EZRA 9 - Bibilia Kui Mdedie fo Kimochi

Ezra amanya chando Wasraeli walealikana na walya walawei Waisraeli

¹ Shindosho shamemarisika, wanene walya wakacha na koko wakanjiwia Waisraeli na wakohanyi wawo na Walewi, walemekuletsane na wandu wa wa oruka lu wai wewuta mawicho pfo; Waamoni, Wamoabu, Wamisri, Wakaanani, Wahiti, Waperizi, Wayebusi na Waamori.

² Cha kipfa nyi walealika wanawawo wa kika na ialikia wana wawo wa kisoṟo waka wa kihenu. Koikyo wandu wa waele wa Ruwa odu nyi walesangana na wandu wa mbaṟi njihenu. Kindo kiwicho ngoseṟa nyi wanene wa Waisraeli nyiwo wasongoru wewuta mawichoho.

³ Kiheri njilemaa iadanyia madedoho, ngaranduo nguo tsako na ikoti, ngawetufuo njui na ngerero tsako, ngadamia wanda terinyi njimsokie nyi fowa ing'anyi.

⁴ Kyaindi wandu walya waleicho mbonyi tsilya tsa wusutsu tsilewuto nyi wandu walya walewuya wusingenyi, wakacha ikuṟingichia na inyi alya wanda njiwedamie ko fowa ing'anyi itane kiheri kilya kewuta kidaso.

⁵ Lilya mandi saa ya kyukanyi ileshika yehenda iwika kidaso, ngakure alya wanda kundu njiwekuwihitsie, ngaweṟaa nguwo tsako tsirandukie, naiiria mawoko hako ko Mndumii-Ruwa oko njipfirie ndi ngamterewa njechihamba,

⁶ “Hoi Mndumii-Ruwa njiwodo nyi sonu tsing'anyi iiria mdo foko oshangunyi lopfo. Nyi kipfa njonyamaṟo tsadu tsikuumbie tsikaika huye ya mdo yadu, natso nyi tsidoye tsikaida ipfo ruwehu.

⁷ Cha kipfa lulekunyamaṟia kuwokia waku walya wadu mṟasa inu, koikyo kipfa kya madeko hadu so, wamangi wadu, na wakohanyi wadu luledambikio mawokonyi ha wamangi wahenu, lukawoho, lukapfungo, lukaiwio, na isutso wusutsu mṟasa inu kudi.

⁸ Kyaindi wulalu Mndumii-Ruwa odu ameluloṟa mkundie foke so lui waangu, kaweluinenga ikaa na ofoṟo iya handu haihaele. Koikyo Ruwa odu kaluwuta usinga kaweluinenga sia na moo mhya.

⁹ Ma chandu luwei masinga, Ruwa odu alekunda iluda luengeṟe iwa masingapfo. Kyaindi naleluloṟa ikunda lyake kodu oshangunyi lo wamangi walya wa Persia iwa walelulekia lukacha iwika mba i ya Ruwa odu na iachikia kulyando iwewundukie. Lukaowewona oringo loke iya Yuda na Yerusalemu.”

¹⁰ “A wulalu, luhambeki Ruwa odu kya ishi shose, kyamba luletehia mawawaso hapfo.

¹¹ Mawawaso ha uwewawasie waṟundi wapfo wai waikimbi wechihamba: ‘Oruka lu muida napfo kundu luwe kioṟa kyanu nyi oruka lufanyitse ngafu ko mawuto mawicho ha wandu wo waleepfo. Nyi luichuo ngafu tsing'anyi tsa iwo waleepfo.

¹² Kuṟisenying'u, mulaalikie wana wanu wa kika ko wana wawo, ma ialikia wana wawo wa kika ko wana wanu. Ma mlapfule ofoṟo ang'u wusuṟi wowo; kudo nyi kundu wuwade pfinya na ikulia mawucha ha oruka lo, lyefurumia muhende ideya wana wanu luwe kyoṟa kyawo.’

¹³ Ma chando shindo sho shose shileluhoya kipfa kya njonyamaṟo tsadu na mkao yadu njiwicho, luwonyi nalelukapa sa kitutu koṟinganyisha na mawicho ha hadu chandu hawefoi. Koweludase na moo so waangu lukeri iya.

¹⁴ Ngesa lutehie se iwawaso lyo lyapfo luhende ialikanase na wandu wa wawutie mawicho cha iha aka chilochikusuiṟa, na iyo ulumarise kulechideoho ma mndu umu ma echiidima idicha?

¹⁵ Hoi Mndumii-Ruwa o Israeli, nyi iyo kumonyi ui mhoṟotsu indi koluashuo lukakaa na moo mṟasa inu. Kyeambuyawo, ke so nyi lui wadeko oshangunyi lopfo ma kuwode umu odu echiidima ihoṟoka oo oshangunyi lopfo pfo.”