

⁴ Kipfa kya ikyo wuwawaso wuwode pfinya pfo; manya mwanduye fuwonopfo; kipfa wandu wawicho waiṟinjawia walya wecha, ko ikyo mwanduye fukawono fuifulemetse.”

Ruwa ahaluo

⁵ “Ambuyenyi nyo mui kiidi kya wandu ambuyenyi, mṟihiyo mnu; kipfa inyi njechiwuta ṟiho mulechiliidika ma mukaongoyo.

⁶ Kipfa ambuyenyi njechiamtsa Wakalidayo wandu wa isanga walya walang'a wekehenda owinyi mnu; wekeida kiidi kya wandu kundu waitoṟie handu halai kowo.

⁷ Iwo nyi wandu waoweshiie mnu, iowesha lyawo na mwanduye yawo, na wunene wowo wuwukiye kiidi kyawo wawenyi

⁸ Frasi tsawo tsinjiangu kota rumu, nyi tsilang'a kota shisii sha kiukanyi, wenyi frasi wekekudosa ke frasi tsawo tsiichi irunduka cha mbeṟo yeshiha kelya.

⁹ Wose wecha kundu wawute mkika; shaamu shawo shiembeṟutse cha otanu lo ora lo ngamenyi, nawo wekesanyia wapfungo wa shida cha msanga.

¹⁰ Ee wanduwo weketaluo wamangi, na wanene kowo nyi kindo kepiṟo; wekemina omombo; kipfa wekeluhaluo kiluli na iduo oruka lo lukawa lowo.

¹¹ Indi ambuya nechideka cha otanu ichu ahaluye pfinya tsake nyi ruwa oke.”

Habakuki nanunuwase

¹² “Hoi Mndumii, Ruwa oko mwele iyo chi o mlungana? Ulekepfa. Iyo nyi Ruwa oko na mringi oko; Ee, nyi iyo ulesambuṟa Wakaldayo kowainenga pfinya kundu walukape;

¹³ Iyo uwode meso mecha ulechiambuya wuwicho, iyo ulechiambuya wupiṟi nkili ukeri iambuya wewuta mtambo na ikutsia sau, ili mndu mbicho awonyia menyi wusumhanyi kota o;

¹⁴ na itana wandu cha makunga ha ipalyipalyinyi, cha shindo sheafuo shilawode mchili?

¹⁵ O nekewawutapfo na sumi yedeha makunga na mdeho fo ndusu njioke maṟawushi na iwasanyia mkunjenyi foke, kikainenga kachihiyo na ikesa.

¹⁶ Ko ikyo kawuta kyaano kainenga mdeho fo ndusu na opfaamo lo rasionyi kapfaamiṟa mkunja kipfa kya shindo shake shafo na kelya kikaichuo.

¹⁷ Ngesa nechiwuta walya wai mdehonyi fo ndusu njioke maṟawushi nade alawaaha wandu wa mkambo kitsitsi?”