EZRA 4 - Bibilia Kui Mdedie fo Kimochi

Iṟunda lyewika Hekalu Yerusalemu lyaṟiingio

¹ Wakituwa wa Yuda na Benyamini wekiicho ke walya walewuya wusingenyi walewoka iwika wuhya hekalu lilya lya Mndumii-Ruwa o Waisraeli,

² wakachea Zerubabeli na wanene walya wa shishari wakawawia, “Hoi lomuterewa mulutarame iwika hekalu lyo, cha kipfa maso nyi lokeindia Ruwacho mokemwindia nyo na imwendie shidaso shadu wokia kiheri kya Esar-hadoni awei mangi o Ashuru ichu sa aleluende iya.”

³ Zerubabeli, Yeshua na wanene walya wa shishari wakawahaluo, “Lukaundi mulatarame iwikia Mndumii chu ai Ruwa odu mba-pfo! Lochiwika so luwenyi chando Mangi Koreshi o Uajemi aleluwawasa.”

⁴ Koikyo wandu walya wawelee kulya orukenyi wakawoka iwasohuo mondu nai wafafaṟa kundu walemo iwika hekalu lilya.

⁵ Wakawewaṟiingia ko wanene wa wumangi wulya wo Uajemi kundu walemo wokia mangi Koreshi mṟasa kiheri kya Dario.

Walya waleṟiingia iwikose lya Yerusalemu

⁶ Kiheri Ahasuero alewada wumangi, wakituwa walya wakakuiria wakaṟehia paruo owinyi yenunuwa kya wandu walya wawei Yuda na Yerusalemu.

⁷ Na kiheri kya wumangi wo Artashasta o Uajemi, Bishlamu, Mithredathi, Tabeeli na mbuya tsawo waleṟehia mangi paruo ko mṟehie fo Ki-aramu na itambahaluo.

⁸ Mwitoṟi Rehumu na Shimshai, mṟehi o kihongo, wakaṟehia mbonyi tsa Yerusalemu ko mangi Artashasta tsiwehambie:

⁹ “Kuwuka ko mwitoṟi Rehumu, na Shimshai mṟehi o kihongo na walya wawelunganyi naso na wachili, na wanene walya wose wawukie Ereki, Babuloni na Susa kiidi kya oruka lo Elamu,

¹⁰ hamu na wandu wa mkambo ingi walya wawewasamiṟe na mangi mnene Asur-banipali, alewawuta njorukenyi tsawo kawasamiṟia kunu mṟinyi fo Samaria na molyolya fo meda ora lo kyukanyi

¹¹ Baruo yo iwehambie le: ‘Ko Mangi Artashasta, so waṟundi wapfo luwukie molyolya fo meda Eufrate, lukudikia kiṟikiṟo.

¹² Luwekundi mangi numanye ke Wayuda walya walecha na iya wawuka njorukenyi tsingi tsa wumangi wopfo walesamia iya Yerusalemu walewika ko wuhya mṟi fulya mtahachi na mnyamaṟi. Walewoka iwika njomombo tsa mṟi fu na wulalu nyi imarisia njotende wai.

¹³ Mangi mwafinya mṟi fu fukawiko se ko wuhya na njomombo tsafo tsikasia wandu wechitaase okamba, ma kodi pfo, na masaa hapfo hechinyia.

¹⁴ Kyaindi kyambaso lui wahendeli wapfo mangi lulakundi iwona ishi shewutika kopfo, kochifunjo wuindi, nkyo kitewe lowona lukuwie koikyo luwehamba le wai:

¹⁵ Hamba maṟeho ha walya wawekusongoye haambuyo. Kowuta kudo nochiwona ke mṟi fu fuwewode waṟiingi wokia kacha, na wokia kacha fuleinenga wamangi na wachili kipfulupfulu king'anyi, wandu wa mṟifu wawekewa ihoṟokiapfo. Ikyo nyi kyo kiletewa mṟifu fukarumatso.

¹⁶ Koikyo lukuwia mangi, kokoya mṟi fu fomarisika iwiko ko wuhya na njomombo tso tsafo tsikamarisia iwiko, iyo mangi ochiidimase ihoṟokia ora lo kyukanyi lo Eufrate pfo.’”

¹⁷ Mangi kahaluo paruo iya echihamba, “Ko Ruhemu mchili na Shimshai, mṟehi na walya wose wa ipfo Samaria na molyolya fo meda Eufrate.

¹⁸ Baruo iya mulenjidikia njilesomio na imanya kilya kiwekiṟehie pfo.

¹⁹ Njilewawasa wasoṟe mbonyi tsa mṟi fu na kikawonekana ke mṟi fo Yerusalemu fuweichuo waṟingi weṟingia, wamangi ngoseṟa fuweichuo wandu wa ngaruo na wesohuo mondu.

²⁰ Mṟi fu fuwehoṟokie nyi wamangi waapfinya hamu na oruka lose lo molyolya ya meda Eufrate, wawekusanyia okamba na fesa tsingi.

²¹ Koikyo wawasenyi walya wawika mṟifo wade mṟasa mandi njewuta se iwawaso lingi.

²² Wutenyi mudi faṟa njilashike idetsa shifoi.

²³ Kyasia Rehumu, Shimshai na wodoyawo wamemaa isoma paruo iya iwewukie ko mangi Artashasta, wakado na Yerusalemu na iwawasa Wayuda watsitse (wade) faṟa iṟunda lilya lyewika ko wuhya mṟi fulya fo Yerusalemu.

Iwiko lya Hekalu lyawoka se

²⁴ Koikyo iṟunda lyewika mba iya ya Ruwa liletirima handu ha maka iwi ya wumangi wo Dario, mangi o Uajemi.