EZEKIELI 45 - Bibilia Kui Mdedie fo KimochiTeri njiele ya Ruwa 1 “Kiheri kyo mochihawa oruka lu ko kuṟu kuhya, kundu orio oshari luwone ohawi lowo, ambuya mochiwuta ohawi lumu mulushimbuo kipfa kya Mndumii-Ruwa. Wuleshe woke nyi kilomita (12:5), na wulandari woyo nyi kilomita (10). Teri ii yose nyi yechiwa njiele. 2 Kiidi kyayo kochiwadapfo ora luṟinganyi njora tsose nyi lochiwa nyi handu haele, luwode wuleshe wo mita (250) njoṟa tsose, na ilyo liṟingichio na teri ingi liwode wulandari wo mita (250). 3 Kiidi kya teri yo iwepimoseho teri iwode wuleshe wo kilomita (12:5) ko kilomita (5) handu ha nyi mba yako, handu haele mnu. 4 Kii kidi ora lu nyi lochiwa luele kunu orukenyi, nalo nyi mochilushimbuo luhende wa nyi lo wakohanyi wakeri iṟundia Mndumii-Ruwa kiidi kya mba yake. Handu ha wakohanyi nyi wechiwikapfo mba tsawo na oo handu hashimbuo nyi kochiwa kipfa kya mba yako. 5 Ora lulya lungi luwode wuleshe wo kilomita ikumi na tsiwi na kenga (12:5) ko kilomita tsitanu (5) nyi lyechidambikio Walewi wekeṟunda ipfo hekalunyi lihende iwa lyawo. 6 “Muhende ipimase handu ha mṟi kufui na handu ha hai haele, wuleshe woke nyi kilomita ikumi na tsiwi na kyenga ko kilomita tsiwi na kyenga. Handu ha nyi kochiwa ko Israeli yose.” Teri ya mangi 7 “Mangi nao nyi echiinengo ora loke ora lo ngamenyi na ora lo kyukanyi alya hando hahashimbuo ko Mndumii-Ruwa. Handu ha nyi lochilandaa ora lo kyukanyi itane ipalyipalyi lya Mediteranea na ora lo ngamenyi itane mtsitsionyi fo oruka. Ora lu lo mangi luhende iṟingana na ora luluinenge kishari kya Waisraeli. 8 Ilo nyi ohawi lo Mangi o Israeli kipfa kya ikyo mangi echiidimase iwonyia wandu wako pfo, nyi echilekia meke fohawa oruka ko shishari sha Israeli.” Iṟunda lya mangi 9 “Mndumii-Ruwa nyi ahamba adi, “Nyo waitoṟi wa Israeli nyi mulewuta wunyamaṟi kishikie, lekanenyi na wulang'a na iwonyia, henda wutenyi wusumuhanyi na wuhoṟotsu - manya mulafune wandu kunu orukenyi, nyi Inyi Mndumii-Ruwa ngahamba. 10 Muweambuya mizani tsanu tsiwe na shiheo sha wusumuhanyi. 11 Muweṟinganyisha mizani tso na shiheo shayo. Efa ya mso na bathi ya mafuda shiwe kiheo kimu. Isho shi shiwi nyi kyenga kya ikumi kya homeri imu. 12 Shiheo sha ulemeri yera makumi hawi (20) nyi shekeli imu, shekeli makumi hatanu (50) nyi mina imu. 13 “Shiheo shanu sha shidaso sha mso nyi chechiwa shidi; kimu ko orio shiṟandaṟu sha efa nyi homeri imu ya Ngano na kimu ko shiṟandaṟu ko homeri imu ya shayiri. 14 Kiheo kya mafuda nyi kechiwa kudi; kimu kya bathi ya mafuda ko kori imu (kori imu nyi kimu na homeri imu nayo nyi kimu na bathi ikumi). 15 Kii kidi nyi wechiwuta ichondi limu ko ipo lya machondi mahana hawi (200) kiidi kya oshari lo Israeli. Nawo nyi wechiende shidaso sha mso, shidaso shemaya modonyi, shidaso sha ofoṟo kundu waidime iwonyio kisanzio. Nyi Inyi Mndumii-Ruwa ngahamba. 16 Wandu wose wa Israeli nyi wechiinengia shidaso sho ko mangi. 17 Ko ora lungi nyi kiwaṟi Mangi nawone ke shidaso sho shemaya modonyi, shidaso sho sha mso na shidaso sho sha shindo shenyo nyi shechiwuto mfiri ya mnene, meri okombe, sabato na tsa mfiri iya mnene injiwike, nyi tsechiendo nyi Waisraeli. Kikamba kido mangi naachikie amonyi shidaso shewuta wunyamaṟi, shidaso sha moo, shidaso shekoṟa modonyi, shidaso sha ofoṟo kundu shihende iendie Waisraeli osanzo.” Mfiri mnene ( Iwu 12:1-20 ; Wal 23:33-43 ) 18 “Inyi Mndumii-Ruwa ngahamba njidi: Mkonu fo kuwoka fo meri fo kuwoka nyi mochiwuta kidaso kya ihache licha lya ipung'a lilawode kifaṟe kundu muhende isanja mba yako. 19 Mkohanyi nyi echiwuta samu ya kidaso kyo kewuta wunyamaṟi, naishie ipfo shiwango wangonyi sha mongo, ipfo ndumbenyi ya rasio, na shiwangowango sha mongo iya yeida na kulya mba. 20 Nyi echihenda iwuta ado mkonu fo mfungade fo meri fo, kipfa kya mndu alewuta wunyamaṟi alakusirie ang'u alaichi. Kikawutika kudo nyi mochisanja mba ya Mndumii-Ruwa. 21 “Mkonu fo ikumi na kana fo meri fo kuwoka, nyi mochilya Pasaka. Ko mfiri mfungade, nyi mochilya mkate fulawode kindo ketarang'aa. 22 Mkonu fo mangi nyi echiwuta ipung'a limu lya kidaso kewuta wunyamaṟi ko kipfa kyake oo amonyi na ko kipfa kya wandu wose wa Israeli. 23 Orio mkonu, ko mfiri ya mfungade nyi echiwutia Mndumii-Ruwa kidaso kya mapung'a mfungade, na masuwa mfungade halawode kifaṟe wahende ikoṟa modonyi. Kii kidi nyi kimbaṟi nawute kidaso ki orio mfiri na kyo kihende iwa kidaso kewuta wunyamaṟi. 24 Nawesungusia kidaso kya mso kilo ikumi ko orio ipung'a na kilo ikumi ko orio isuwa lya ichondi na lita tsiṟaṟu tsa mafuda ko orio kilo ikumi tsa mso. 25 “Mfiri fo ikumi na katanu fo meri fo mfungade na ko mfiri mfungade ya mfiri mnene mangi nyi echihenda iwuta shindo shiwaṟi sha kidaso kewuta wunyamaṟi, na shidaso shemaya modonyi, na shidaso sha mso, na mafuda.” |
Kimochi Bible © Bible Society of Tanzania, 2016.
Bible Society of Tanzania