EZEKIELI 6 - Bibilia Kui Mdedie fo Kimochi

Walya weindia maruwa ha wongo waanduyo

¹ Nalyo idedo lya Mndumii likanjichea lyechihamba,

² “Halukia wana wo wa Israeli nuwaongoye wuikimbi wu woko.

³ Ongoya iwo wose walee ipfo mafuvuhu ha Israeli na iwo wakeri ipfo mapichinyi na mamsaṟihu nowawie waadanyie idedo lya Mndumii-Ruwa owo chando ahamba ke nyi echidika oshu lochinyamaṟa ipfo kundo wekeindia maruwa hengi ipfo kundu kukuirie wekedasia maruwa hengi.

⁴ Njechinyamaṟa shitaṟa sho shedasia, na ifunjafunja shitaṟa sho shekoṟia ubani. Na wandu wo wechiwarumatsa oshangunyi lo sanamu tso tsawo.

⁵ Ambuya njechiṟambatsa mnying'a ya wana wo wa Israeli oshangunyi lo sanamu tso tsawo na mafuo hawo hechitengetia shitaṟa shayo shedasia.

⁶ Mṟi yo yanu yechinyamaṟo, na alya handu kukuirie haweṟumatso, na shitaṟa shanu shedasia shiwenyamaṟo, kundu sanamu tso moketsiindia tsiwefunjofunjo na shitaṟa shilya mokedasia pfo shidaso shepfaama shiwenyamaṟo, na maṟunda ha mawoko hanu hekumba kuleshe;

⁷ Iwo wose wechiwoho nyi wechioloka kiidi kyanu kundu muidime imanya ke inyi nyi Mndumii.

⁸ “Indi njechikiṟa waangu kidi kyanu walechiwoho, nawo wechidichia njorukenyi tsingi tsa wahenu.

⁹ Iwo waangu wechikia kiidi kyanu kyaindi wakadao wusingenyi nyi wechinjikumbuo kiidi kya wandu wo wahenu, chandu njilewakapa kipfa kya wulemeri wo mrima yawo ilenjida inyi ikahenda iindia maruwa hengi. Wawesukiose kya wuwicho wowo wose walewuta.

¹⁰ Nahong'u wawute ho imanya wuikimbi woko chi wuwei wo wulyapfo.”

¹¹ Mndumii-Ruwa nahamba, “Kapa kapa mawoko, nowekapa mtiṟi kui madende hapfo uhambe kochifihiṟa, kipfa kya mawicho ha wana wa Israeli wawetahachie, cha kipfa nyi wahenda ipfa shidenyi, na njaa, na ndaṟe ya makokoi.

¹² Kipfa walya wakeri haleshe wahenda iwoho nyi ndaṟe, na walya wakeri hafui wahenda iwoho nyi shida, na iwo wechitsuhaa wawoho nyi njaa. Nyi wudo njiawutsia nyashi yako huye yawo.

¹³ Nlyondo mochimanya ke inyi nyi Mndumii ili mandi mnying'a yawo yechitengitia oshangunyi lo sanamu tsawo na shitaṟa shawo shedasia, na huye ya mafumvu, na wanda ya mashidi mecha ha kimaṟamaṟa, na wanda ya mashidi ho hang'anyi na handu hose na orio handu wawekewutia mwano ko maruwa hengi.

¹⁴ Ambuya njechihoṟuo owoko loko huye yawo, njechinyamaṟa oruka lowo luwe mai na mai, kuwokia ora lo huye na lo nuka, kuwokia handu kuwode wandu na kuwokia ipfo nuka mṟasa mṟi fo Ribla, na nyilyo mandi wechimanya ke inyi nyi Mndumii.”