EZEKIELI 9 - Bibilia Kui Mdedie fo Kimochi

Ngapo ya Yerusalemu

¹ Nalyo Mndumii-Ruwa kalaha ko ṟu ling'anyi madunyi hako kechihamba, “Nchonyi hafui nyo wehoṟokia mṟifu, orio umu nache na shisha shake mawokonyi.”

² Naho kukacha wandu waṟandaṟu wawuka ora lo huye lo hekalu lilya na orio umu nawerie kisha kyake mawokonyi hake. Kiidi kyawo wawerianyi na mndu umu awerie nguwo ya kimamile sa njiili peṟu, ipfo owokonyi nawerie kindo keṟehiya. Wose wakaida na mba wakahoṟoka alya oshangunyi lo rasionyi lilisungusie ko aṟeṟa.

³ Nalyo ngeela ya Mndumii-Ruwa o Israeli ikado huye, iwuka huye ya kiwumbe kiwode makungo cha ikerubi na ido huye mṟasa owangonyi lo mba iya ya Ruwa. Ikakuloṟa alya mongonyi foida na kulya hekalunyi; nalyo kalaha mndu ulya aweṟee nguwo njiili arie kindo kilya kyeṟehia mawokonyi hake.

⁴ Nalyo Mndumii kambia, “Ncho uhende iida ipfo kiidi kya mṟi fu fo Yerusalemu, uṟehiye kitanyio oshangunyi lo orio mndu amsokie nyi fowa kipfa kya mawicho ha haiwutika kiidi kya mṟi fu.”

⁵ Na walya wengi kawawia, “Oshenyi numa ya icho aiṟehia muhende ikapa orio mndu mulawone mochida ma umu manya mulaloṟe isaṟia lyose.

⁶ Mochiwaha orio mndu, wameku, wasoṟo, wanake na wana watutu.” Kyaindi manya mlapaye ulya amtisiṟe ipfo oshangu loke. Iṟunda lihende iwoka iya hekalunyi, “Nawo wakawewoka na waṟundi wameku walya wawekeri oshangunyi lo hekalu.”

⁷ Kawawia, “Fanyitsenyi hekalu li mochiliichuṟa mnying'a ya iwo mochiwawaha. Kurenyi, muhende.” Nawo wakahenda ikapa wose kiidi kya mṟi fulya.

⁸ Kiherikyo waweikapa, ngadeo njimonyi, nalyo ngakuolotsa wanda na kyamu ngafihiṟa, “Hoi Mndumii-Ruwa nukerihenda irumatsa wana wa Israeli wose waledeo kiheri ki nyashi yapfo isokia mṟi fu fo Yerusalemu?”

⁹ Nao Mndumii-Ruwa kanjihaluo, “Wunyamaṟi wo mba i ya Israeli na Yuda nyi wung'anyi mnu. Orukalu luichuo wuwahi na mṟi fu fuichuo iwonyia, nawo nyi wekehamba, ‘Mndumii nalelukumba nao ekewonasepfo.’

¹⁰ Kyaindi inyi njewaichio wukiwa ma iwasaṟiapfo, njechiwataa kya isho shose walewuta.”

¹¹ Nalyo msoṟo ulya aweṟee nguo njiili awerie na kindo keṟehia kitsinyi kawuya kahamba, “Iṟunda lilya ulenjiduma ngalimarisa.”