EZEKIELI 8 - Bibilia Kui Mdedie fo Kimochi

Wuindi wo maruwa hengi mṟinyi fo Yerusalemu

¹ Kyasia meri fo kaṟandaṟu, mkonu fo katanu, maka fo kaṟandaṟu, njiwedamie kanyi koko hamu na wanene wa Yuda. Nalyo ngeela ya Mndumii ikanjichea.

² Nalyo ngawona kindo kiwei cha ofano lo mndu kunu wanda kukawa cha modo fuiaka na huye kukaakaaka cha menya ya aṟeṟa injisanje.

³ Nalyo mnduchu kalesha owoko loke kawada njui tsako kanjiiria huye kiidi kya ruwehu na wuyana, na hong'u kanjiwia kui ndodo ya Mndumii-Ruwa; kawenjirundutsa itane Yerusalemu hando ha mongo fulya foida na rasionyi lya Mndumii alya hando ofano lo Ruwa lulawekewa isanzo na kindo kingi.

⁴ Handu ho wuitoṟi wo Mndumii-Ruwa wukakuloṟaho cha wulyase njilewuwona kulya pichinyi.

⁵ Nalyo Mndumii-Ruwa kanjiwia, “Ambuya ora lo huye ngaweiria meso ora lo huye mongo fulya fuhalukie ora lulya lo terewia.” Nalyo ngawona sanamu iya iwesuiṟie Mndumii-Ruwa.

⁶ Kawuya kanjiwiase, “Iyo mndu, uwonyi shindo shi shishiwicho wana wa Israeli wa keri iwuta shikatana shanjiinenga ngakukaya kuleshe na handu ha hako hai haele. Kemekutsie nuwonase mawicho hawose hafoi hang'anyi kota iha.”

⁷ Kyasia kanjiduo alya mongonyi foida na ipfo hekalunyi, kanjiloṟa handu kuwewode mruma alya omombonyi.

⁸ Nalyo kanjiwia, “Iyo mndu suma suma oo omombonyi nalyo ngawetocha tochaho kudi ngakoya kuwewode mongo.

⁹ Mndumii kanjiwia ida napfo uambuye mawichoho wakeri ihawutiaho.”

¹⁰ Kiheri njileida napfo ngawona ofano lo mando hai na moo hamaṟehie ipfo omombonyi na sanamu tsa shindo shilya wana wa Israeli wawekerishiindia.

¹¹ Wanene makumi mfungade wa wana wa Israeli wawehoṟoki oo kiidi nawo wawerie shisoṟo shilya shewuta shidaso sha opfaamo hamu na Yazania mana o Yoshafani. Koikyo mringo fo shindo shilya shepfaamiṟa na mtsu fosho fukado na huye mnu.

¹² Nalyong'u Mndumii kanjilaha kanjiwia, “Iyo mndu uwonyi shindoshi wanene wa Israeli wakeri ishiwutia ipfo meemenyi ko kiṟika? Orio umu owo nakeri iindia sanamu ipfo kiṟihenyi kikudikie shindosho nawo wakeri ieduo wehamba Mndumii aluwonyipfo, Mndumii naleluwihitsa.”

¹³ Nalyo kanjiwuyase kenjiwia, nyiochiengeṟa iwona mawicho hengi hang'anyi wakeri ihenda ihawuta.

¹⁴ Nao kanjiduose ora lo huye alya mongonyi foida na hekalunyi. Alya lukakoyaho waka wakeri ifihiṟa ke ruwa owo Tamuzi ke napfa.

¹⁵ Nalyo kanjiwia se, “Nulemewona kindo kya mbaṟii na nukeri ihenda iwona shing'anyi kota ishi.”

¹⁶ Nao kanjiduo makidi hawi ha hekalu lilya lya Mndumii kufui na rasionyi. Ambuya kuwehoṟokiho wasoṟo makumi hawi na watanu (25) wakakumbia rasio lilya mhongo, wakaambuya ora lo ngamenyi wechiindia mnengeṟi.

¹⁷ Mndumii kanjiwesa, “Ngesa Iyo mndu uwonyi mawicho ha wana wa Yuda wakeri injiwutia? Ngesa nuwonyi nyi kindo kitutu iki? Wakeri iichuṟa Orukalu na wuminyi wakatana wanjipfulutsa nyashi? Ambuya nyi wawika iṟamba lya iṟa mbuonyi tsawo.

¹⁸ Ko kipfa kya ikyo, nyashi yako yechiwasokia, manya riso lyako lyechiwaliliapfo, manya njechiwasaṟia pfo ma kokoya wechicha ifihiṟia madunyi hako, njechiwaadanyiapfo.”