EZEKIELI 7 - Bibilia Kui Mdedie fo Kimochi

Mtsitsionyi fo Israeli fui hafui

¹ Idedo lya Mndumii likanjichea,

² “Iyo mndu, Mndumii nahamba ko oruka lu lo Israeli; ifu nyi mtsitsionyi, nyi mtsitsionyi fo njora tsose tsina tsa oruka lu lo Israeli.

³ Mtsitsionyi fu nyi fokuhoya, kipfa nyashi yako yechikuhoya, ambuya njechikuanduya sumhana na mawuto hapfo na njechikuwuwuya sumhana na wuwicho wopfo wose.

⁴ Ambuya njechikudapfo, manya ikuwonyia wukiwapfo, nyi kipfa njihenda ikukapa kya mawicho hose hakeri kiidi kyapfo, na nyilyo mandi mochimanya ke inyi nyi Mndumii.

⁵ Ambuya Mndumii-Ruwa nyi ahamba, ngapo huye ya ngapo ikeri ikucheya.

⁶ Mtsitsionyi nyi focha, mtsitsionyi nyi foshika. Ambuya nyi huye yapfo nyi focha.

⁷ Mtsitsionyi nyi foshika konu nyo wandu wa kunu orukenyi, kiheri nyi kishikie, na mfiri fukeri afui. Mfiri fo fowa fulawode, mwanya fo keseka oshangunyi lo sanamu.

⁸ Ambuya mfiri ya kufui njechikusotsia nyashi yako ing'anyi, njiweawutsia nyashi yako huye yapfo, na ikuanduya sumuhana na mawuto hapfo, na ikukapa njiwekukapa sumuhana na wuwicho wopfo wose.

⁹ Ambuya riso lyako lyechikukiṟapfo manya njechikusaṟia pfo, njechikukapa sumuhana na njia tsapfo kyamba wuwicho wopfo wukeri kiidi kyapfo. Nahong'u mumanye ke inyi nyi Mndumii na njekekapa (njekewuwuya wanyamaṟi).

¹⁰ “Ambuya mfiri fo fuicha! Irumatso lyanu lyameawukia. Wunesi wudunganyi orio handu na orikiki womeoṟa.

¹¹ Iwonyia lyamewa ndichi ya wuwicho, kuwode manya mndu umu echiashuka kiidi kyawopfo ma o mbaṟi yawopfo. Manya kuwode kindo kechiichiko kya ipfo wusuṟinyi wowopfo, manya kochiwonekanase iṟumisho kiidi kyawopfo.

¹² Kiheri kyamshika na mfiri yametikiria. Ichu aihuṟa manya alachihio, ma ichu aikumba alasokio nyi fowa, kipfa ngapo iya ichea wandu wose.

¹³ Ichu mokapa mbucha echiidima iwihiṟa kilya amkumbapfo kiheri kyose ai na moo. Na wudo nyashi ya Ruwa yechisokia wandu wose manya yechiidima iwuyasepfo. Koikyo kipfa kya wuwicho wowo kuwode manya umu echikiapfo.

¹⁴ “Wakapa ombe na iachikia orio kindo, kyaindi kuwode sa aikure nahende shidenyipfo, kyamba nyashi ya Mndumii ikeri ihoya wandu wose.

¹⁵ Shida ikeri ipfo nja, na ndaṟe na njaa shikeri kya mba. Ulya akeri nja nechiwoho na oshu, na ulya akeri kulya mṟinyi ichu nechipfa ko ndaṟe na njaa.

¹⁶ Walya wechidicha, wechikaa huye ya mafumvu cha mbeta tsa mapichinyi, nawo wechisumukia mrima nyi orio umu kipfa kya wunyamaṟi woke.

¹⁷ Mawoko hawo hose hechifafaa na ndi tso tsawo tsechilehela cha mṟinga.

¹⁸ Nawo nyi wechiṟaa maṟao ha makunyia, na iwodo nyi wuowu wung'anyi. Wechikapo sonu njoshangunyi tsawo, na mdo yawo yechiila njohaa pang'a.

¹⁹ Ambuya nyi wechiwihitsa pesa tsawo na sahabu ipfo njiehu, wechitsiwona cha mambuṟo. Cha kipfa fesa yo na sahabu tsechiidima iwaashuo na nyashi ya Mndumii pfo; manya tsechiidima iwaihutsasepfo kipfa fesa yo na sahabu nyitso tsilewatewa wakehenda itahachia Mndumii.

²⁰ Ambuya chando walekuṟumisha na ikudosa, wechisungusia sanamu na maho halya hekuchopa. Inyi njechishihaluo mai oshangunyi lowo.

²¹ Mndumii nechiinengia wandu wahenu wusuṟi wo wonu, nawo wahende ifanyitsa handu ha.

²² Mndumii nahamba ke nechiwada wahende ifanyitsa hekalu lyake, kyamba waiwi wechiida na ipfo hekalunyi lyake wawehenda ilifanyitsa.

²³ Ambuya chando konyamaṟika, kyamba oruka lu nyi luichuo wawahi na mṟifu fukaweichuo iwonyia liṟatsie,

²⁴ ambuya njechiende wandu wahenu wai wawicho, nawo nyi wechioṟa mba tso tsanu, na alya handu haele moketerewia nyi wechifanyitsa ho. Ikudosa dosa konu njechifuṟunja na alya handu haele nyi wechifanyitsaho.

²⁵ Ili mandi mawawio hang'anyi hechicha, nyi wechihenda ipfula ofoṟo kyaindi wechiwuwonapfo.

²⁶ Ambuya chandu ndenga tsilelungana; na mbonyi njiwicho na wudo tsilelungana. Wakawehenda ipfula wuikimbi ko mwikimbi, kyaindi wakohonyi wa kawuṟa wuwawaso wo wainenga na wameku na wudo wakawuṟa chila yewainenga.

²⁷ Koikyo mangi nyi echifihiṟa, na manomangi nawuṟe mkusirie, wandu wose wechidedema na iowuo, kyamba njechimukapa kya mawicho hanu hose muwewutie. Njiwehenda imwanduya chandu muleanduya wodoyanu. Ikyo kihende imuinenga imanya ke Inyi nyi Mndumii-Ruwa.”