EZRA 3 - Bibilia Kui Mdedie fo Kimochi

Rasio lyasungusio, na maṟunda hesungusiase hekalu hawoka Wuindi wowokase

¹ Meri mfungade yamsia wokia walewuya wusingenyi, Waisraeli wawemmaa isamia mṟinyi yawo, wakakusanza handu hamu kulya Yerusalemu.

² Yeshua mana o Yehozadaki hamu na wakohanyi wodoe, na Zerubabeli mana o Sheltieli hamu na wana wa mae, wakawika ko wuhya rasio lya Ruwa o Waisraeli kundu waidimese idasa shidaso shemaya modonyi chandu Mose mndu o Ruwa awewawasie.

³ Ma chandu wandu walya wawelee kulya orukenyi walewaowesha walya walewuya wusingenyi wo Babeli walewika rasio lilya alyando lilya lya kuwoka liweliwike. Wakawokase idasa shidaso shawo shekoṟa modonyi ngamenyi na kyukanyi.

⁴ Wakawoka iindia mfiri iya mnene ya matengo chando waweichiwie, na ikoṟa shidaso shawo sha orio mkonu chando waweichiwie.

⁵ Ngoseṟa ya isho wakawikase shidaso shemaya modonyi sha orio mfiri na shilya sheambia meri hamu na shilya shekewuto ili wakoyana iindia Mndumii, hamu na shidaso shilya mndu umu umu awekeinenga Ruwa alamwitike.

⁶ Ma chando walawemewoke iwika otende lo hekalu lilya, walewoka ikoṟa shidaso shemaya modonyi mawookionyi ha meri fo mfungade wokia wawuka wusingenyi.

Iwika lya kawi Hekalu lyawoka

⁷ Waleinenga waaria wepaṟa mbau na walya wewika mba fesa hamu na wandu wa Tiro na Sidoni shelya na shenyo na mafuda kundu wailache na mashidi halya ha meresi iwukie Lebanoni iidie kulya Yopa. Ishi shose nyi kui iwawaso lya Koreshi mangi ya Uajemi.

⁸ Iṟunda lyewika hekalu lilya lya Yerusalemu lilewoka meri fo kawi wokia wawuka wusingenyi. Zerubabeli, Yeshua, na wana wa wamayawo, wakohanyi na Walewi na walya wose walewuka wusingenyi walewoka iṟunda. Wakawika Walewi waweshitsie maka makumi hawi na ngoseṟa wahoṟokie iṟunda li lyewika hekalu li ko wuhya.

⁹ Yeshua hamu na wana wake, na wana wa mae, na Kadmieli hamu na wana wake, na wana wa Yuda, wakalungana ihoṟokia iwika hekalu lilya ko wuhya.

¹⁰ Lilyamandi walewoka iwika otende lulya lo hekalu, wakohanyi waleṟaa maṟao hawo warie na tarumbeta tsawo na wana wa Lewi walya wa oshari lo Asafu wakahoṟoka na matoasi hawo. Wakaṟumisha Mndumii-Ruwa, chando Mangi Dawidi o Israeli awawasie.

¹¹ Wakaimba shiimbo sheṟumisha Mndumii-Ruwa, wechiwuya wuya, “Mndumii nyi akeri mcha na ikunda lyake ko Waisraeli nyi lya mlungana.” Wandu wose wakairia maṟu hawo huye wechiṟumisha Mndumii-Ruwa kipfa otende lulya lo hekalu lulewoka iwiko.

¹² Wakohanyi walya waku na wana wa Lewi, na wanene wa shishari walya walewona hekalu lilya lya kuwoka, kiheri walewona otende lulya lo hekalu li lya kawi lochiwiko walefihiṟa ko ṟu ling'anyi indi wandu wengi walefihiṟa kipfa kya sia.

¹³ Kuwode mndu aleidima imanya kilio kilya nyi kya sia ang'u nyi kya wukiwa pfo, cha kipfa kitohiyo kilya kiweng'anyi mnu. Kikaichiyo kuleshe mnu.