EZEKIELI 44 - Bibilia Kui Mdedie fo Kimochi

Mongo fo ora lo ngamenyi

¹ Nalyo kanjiduose mongonyi fo ora lo ngamenyi nafo nyi fuweimshinge.

² Nao kanjiwia, “Mongo fu nyi fochikaa fumshinge. Kyamba kuwode momu fo mndu oose iidiahopfo. Kyamba Inyi Mndumii-Ruwa o Israeli nyi njileidia mongo fu. Ko ikyo nyi fochikaa fui mpfunge.

³ Manya kudo, mangi awode oruka nechiidima iida napfo na ilya kelya kyake kiele oshangunyi loko. Kyaindi kimbaṟi naide na iya aidie mongo fo kiṟiha kingi.”

Chile tseida hekalunyi

⁴ Nalyo kanjiduo mongo fulya ora lo huye. Kiheri njileiria meso hako ngawona kiṟumi kya Ruwa kiichuṟia mba iya ya Mndumii-Ruwa pacha. Nalyo ngaoloka wanda na kyamu.

⁵ Mndumii-Ruwa kanjiwia, “Ambuya necha uwekusaṟa mnu kya shindoshi ushiwonyi na ishiadanyia. Kyamba njikeri ikupfunda chile na wuwawaso wo mba i ya Ruwa. Wada mnu na mrima kundu uidime imanya nyi wandu waki wawode momu foida na kunu mbenyi ya Ruwa na nyi wandu waki walawode momu foida napfo.

⁶ Israeli walekanyi na inyi. Mndumii-Ruwa nyi ahamba adi, ‘Njechiidima se ikarishia mawicho hanu hosepfo.

⁷ Ambuya nyi mulefanyitsa mba i yako, kyamba nyi muleinenga momu wandu walawadine iida na kunu mba, wandu wakanjiwadia wuindi kiheri kyo shidaso sha mafuda na sha samu shikeri idaso kipfa kyako, kipfa kya ikyo nyo mui wandu wako nyi muletehia mma ko mawicho ho hanu hose.

⁸ Handu nyo muweṟunda iṟunda li liele lya shindo shako nyi muleinenga momu wandu wa mkambo ya wandu iṟunda li kunu mbenyi yako.

⁹ Kyaindi wulalu Inyi Mndumii-Ruwa nyi ngahamba njidi. Kuwode mndu oose o mkambo ya wandu, alai mdine ang'u ulya alanjiwadie wuindi awode momu foida na kunu mbenyi yako pfo manya iwo wai kiidi kya wana wa Israeli wawode momupfo.’”

Walewi wawuto wukohanyinyi

¹⁰ “Ko Walawi walya walelekana na inyi kiheri Waisraeli walenjida wakaindia maruwa hengi, nyi wechikudika ngapo yawo.

¹¹ Kyawo nyi wechiidima ikuṟundia kunu mbenyi yako cha waringi wa mba yako. Ambuya nyi wechiidima ishinja shiuma sho shechiwuto sha kidaso kemaya modonyi na iṟundia wandu.

¹² Kyamba nyiwo walesongoya Waisraeli iindia maruwa hengi, wakatewa wandu wakawuta wunyamaṟi. Ambuya nyi njechiwahoṟoya owoko loko njiwakape. Nyi wudo Inyi Mndumii-Ruwa ngahamba, nyi wechikudika ngapo yawo.

¹³ Kyamba wechiidimase injiṟundia cha wakohanyisepfo, manya wawode momu fo wada shindo shako manya shilya shiele mnu pfo. Kipfa kya ikyo nyi wechiwado nyi sonu kipfa kya mawuto hawo mawicho walewuta.

¹⁴ Kyaindi nyi wechiidima iwada makamba heringa mbai na ikuṟundia maṟunda hengi hechiwutika kunu mba.

Wakohanyi

¹⁵ “Kii kidi, Wakohanyi walya wa oshari lo Sadoki, walya waleṟunda maṟunda hako handu haele hako, kiheri kilya Waisraeli walelekana na inyi, iwo nyiwo wechiidima iṟunda oshangunyi loko wechinjiwutia mafuda na samu.

¹⁶ Iwa nyi wo wechiidima iida na mba yako wawetikiria rasionyi lyako wechinjiṟundia.

¹⁷ Kiherikyo wai kunu mbelyamba waṟae nguwo njiili, manya walaṟae nguo tsa sufu. Kiherikyo waiṟunda kunu mongonyi ya mbelyamba manya kunu mba kwenyi.

¹⁸ Wawekuṟaya se kilemba kiili mdonyi yawo na nguwo tsilewatewa wawiṟuke.

¹⁹ Mandi ho waihenda njoshangunyi lo wandu ipfo mbelyamba, nyi wechiatuo nguwo tsawo tsilya waweṟee lilya waweiṟunda, wawetsisuṟuma shiṟihenyi shii shiele. Kii kidi, nyi kiwawaṟi waṟae nguo tsingi kundu wandu walawone wechikuwasha na nguwo tso tsawo tsa wuindi kipfa tsi njiele.

²⁰ “Manya walaode mdo yawo manya njui tsawo tsilalee. Kyaindi nyi wechitsika shimdo sha njui tso tsawo.

²¹ Mkohanyi ose alanyo mvinyo ili mandi aiida na ipfo mba ya Ruwa.

²² Mkohanyi ose alaalike mka mkusu ang'u mka alekanyi na mii. Ambuya nyi echialika mndu mka mkeha ai o mbaṟi ya Waisraeli ang'u mndu mka mkusu awemwalike nyi mkohanyi.

²³ Ambuya Wakohanyi nyi wechilosha wandu wa Israeli waidime imanya shindo shiele na shilya shilai shiele wawewaloṟa shindo shii ngafu na shilya shilai ngafu.

²⁴ Kokoya kowonekapfo shiloyo nyiwo wechisungusia wechiosha mawawaso hako. Shiheri shose sha mfiri mnene nyi wechiosha chile tsako na mawawaso hako, nawo nyi wechitana njiele sabato tsako.

²⁵ Manya walakae kufui na mnying'a kundu walafane. Kyaindi wechiidima wakufanyitsa wechikaa kufui na ndee, mae, mshiki au mana mtutu owo apfa.

²⁶ Kokoya umu owo afana ado, nakae handu ha mfiri mfungade nahong'u nechiheṟemka.

²⁷ Ili mandi echiida mbenyi yako injiele nyi echiwuta kidaso kewuta wunyamaṟi. Nyi wudo Inyi Mndumii-Ruwa ngahamba.

²⁸ “Ambuya wakohanyi wawode momu fooṟa teripfo, inyi nyi kyoṟa kyawo; manya mlawahawie kindo kyose orukenyi lo Israeli, ohawi lowo nyi inyi.

²⁹ Kelya kyawo nyi shidaso sha mso, shidaso shewuta wunyamaṟi, na shidaso shewuta owingo, na orio kindo kyose kii kishimbuo kipfa kya Mndumii kiidi kya Israeli nyi kechiwa kelya kyawo.

³⁰ Ambuya ndunda tsa kuwoka tsa mdemenyi fopfo na tsa orio kindo na shidaso sho shapfo shose nyi shechiwa sha wakohanyi. Kingise nyi ochiende kelya kyapfo kya kuwoka kya mso ko wakohanyi kundu mba tsanu tsihende iwikio mboṟa.

³¹ Wakohanyi wawode momu folya shilehe ang'u indo lya pfa lienyi ang'u lyawoho nyi mando ha ngeṟenyipfo.”