EZRA 6 - Bibilia Kui Mdedie fo Kimochi

Iwawaso lya Koreshi lyawono

¹ Mangi Dario kawuta iwawaso ke maṟeho ha wumangi wo Babeli haambuyo.

² Nahong'u mṟeho fuwekeri ipfo mṟinyi fo Ekbatana oruka lo Media fukawono nafo fuwefuṟehiye madedo ha:-

³ Maka fo kuwoka fo wumangi wo Koreshi, mangi Koreshi nalewawasa hekalu lilya lya Yerusalemu liwikose ko wuhya alyando shidaso shekewutio. Lyiwiko necha alyandu lilya lya kuwoka liwei liwike. Wulandari wolyo wuwe meta makumi hawi na mfungade na ido huye liwe meta makumi hawi na mfungade.

⁴ Omombo lo mbayo lochiwa lo mbau, ido huye ngamba tsiṟaṟu tsa maho hang'anyi. Wuhuru wo shindoshi wochitao ifo kisenyi kya mangi.

⁵ Shindo shilya shose sha sahabu na fesa shilya mangi Nebukadneza aweshiwutie kulya mba ya Ruwa ya Yerusalemu kashiende na kunu Babeli shihende iwihiṟio kulya hekalunyi lya Yerusalemu na orio kindo kiwihiṟio alyando kiwekekaa.

Mangi Dario awawasa iṟunda liengeṟe iṟundo

⁶ Mangi Dario kawahaluo kahamba; “Iyo Tatenai, mchili o ora lo kyukanyi lo Eufrate, Shethar-Bozenai, na wodoyanu wanene, kaenyi kuleshe na hekalulyo.

⁷ Ma mlakuwashe ang'u iima iṟundalyo lyewika hekalu, lekenyi mchili cho o Yuda na wanene wo wa Wayuda wawike mba yo ya Ruwa alya hando iwei kuwoka.

⁸ Kindo njimuwawasa nyi iwaikanyia weri wo shindoshi mutae ko okamba lo mokesanyia ifo ora lo kyukanyi lo meda fo Eufrate kundu iṟunda lyo lilakeleo.

⁹ Orio mkonu muinenge wakohanyi wo wa Yerusalemu shindo shose wechihamba; mmbe, machondi, shihuṟuwi, ko shidaso shemaya modonyi ko Mndumii-Ruwa na Ngano, monyo, mvinyo, na mafuda, mamlatiṟe iwainenga.

¹⁰ Mochiwuta mudi kundu waidime iwuta shidaso shi ko Mndumii-Ruwa, wechinjiterewia inyi hamu na wana wako.

¹¹ Nyi ngawawasase ke orio mndu echiwumbuya iwawaso-li natochio omambo lu, luwute ipfo kiidi kya mriti fo mba yake nairio huye na mba yake iwe nyi handu hewihitsa mbosha.

¹² Na Mndumii-Ruwachu alesambuṟa mṟi fo Yerusalemu fuwe handu hake heindiyo nechiolotsa mangi na wumangi wo wose wochikuiria inyamaṟa hekalu li lyake lya Yerusalemu. Ni inyi Dario ngawuta iwawasolyi nalyo liwaṟi iindiyo.”

Hekalu lyashimbuyo

¹³ Tatenai ulya awei mchili o kulya mbelya meda na Shethar-bozenai, na wanene wodoyawo wakaawutsia wuwawaso wulya wuwewukie ko Mangi Dario.

¹⁴ Wanene wa Waisraeli wakaidima iwika mba iya ya Ruwa wechitaramo nyi waikimbi Hagai na Zekaria. Hekalu likamarisika chandu Mndumii-Ruwa awewawasie na chando wamangi walya wa Uajemi, Koreshi, Dario, Artashashta walewawasa.

¹⁵ Mmba iya ilemarisika mfiri fo kaṟaṟu fo meri fo Adari maka fo kaṟandaṟu fo wumangi wo Dario.

¹⁶ Na wana wa Israeli, Wakohanyi, Walewi na walya wose walewuka wusingenyi wakashimbuo hekalu lilya wawodo nyi msiha fung'anyi mnu.

¹⁷ Wakashimbuo hekalu lilya wechiwuta mwano yawo wakawuta mapung'a ha mmbe ihana limu (100), masuwa mahana hawi (200), na machondi mahana hana (400) ko shidaso, na mburu ikumi na tsiwi ko shidaso sha wunyamaṟi, wo Waisraeli wose ko itala lya shishari shawo.

¹⁸ Na wudo walewewika wakohanyi na Walewi ko iṟunda lyawo kulya hekalunyi chandu Mose aweṟehiye ifo kitapunyi kyake.

Pasaka

¹⁹ Walya walewuya wusingenyi, meri fo kuwoka fushikie mfiri fo ikumi na kana wakaindia Pasaka.

²⁰ Wakohanyi na Walewi walewoka ikusanja wose wakawa waele necha mnu wakashinja ichondi lya Pasaka ko kipfa kya wandu walya wose walewuya wusingenyi na kipfa kya wakohanyi wodoyawo na ko kipfa kyawo wawenyi.

²¹ Waisraeli wose walewuya wusingenyi nyi walelya Pasaka i hamu na wandu walya wose waleawishana na Waisraeli iindia Mndumii chu ai Ruwa o Waisraeli.

²² Ko mfiri mfungade walelya wai wakesi mkate ilawenjilonge na kindo ketarang'aa kipfa Mndumii-Ruwa nyio alewainenga sia i ili mandi alewainenga mangi i ya Uajemi alewakunda katana awatarama iwikase mba i ya Ruwa o Waisraeli.