EZRA 7 - Bibilia Kui Mdedie fo Kimochi

Ezra ado na Yerusalemu

¹ Numa ya ishi kiheri kya mangi Artashasta mangi o Uajemi, kuwewode mndu umu elaho rina lyake nyi Ezra, mana o Seraya, mana o Hilkia,

² mana o Shalumu, mana o Sadoki, mana o Ahitubu,

³ mana o Amaria, mana o Azaria, mana o Merayothi,

⁴ mana o Zerahia, mana o Uzi, mana o Buki,

⁵ mana o Abishua, mana o Finehasi, mana o Eleazari, mana o Aroni mkohanyi ang'anyi.

⁶ Ezra naledo awuka Babiloni. Nawei mlosha (mṟehi) mcha o mawawaso ha Mose halya Mndumii-Ruwa aweinengie Waisraeli; na mangi ulya kainenga Ezra orio kindo alemterewa kipfa kuwoko ko Mndumii-Ruwa oke luwei nao.

⁷ Maka fo mfungade fo wumangi wo Artashasta, Ezra nalepfunga kyaṟo awuka Babiloni kado na Yerusalemu hamu na Waisraeli maata, na wakohanyi maata hamu na Walewi, waimbi na waringi, na waṟundi wa kulya hekalunyi.

⁸ Waleshika kulya Yerusalemu mfiri fo kuwoka fo meri fo katanu fo maka fo mfungade fo wumangi wo Artashasta.

⁹ Mndumii-Ruwa kawasongoya kiidi kya kyaṟo kedo na Yerusalemu.

¹⁰ Ezra nawekundi kui mrima foke ikulosha mawawaso ha Ruwa, na ihaindia na ilosha Waisraeli mawawaso ha na wuhendeli woho.

Paruo iwukie ko Mangi Artashasta

¹¹ Ilu nyi ofano lo paruo Mangi Artashasta aleinenga Ezra mkohanyi, mlaanyi o shitapu, mndu awekuloshie mawawaso ha Mndumii-Ruwa awewawasie Waisraeli.

¹² Iwukie ko Artashasta mangi o wamangi, ko Ezra mkohanyi, na mlosha o mawawaso ha Mndumii-Ruwa o ruwehu ainengie Waisraeli.

¹³ Nyi ngawawasale, orio Mwisraeli oose ang'u wakohanyi ang'u Walewi wai kunu wumanginyi woko akundi o amonyi ihenda Yerusalemu, nyi awode momu fohenda hamu na iyo.

¹⁴ Inyi hamu na wameku wako mfungade nyi lokuduma uhende iṟisa ṟisa ipfo Yuda na Yerusalemu uwone kokoya mawawaso ha Mndumii-Ruwa opfo akuinengie nyi haiosho chandu kiwaṟi.

¹⁵ Uweduo hamu na iyo fesa na sahabu lotsiwuta inyi na wameku wako ko mrima fulamwitike ko Ruwa chu o Waisraeli ichu hekalu lyake likeri ipfo Yerusalemu.

¹⁶ Uweduo fesa na sahabu yose oidima isanyia kunu orukenyi lo Babeli, na shidaso sha ikunda shiwukie ko wandu na wakohanyi ko iṟundiya mba ya Mndumii-Ruwa owo ipfo Yerusalemu.

¹⁷ Fesa i nowute nayo necha ko wuṟahari wung'anyi uhuṟe mapung'a, masuwa, shidahina sha machondi na shidaso sha mso na mvinyo, uhende shiwuta ipfo rasionyi lya Mndumii-Ruwa onu ipfo Yerusalemu.

¹⁸ Fesa na Sahabu yechitsuhaa, iyo na wana wa mayo wutenyi nayo chandu mowona ke nyi kechichihiṟa Ruwa

¹⁹ Shindoshi shose odambikio kipfa kya iṟunda lya mba ya Ruwa opfo, ushiwute oshangunyi lo Ruwa ipfo Yerusalemu.

²⁰ Kokoya kokundika kindo kingi kya iṟunda lya mba yo ya Ruwa nochiidima ikiinengo kiwuka ipfo kisenyi kya mangi.

²¹ “Na inyi mangi Artashasta ngawawasa ko weambuya fesa wose wa oruka lo ora lo kyukanyi lo meda fo Eufrate kindo kyose echikikunda Ezra mlosha o mawawaso ha Ruwa chu o ruwehu mumnenge kulawode itaṟi.

²² Fesa akunda tsishikie shilo shiku shiṟaṟu na mahana hana (3,400), Ngano kilo shiku ikumi (10,000) mvinyo lita shiku shiwi (2,000), mafuda lita shiku shiwi (2,000), monyo mnengenyi kiheo kyose akundi.

²³ Orio kindo kyose kikiwawase nyi Ruwa chu o ruwehu, kiwuto necha kipfa kya mba yake. Kundu nyashi yake ilaolokie wumangi wu woko ang'u wana wako.

²⁴ Lukaeri imwikimbia se mulawese okamba lose ko Wakohanyi, Walewi, Waimbi waringi wa mongo ang'u waṟundi wengi wose wa mba i ya Ruwa.

²⁵ Na iyo Ezra, kyamba uwode wuṟango wo Ruwa mawokonyi hapfo, sambuṟa wachili na wedumbuo mondu wesongoya wandu wose wakeri ora lo kyukanyi lo meda fo Eufrate, walya wekeosha mawawaso ha Ruwa chu opfo, na walya walaichi mawawaso ho, muwaloshe.

²⁶ Mnduchu oose elechiindia mawawaso ho ha Ruwa chu opfo ang'u iwawaso lya mangi oo naanduyo mondu nawewonyio owingo lo opfu, isamiṟo, isoko masaa hake hose ang'u ipfungo.”

Ezra aṟumisha Mndumii

²⁷ Mndumii naṟumisho, Ruwa chu o waku wadu, ichu aleinenga mangi mrima foichopa mba ya Ruwa kulya Yerusalemu.

²⁸ Na kui osaṟio lo Ruwa ngawewona ngaya yake oshangunyi lo mangi, njama tsake, na waṟundi wake wanene, ngawewona pfinya kipfa owoko lo Ruwa luwei huyako, ngaweidima isambuṟa wandu wasongoru wa Israeli kundu njiwuye nawo kulya Yerusalemu.