EZEKIELI 5 - Bibilia Kui Mdedie fo Kimochi

Ezekieli aoda njui tsake

¹ Mndumii kanjiwia, “Iyo mndu pfula oshu luohi cha kyoshu kya ichu mooda njui. Uhende ioda nalo njui tsapfo na ngerero. Noheshe njui tso na itsihawa njohawi tsiṟaṟu.

² Ohawi lo lumu lo njui tso nulukoṟe na modo makidi hawi ha mṟi fo, ili mandi mfiri yeṟingichio yechishika. Ohawi lo lo kawi noluwehe wehe na oshu lopfo ochihenda nja ya mṟifo, na ohawi lo lofurumia notsiwihitse tsidao na owira na inyi njechiduma oshu loko numa ya tso lutsioshe.

³ Uwehenda iwutaho njui sa njitutu nutsipfumie ipfo kilemionyi kya nguo yapfo.

⁴ Uwe kuwutiasepfo sa njitutu nutsikoṟe na modo, modo fu nyi fo fochikoṟa mba yose ya Israeli.

⁵ “Mndumii-Ruwa nyi ahamba adi, “Ifu nyi fo mṟi fo Yerusalemu, njifudongie kiidi kya mkambo ya wandu, fukaweṟingichio na njoruka tsifoi.

⁶ Kyaindi mṟifu fuletahacha mawawaso hako, fukawichuo kota mkambo fo wandu wengi, na iwada wuminyi kota wandu wawefuṟingichie. Yerusalemu fuleleha iosha mawawaso hako na ichumia kiidi kyaho.

⁷ Koikyo Mndumii opfo nyi ahamba adi, kyamba nulenjimina kota mkambofo fo wandu wawekuṟingichie, koweleha iosha njia ya wusumahanyi kochitahacha mawawaso hako, koweosha mbuka tsa wandu wawekuṟingichie.

⁸ Nyi wudi Mndumii-Ruwa ahamba: Nyashi yake nyi ikeri huye yapfo, nao nechikutaa kya mawicho hapfo oshangunyi lo wandu.

⁹ Ambuya, kipfa kya mawicho hose ulenjiwutia iyo Yerusalemu, njechikuwutia kindo kiwicho sa njilalemekuwutie manya njilechikaa njikuwutiese.

¹⁰ Koikyo wafee wa Yerusalemu nyi wechilya wana wawo na wana wechilya wafee wawo. Nyi wudo njechimuhoṟuo. Iwo wechitsuhaa njechiwarahanyitsa wahende ipfo na ipfo wuyanenyi kose.

¹¹ Mndumii-Ruwa chu ai na moo, ichu ulefanyitsa hekalu lyake na mawuto hapfo hafanyi na mchumie fopfo mbicho nechikukapa manya riso lyake lyechikulilia ma ikusaṟia pfo.

¹² Kyamba kyenga kyanu kya kaṟaṟu kechipfa ko njaa na ndaṟe ya makokoi kiidi kyanu, na kyenga kya kawi wechipfa ko oshu na kyenga kya kaṟaṟu njechiwarahanyitsa ipfo na ipfo na oshu loko lochiwaosha ipfo numa yawo.

¹³ “Nyi wudong'u njechiawutsia nyashi yako kowo na mrima foko fuwade ofoṟo fukeseke. Nawo waidime imanya ke nyi inyi Mndumii, njiwode wunyenyi, njilewakapa kipfa kya mawicho hawo.

¹⁴ Wandu wose wakuṟingichie na walya wechiida kufui na iyo wechikuisalucha na ikupiṟa na ikumina.

¹⁵ Ili mandi nyashi yako na ngapo tsako tsechikuhoya, walya wakuṟingichie wechikuambuya kinyeri wechikusalucha na ikutaluo.

¹⁶ Ambuya nyi njechinyamaṟa shikumbi shapfo sha shelya kundu ukapo nyi njaa. Njaa i yechikuwawiṟa chaili olaso nyi mfi iwode wuṟoi.

¹⁷ Njechidika njaa na mando ha ngeṟenyi hakusoke wana wapfo njiweende ndaṟe, na shida yechimuarisa. Nyi wudi Mndumii ahamba.”