EZEKIELI 46 - Bibilia Kui Mdedie fo Kimochi

Mangi na mkonu ya Mfuho

¹ “Mndumii-Ruwa nyi ahamba adi: Mongo fulya fuambuye ora lo ngamenyi fo kyamba nyi fochikaa fui mpfunge ko mfiri iṟandaṟu ya maṟunda. Kyaindi fupfunguo mkonu fo sabato na mkonu fo ambia meri.

² Mangi nyi echiida na mba awuka nja, naide o mongonyi mṟasa kiṟiha kyo kyamba nao nahoṟoke kufui na ngo tsa mongo fo, kiherikyo wakohanyi wawute shidaso shake shemaya modonyi na sha ofoṟo. Kiidima mangi cho naidie oo mongonyi nahende nja. Kii kidi mongo nyi fochikaa fufuṟuhuo mṟasa kyukanyi.

³ Orio mkonu fo sabato na mfiri mnene fo iwoneka lya meri, wandu wose nyi wechinjiindia Inyi Mndumii-Ruwa oshangunyi lo mongo fu.

⁴ Mkonu fo sabato mangi nyi echiendie Mndumii-Ruwa shidahina shiṟandaṟu sha machondi na isuwa limu lilawode kifaṟe ko kidaso kekoṟa modonyi ado.

⁵ Ko orio isuwa echiliwuta nyi echiende kidaso kya mso lita ikumi na mfungade na kyenga, na ko orio kidahina kya ichondi nyi echiende kidaso kyose awona. Ko orio kidaso kya mso nyi echiende lita tsiṟaṟu tsa mafuda.

⁶ Kiheri kya mfiri mnene foambia meri nyi echiwuta ipung'a litutu, shidahina sha machondi shiṟandaṟu, na isuwa limu shose shilawode shifaṟe.

⁷ Ko orio ipung'a lyechiwuto na isuwa ko kidaso, nyi kiwaṟi kuwewuto lita ikumi na mfungade na kyenga tsa mso na lo orio kidahina kya ichondi, kuwekaapfo kindo kyose mangi echiwuta na ko orio kidaso kya mso kechiwuto kyakoyo kuwewuto lita tsiṟaṟu tsa mafuda.

⁸ “Ili mangi echiwuka mba nyi echiida mongo fulya fulya aleidia.

⁹ Ili mandi wandu wechicha iindia Mndumii-Ruwa kiheri kyose kya mkonu mnene, walya waidia mongo fo ora lo mtsudu nyi wechiwuka wechiidia mongo fo ora lo nuka, na walya waidia mongo fo ora lo nuka wechiwuka weidia mongo fulya fo ora lo mtsudu. Koikyo mndu nalawuke nja echiidia mongo fulya achea nafo, kyaindi nawuke kechiidia mongo fulya fui oshangunyi loke.

¹⁰ Mangi nechiida mba ili indi wandu waida na mba, nawewuka ili indi wandu waiwuka.

¹¹ Ko mfiri iya njinene na mkonu injiachikie, kidaso kya mso nyi lita ikumi na mfungade tsirianyi na ipung'a ang'u isuwa, na orio kindo kyose mndu echiidima iwuta ko orio kidahina kya ichondi. Ko orio kidaso kya mso nechiwuta lita tsiṟaṟu tsa mafuda.

¹² Kokoya mangi akunda iwutia Mndumii-Ruwa kidaso kya mkundie na kokoya nyi kidaso kekoṟa modonyi, ang'u kidaso kya ofoṟo nyi wechimpfunguya mongo fo kyamba fulya fuambuye ora lo ngamenyi. Nao nyi echikuwutia shidaso chandu ekewuta mkonu ya sabato, nao kamewuka ipfo mba mongo fo fushingo numa yake.”

Mwano ya orio mkonu

¹³ “Orio ngamenyi nyi nochiwutia Mndumii-Ruwa kidahina kya ichondi kya maka fumu kilawode tewe kiwehenda ikoṟo modonyi kyose.

¹⁴ Na orio mkonu mochiwuta kidaso kya kilo tsiwi tsa mso hamu na mafuda lita imu ha msinefu hasanzo na mso fo. Kii kidi nyi mochiosha wuwawaso wo kidaso ki kya Mndumii-Ruwa mlungana.

¹⁵ Kidahina kya ichondi, mso na mafuda nyi kiwaṟi shiwuto ko Mndumii-Ruwa orio ngamenyi mṟasa mlungana.”

Mangi na teri

¹⁶ Mndumii-Ruwa nyi ahamba adi, “Kokoya mangi ainenga mana oke teri, ambuya teri yo nyi yechiwa ya manachu oke kiheri kyose hamu na oshari loke.

¹⁷ Kyaindi kokoya mangi ainenga mṟundi oke teri, teri yo nyi yechiwa ya mṟundi itane kiheri kya yubile. Nyi lyo mandi teri yo yechiwihiṟose na ko mangi. Kyamba teri yo ya mangi nyi kioṟa kyake na wana wake wa kisoṟo tupu.

¹⁸ Kiwaṟi mangi nasoke wandu wake teripfo. Teri yose echiinenga wana wake wa kisoṟo nyi kiwaṟi iwe nyi iya yake tupu. Kii kidi echiidima isoka wandu wake teripfo.”

Mariko ha hekalu

¹⁹ Kyasia, kawenjiitsa na njia iya yeida na ipfo shiṟihenyi shii shiele sha wakohanyi sha ora lo huye hafui na mongo fulya fo ora lo nuka lo kiṟiha kilya king'anyi kya mba, kawuya kanjiloṟa handu ora lo kyukanyi lo shiṟiha shilya:

²⁰ Kanjiwia, “Ambuya iya nyi hando wakohanyi wekekoṟia nyama ya kidaso kewuta wunyamaṟi, na handu hekoṟia shidaso sha mso. Kipfa kyaikyo wakashika iwuka nja wekehenda na kindo kyosepfo kundu wandu walakufanyitse kokoya wakupaya na kindo kii kiele.”

²¹ Kyasia kawenjiduose ora lo kyanja, kawenjiitsa njora tsose tsina tsa mbelyamba iya. Orio ndumbenyi kuwewodepfo kiwanja sa kitutu.

²² Koikyo njora tsose tsina tsa kiwanja kilya nyi kuwewodepfo shiwanja shitutu shina shiwewode wuleshe wo mita makumi hawi (20) na wulandari wo mita ikumi na tsitanu (15).

²³ Ambuya nyi kuwewodepfo omombo lutengetie orio kiwanja, kukawekaapfo handu heatsia modo kufui na omombolo.

²⁴ Nalyo mndu ulya kanjiwia, “Iha nyi mariko handu waṟundi wa Mndumii-Ruwa wechikoṟia shidaso sho shechiendo nyi wandu.”