EZRA 5 - Bibilia Kui Mdedie fo Kimochi

¹ Kiheri kyo wakahoṟokaho waikimbi wawi, Haggai na Zekaria mana o Ido, wakawuta wuikimbi kui rina lya Mndumii-Ruwa o wana wa Israeli, wechiongoya wandu walya wawei kulya Yuda na Yerusalemu.

² Zerubabeli mana o Shaeltieli hamu na Yeshua mana o Jehozadaki wekiicho ṟu lyo wakawokase iwika hekalu lilya alya Yerusalemu na wechiikanyio nyi waikimbi walya.

³ Kiheri kikaida Tatenai mchili o ora lo kyukanyi lo meda fo Eufrate, Shelthar-bozenai, wakacha Yerusalemu hamu na wanene wengi wakawesa, “Nyiu alemuinenga momu fo wika hekalu li na imarisia omombo lu.”

⁴ Wakawekunda imanya marina ha walya wose wawewaikanyia iṟunda li.

⁵ Kyaindi riso lya Mndumii-Ruwa liwei huya ya wanene wa Wayuda kikatewa mchili ulya hamu na wodoe walawawie wade iṟunda lilya piu mṟasa waicho iwawaso liwuka ko mangi Dario.

⁶ Kyasia Tatenai mwitoṟi o ora lo kyukanyi lo Eufrate, Shethar-bozenai na wodoe wakaṟehia paruo ko mangi Dario.

⁷ Ii nyi paruo waledikia mangi yawo Dario. Ko mangi Dario ofoṟo lukae na iyo.

⁸ Lukaundi ikumanyisha mangi, ke lulehenda kulya orukenyi lo Yuda, kulya kuwode mba ya Ruwa ang'anyi. Lukaaida kulya mṟinyi lukokoya hekalu lilya lya Mndumii-Ruwa lilewikose ko wuhya. Lilewiko na maho hang'anyi na mriti ing'anyi injiwike ipfo omombohu loke. Iṟundalyi lilewuto ko wurahari wung'anyi mnu.

⁹ Nalyo lukawesa wanene walya nyiu alewainenga momu fowikase hekalu lilya ko wuhya na iwika omombo tsilya kudo.

¹⁰ Lulewewawesa marina hawo kundu luidime ikuwia nyi waki waisongoya iṟunda lyi.

¹¹ “Nawo wakaluhaluo kudi: “So nyi waṟundi wa Mndumii-Ruwa o ruwehu na oruka, lukeri iwika mba i ko wuhya iweinjiwike maka ifoi ilesia na mangi aweng'anyi o Waisraeli, nyio aleiwika na iimarisia.

¹² Indi wafee wadu wakasuiṟa Mndumii-Ruwa chu o ruwehu na oruka kawada wakawiko mawokonyi ha Nebukadneza mangi o Babeli, Mkalidayo, ichu nyio alewunduo hekalu li na iwaduo wusingenyi wo Babeli.”

Hekalu lyashimbuyo

¹³ “Kyaindi maka fo kuwoka fo wumangi wo Koreshi mangi o Babeli, nyio alewuta momu fowikase hekalu li ko wuhya.

¹⁴ Kawewihiṟa shindo shilya sha sahabu na fesa shilya mangi Nebukadneza awewutie kulya hekalunyi lya Yerusalemu kashiwika hekalunyi lya Babeli. Shindoshi kashiwihiṟa kui owoko lo Sheshbaza ulya awemsambuṟie nawe mchili o Yuda.

¹⁵ Koikyo mangi nalembia nawihiṟe shindoshi kulya hekalunyi lya Yerusalemu na iliwikase ko wuhya alyando liwei kuwoka.

¹⁶ Koikyo mchili ulya Sheshbaza kacha iwoka otende lo hekalu na iṟundali wawodanyi nalyo mṟasa inu - kyaindi lyamemarisikie pfo.”

¹⁷ So luweterewa mbonyi tsi tsisoṟo ipfo mṟehonyi ya wamangi wa Babeli kundu kimanyike ke na lohi mangi Koreshi alewawasa ke hekalu li lya Yerusalemu liwikose ko wuhya. Na iyo mangi nuluwie nohambaki kya iṟundalyi.