FILEMONYI 1 - Bibilia Kui Mdedie fo Kimochi

¹ Inyi Paulo njii-mpfunge kya Kristo Yesu, so na Timoteo manowama lokuiṟikiṟa iyo Filemonyi mkunde ui mṟundi kimu naso.

² Lokuiṟikiṟa na iyo Apifia ui mshiki lowekuiṟikiṟa na Arikipo mondaṟo odu, hamu na siṟi iya ikeri ya mba yapfo.

³ Wutonga wukae nanyo na ofoṟo shiwukie ko Ruwa Ndeyadu na Mndumii Yesu Kristo.

Ikunda na mwidikie fo Filemonyi

⁴ Njikeri iana Ruwa oko mandi hose njekukumbuo iyo Filemonyi shiterewonyi shako.

⁵ Ili ngaicho kya ikunda lyapfo ko wandu wose wa Ruwa na kya wuidiki uwode wo iwadana na Mndumii Yesu.

⁶ Ngaterewa kundu mawadano ha wuidiki wopfo hawe hechiṟunda heitsa wuṟangonyi woimanya orio kicha kyose kii nanyo kyeṟundya Kristo.

⁷ Kyamba njiwewodo mnu nyi sia na iwihiṟyo moo kipfa kya ikunda lyapfo uleloṟa wandu walya wa Ruwa iyo manowama!

Paulo aiterewia Onesmo

⁸ Koikyo ma chandu njiwode ukari kiidi kya Kristo wo ikuwawasa iwuta kilya kikuwari, nyi kinjichihiṟye mnu.

⁹ Kye njikuterewe kimaduma kya ikunda inyi Paulo njii meku wulalu na mfunge o Kristo Yesu.

¹⁰ Ili njii njido ngakuterewa kya Onesmo (Mchihiri) mana chu oko njilemfee njii kipfungonyi.

¹¹ Nao nyio Onesmo ulya ili kuwoka alawekuchihiṟie, indi wulalu ai mchihiṟi opfo na oko, achihiṟye necha.

¹² Nyio amonyi ngamkuwihiṟya wulalu, nao kimu cha ngoo yako iinjenyi.

¹³ Njiwekundi nakae na inyi kundu nanjipfuṟukanye handu hapfo ili njiimfunge na mshe kimaduma kya Ndumi ya Sia ya okiio.

¹⁴ Indi njilekunda iwuta kindopfo chila onnenga momu, kundu iki kicha kyapfo kilawe cha kya mkoṟomu kya indi kiwe kui mweke fo ikunda. Njilakundi ikuitikya untarame.

¹⁵ Kyamba ili alewuka kopfo lya oweṟe kulako nyi kilemwutika kundu umbade se nakae na iyo mlungana.

¹⁶ Alakeri-se cha isinga, kya indi nawe cha kota isinga, nyi manowama odu mkunde. Kanjiwia kiira king'anyi mnu ado inyi; kopfo iyo nechikuwiia mcha ngoseṟa cha isinga kui mbihu na kui Mndumii-hu.

¹⁷ Kyasia kokoya unjiwode njii mokyando opfo kye-mwambye-wo cha ili nyio inyi.

¹⁸ Indi kokoya alekudetsya kindo ang'u nyi sile alelya kopfo, ikyo unjiitalie inyi.

¹⁹ Inyi Paulo ngamṟehia iki kui owoko loko. Inyi Paulo njechikitaa, (ipfo kundo njekiṟa ihamba, italenyi lyapfo, kipfa na iyo kumonyi ui mosile oko.)

²⁰ Ee manowama oko, kyekunjiwutia kudo kui rina lya Mndumii. Kewihiṟya-wo ngoo yako moo ui manowama kui Kristo.

²¹ Ngamṟehya njido njikusirie na wuadanyi wopfo njichi nyi ochiwuta king'anye ishi ngakuterewa.

²² Handu hamu na isho njiteseherya kiṟiha mbenyi ya wahenu, kyamba njikusirie icha na konu. Kui shiterewo shanu cha ili Ruwa kakunda njechicha imuiṟikiṟa.

Shiiṟikiṟo shefurumia

²³ Kwipfo wakuiṟikiṟa, nyi Epafra ichu ai mpfunge na inyi kya Kristo Yesu.

²⁴ Na woko Marko, na Aristariko, na Demasi na Luka, wakyando wako wakuiṟikiṟa.

²⁵ Wutonga wo Mndumii odu Yesu Kristo wukae na Mumuyo fonu.