EZRA 1 - Bibilia Kui Mdedie fo Kimochi

Wayuda wawuya na kanyi kuwuka wusamiṟonyi

¹ Maka fo kuwoka fo wumangi wo Koreshi awei mangi o Waajemi, Mndumii-Ruwa naleawutsia kilya awededie kui dumbu lya mwikimbi oke Yeremia. Nyi alewawasa Koreshi nakape ombe kiidi kya wumangi woke wose, na ombe lu luwehambie le (kui maṟeho).

² “Ilyi nyi iwawaso lya mangi Koreshi mangi o Uajemi, Mndumii-Ruwa o ipfo Ruwehu, nyio alenjiwika inyi njiwe mangi o wuyanawu wose, kawenjinengase iṟunda lyemmbikia hekalu lyake kulya Yerusalemu ya Wayuda.

³ Mndumii-Ruwa nakae hamu nanyo mose nyo mui wandu wake. Nyi kimbaṟi nyo mutsuhee se wuhenunyi mui wandu wake muhende Yerusalemu, muhende iwika wuhya Hekalu lya Mndumii-Ruwa o Waisraeli, Ruwa nekeindiyo kulya Yerusalemu.

⁴ Koikyo mndu oose Myuda akeri wusingenyi akundi iwuya nataramo iwuya na walya wai kufui nao nataramo kui fesa, na sahabu, shichoṟe shingi, na shuma na shidaso shemayo modonyi shehenda idasa kulya hekalunyi lya Yerusalemu.”

⁵ Wakakurepfo wanene wa shishari wa mbari ya Yuda na Benyamini, Wakohanyi na Walewi na walya wose sa Mndumii-Ruwa alewasumba mumuyo fo henda iwikase hekalu lilya lya Yerusalemu.

⁶ Walya wawei mṟasenyi nawo wakawaengeṟia pfinya ko shinengo shawo cha fesa, sahabu, masaa hengi, shuma, na shindo sha wuhuru wung'anyi na shidaso shemaya modonyi sha kulya hekalunyi.

⁷ Mangi Koreshi kawawihiṟia shindo shilya mangi Nebukadneza awewutie kulya hekalunyi lya Mndunii Ruwa lya Yerusalemu na ishiwika kulya mahekalunyi ha maruwa hengi.

⁸ Shindoshi mangi Koreshi naleshiinengia kui owoko lo Mithredathi moambia masaa koke, nao kashiitalia oshangunyi ko Sheshbaza, mwitoṟi o Wayuda.

⁹ Shindo shose shiwei shidi: mboṟiko tsa sahabu makumi haṟaṟu (30), mboṟiko tsa fesa kiku kimu (1,000), shoshu makumi hawi na kenda (29).

¹⁰ Mboṟiko ntutu tsa sahabu makumi haṟaṟu (30), mboṟiko ntutu tsa fesa mahana hana na ikumi (410), shindo shingi sha mbaṟi tsingi kiku kimu (1,000).

¹¹ Shindo shi shose shiweshikie shiku shitanu na mahana hana (5,400). Ishi shose mnene ulya o Wayuda naledo nasho hamu na walya walewuka wusingenyi wo Babeli mṟasa kulya Yerusalemu.