EZRA 8 - Bibilia Kui Mdedie fo Kimochi

Wandu walewuya wawuka wusingenyi wo Babeli

¹ Iwa nyiwo wandu walewuya wawuka wusingenyi wo Babeli kiheri kya wumangi wo Artashasta,

² Gershomu o kishari kya Finehasi, Danieli o kishari kya Ithamari. Hatushi o kishari kya Dawidi,

³ awei mana o Shekania, Zekaria o kishari kya Paroshi, kimu na wasoṟo ihana limu na makumi hatanu (150) wa kishari kyake wai waṟehiye hamu nao.

⁴ Eliehoenai, mana o Zerahia, o kishari kya Pahath-Moabu, hamu na wasoṟo mahana hawi (200).

⁵ Shekania, mana o Yahazieli o kishari kya Zatu hamu na wasoṟo mahana haṟaṟu (300).

⁶ Ebedi, mana o Yonatani, o kishari kya Adini, hamu na wasoṟo makumi hatanu (50).

⁷ Yeshaya, mana o Athaha o kishari kya Elamu, hamu na wasoṟo makumi mfungade (70).

⁸ Zebadia, mana o Mikaeli o kishari kya Shefatia, hamu na wasoṟo makumi nyanya (80).

⁹ Obadia mana o Yehieli, o kishari kya Yoabu, hamu na wasoṟo mahana hawi na ikumi na nyanya (218).

¹⁰ Shelemothi, mana o Yosifia o kishari kya Bani hamu nao wa kisoṟo ihana na makumi haṟandaṟu (160).

¹¹ Zekaria, mana o Bebai o kishari kya Babei, hamu nao wasoṟo makumi hawi na nyanya (28).

¹² Yohanani, mana o Hakatani, o kishari kya Azgadi hamu nao wasoṟo ihana limu na ikumi (110).

¹³ Elifeleti, Yeueli na Shemaya, wa kishari kya Adonikamu hamu na wasoṟo makumi haṟandaṟu (60).

¹⁴ Uthai na Zakuri, wa kishari kya Bigwai hamu na wasoṟo makumi mfungade (70).

Ezra ashiha Walewi ko iṟunda lya mba iya ya Ruwa

¹⁵ Njilesanyia wandu wose mbai ya meda fusokie na mṟi folaho nyi Ahava. Lukaakaa kiṟaṟonyi handu ha mfiri iṟaṟu. Ngaambuya wandu wose hamu na wakohanyi kyaindi njilewonaho mana o ko Lewi pfo.

¹⁶ Nalyo ngalaha wasongoru kenda, nawo nyi Eliezeri, Arieli, Shemaya, Elnathani, Yaribu, Elinathani, Nathani, Zekaria na Meshulamu, hamu na walosha wawi: Yoyaribu na Elnathani.

¹⁷ Ngawaduma ko Ido awei mnene o wandu kulya Kasifia, ngamterewa o na wodoe walya wekeṟunda kulya hekalunyi walushihie wandu weṟunda ipfo mba ya Ruwa.

¹⁸ Kui osaṟio lo Ruwa wakaluendie Sherebia, Mlewi awewode wuṟango wung'anyi o kishari kya Mahli hamu na wana wake na wana wa mae ikumi na nyanya (18).

¹⁹ Wakaweluendie Hashabia na Yesaya, wa kishari kya Merari, hamu na wana wa mae makumi hawi (20).

²⁰ Handu hamu na iwo kuwewode se waṟundi wa hekalu mahana hawi na makumi hawi (220) wawewasambuṟe nyi mangi Dawidi wawe watarami wa Walewi. Marina ha wanduwa wose hawemaṟehiye.

Wandu waterewa na ikuotoya

²¹ Ngawawasa lukuotoye alya medenyi fo Ahara, lochikunyiiṟa oshangunyi lo Ruwa lochimterewa naluringe na ilusongoya kiidi kya kyaṟo kyadu hamu na wana wadu na masaa hadu.

²² Cha kipfa njilewado nyi sonu yeterewa manya waaskari weluringa wakituwa wacha ipfo kyaṟonyi kyadu, kyamba ngiwemesonguo immbia ke Ruwa nekewikia mboṟa iwo wose wekemuosha, na nyashi yake ikeri huya ya iwo wose wakeri kuleshe nao.

²³ Ko kipfa kyaikyo lukakuotoya na iterewa Ruwa naluringe, nao kaluadanyia.

Shinengo sha nga sha hekalu

²⁴ Njilesambuṟa wakohanyi ikumi na wawi kiidi kya wakohanyi wang'anyi, nawo nyi wo iwa; Sherebia, Hashabia, hamu na wodoyawo ikumi.

²⁵ Iwa ngawahawia ko mizani shindo shilya sha fesa na, sahabu sa mangi hamu na wanene wengi wa Waisraeli wawewutie kipfa kya waṟundi alya hekalunyi.

²⁶ Njilewahawia aṟeṟa fesa tsa wuhuru wo talanta mahana haṟandaṟu na makumi hatanu (650), na shindo sha aṟeṟa sha wuhuṟu wo talanta ihana limu (100), na sahabu iwode wuhuru wo talanta ihana (100).

²⁷ Mboṟiko makumi hawi, wulemeri wo kilo (8), na shitela shiwi sha shindo sha aṟeṟa njicha sha wuhuru wushikie wulya wo sahabu.

²⁸ Koikyo ngawawia, nyo mui waele na shindo shi shii shiele da, koikyo fesa i na sahabu nyi shiinengo, shileinengio Mndumii-Ruwa odu na o waku wadu.

²⁹ Shiringenyi na ishiambuya necha itane ili mochishihesha oshangunyi lo wakuhanyi wanene, Walevi, na wanene wa shishari wa Israeli ipfo Yerusalemu shiṟihenyi sha mba yo ya Mndumii-Ruwa.

³⁰ Koikyo wakohanyi na Walewi waambie fesa na sahabu yo mowahawia hamu na shindosho mowainenga, washiduo ipfo mṟinyi fo Yerusalemu na ishiwika ipfo hekalunyi lya Ruwa odu.

Iwuya na Yerusalemu

³¹ Kushikie mfiri fo ikumi na kawi fo meri fo kuwoka lukawuka alya medenyi fo Ahava lukahenda Yerusalemu. Ruwa odu kaluringa na wakituwa wadu na ndenga tsose tsa ipfo njienyi.

³² Lomshika Yerusalemu lukasiamoo handu ha mfiri iṟaṟu.

³³ Nalyo mfiri fo kana lukaida na kulya hekalunyi lukahesha fesa iya na sahabu hamu na shihia shilya na ishidambikia mkohanyi elaho nyi Meremothi ai mana o Uria. Nawei hamu na Eliazari, mana o Finehasi, kimu nawo nyi Walewi wawi welaho nyi Yozabadi ai mana o Yeshua na Noadia ai mana o Binui.

³⁴ Nalyo shindosho shekimariso italo na ipimo, shikaweṟehio alya alya.

³⁵ Kiheri kilya walya wose walewuya wusingenyi nyi waleinengia Ruwa o Israeli shidaso shawo shemaya modonyi, mapung'a ikumi na hawi (12) kipfa kya Waisraeli wose, masuwa makumi kenda na haṟandaṟu (96), machondi (mahuṟuwi) makumi mfungade na mfungade (77), na mburu ikumi na tsiwi (12) kidaso kewuta wunyamaṟi.

³⁶ Wakawewainengia maṟeho halya mangi aweṟehie ko wachili na wanene walya wose wa kulya ora lo kyukanyi lo meda fo Eufrate, na wanene walya wakawatarama wandu hamu na irundi lya hekalu lilya.