EZEKIELI 43 - Bibilia Kui Mdedie fo Kimochi

Mndumii-Ruwa awuya na hekalunyi

¹ Nalyo mndu ulya kanjiduo mongonyi fo ora lo ngamenyi.

² Nalyo mng'ano fo Ruwa o Waisraeli fukawoneka fuwuka ora lo ngamenyi. Hamu nafo kukaweichiopfo kiding'ashi king'anyi cha kya mfu fo mṟinga fufoi, nalo oruka lukaaka aka ko mng'ano foke.

³ Ndodo ikawa cha iya njileiwona lilya mandi Mndumii alecha irumatsa mṟi fulya fo Yerusalemu. Ikawefananase na iya njilewona kufui na meda fulya fo Kebari. Nalyo ngaoloka wanda na kyamu.

⁴ Kyasia mng'ano fo Mndumii-Ruwa fukaida na kulya mba fuidia mongo fulya fo ora lo ngamenyi.

⁵ Nalyo mumuyo fukanjiiria kulya kyamba. Mng'ano fo Mndumii-Ruwa fukaichuṟa mba iya ya Mndumii-Ruwa.

⁶ Mndu ulya kahoṟoka hafui na inyi, ngaweicho ṟu lya mndu aidedia kulya mba ya Mndumii-Ruwa;

⁷ nao kanjiwia, “Iyo mndu, iya nyi hondo loṟika loko lo wumangi lukeri, nyihondo njekechumia na njotifo tsako. Kyamba njihenda ikaa kiidi kya wandu wako wa Israeli mlungana. Kyamba Waisraeli wechihendase ifanyitsa rina lyako wo wawenyipfo ma wamangi wawo wechiindia sanamu tsa maruwa hengi manya iṟika mnying'a ya wapfu wawo handu ha se pfo.

⁸ Kyamba Wamangi wawo wawewikie na iterekia ngo tsa mba tsawo tsa wumangi hafui na ngo tsa mba yako tsikaletsano na omombo tupu. Ambuya nyi walefanyitsa rina lyako liele kipfa kya mawuto hawo mawicho wawewutie, nyi kyo kitewe ngapo ya nyashi yako ikawasokia.

⁹ Kyaindi wulalu wahende ida iindia sanamu tsawo, wawehenda iiwuta mnying'a ya wamangi wawo wechiiduo haleshe na inyi, nyi lyo njechihenda ikaa kiidi kyawo mlungana.

¹⁰ “Ambuya, Iyo mndu! Henda ongoya Waisraeli mbonyi tsi tsa mba ya Ruwa, wawekulosha ofano lo mba yako. Wahende iwodo nyi sonu kipfa kya mawuto halya hawo mawicho wawewutie.

¹¹ Wakamehoyo nyi sonu kipfa kya mawuto hawo, waongoyeng'u sungusihu tsa mba i yako, waloṟe ofano lo mba i ya Ruwa, uwehendase iwaloṟa mongo yeida napfo na iya yewukapfo, chandu injisungusie, chile tsa orio kindo kya mba i, shilya shiwaṟi na shilya shilawaṟi iwuta sha kunu mba. Kyasia henda ṟehia shindo shi shose na pata kundu waidime iwona sungusihu tsi na chile tsi chandu tsinjisae, nawo waidime itsiosha chandu kiwari.

¹² Ili nyi lyo iwawaso lya hekalu li kyamba orukalu luṟingichie hekaluli iya fumvuhu nyi litane liele. Ambuyang'u ili nyi lyo iwawaso lya hekalu.”

Rasio lya hekalu

¹³ “Shiheo sha rasio nyi shechifanana na shilya sha hekalu. Itengetia otende lo rasioyo kochiwadaho mfongo fusume ko ihenda wanda sentimita (50), wulandari sentimita (50), na minga fuhendie wanda sentimita (25).

¹⁴ Rasio lyo lya wanda iwuka otendenyi nyi lyechiwada wuleshe wo mita imu. Na iwuka oo ndumbenyi ko ora lo nduma yechiwa sentimita (50) itengetia, na wuleshe wo huye mita (2). Kyenga kingi kechiosha nyi kechiwiko ora lo nduma ipfo ndingonyi nalo nyi lochiwada sentimita (50) ilutengetia.

¹⁵ Kyenga kya ora lo huye, ilu nyilo lochiwa lodasia shidaso shilya shemaya modonyi, ilu nyi lochihiana njora tsose, koikyo nyi lochiwada mita tsiwi orio ora. Kyasia ora lu nyi lochiirio huye kota njora tso tsingi.

¹⁶ Ora lo huye lo rasio li nyi lochihiana njora tsose, nalo nyi lochiwada wuleshi wo mita (6) orio ora

¹⁷ na wuleshe ora lo kiidi lochihiana njora tsose, nalo nyi lochiwada sentimita (7) orio ora, nalo luwewada ndumba ipfo mtsitsionyi wuleshe woyo ko ido huye nyi sentimita (25). Napfo kuwekaapfo mfongo fuwode wulandari wo sentimita (50). Shitengu shedoya ipfo rasionyi nyi shechikaa ora lo ngamenyi.”

Ishimbuo rasio

¹⁸ Nalyo Mndumii-Ruwa kanjiwia, “Iyo mndu! Inyi Mndumii-Ruwa ngahamba njidi: Ambuya rasio lyo likamemaa iwiko nyi ochiheda ilishimbuo, nyi ochihenda idasiaho shidaso shemaya modonyi, nuweletsiaho samu ya shiuma sho shidaso.

¹⁹ Kingise wakohanyi walya wa oshari lo Lewi na wawei wa kishari kya Sadoki, nyiwo wechicha oshangunyi loko wechinjiṟundia. Nyi wudo Inyi Mndumii-Ruwa ngahamba. Ambuya nyi ochiwainega ihache lya ipung'a nalyo nyi lyechiwa kidaso kewuta wunyamaṟi.

²⁰ Kyasia nyi ochiwuta samu yo uipusuye njora tsose tsa rasio na shindo shalyo shose na shitengu sho shalyo, kyamba nyi wudo ochilisanja rasio lyo na ilishimbuo.

²¹ Uwehenda iwutase ipung'a lya kidaso kewuta wunyamaṟi; ili nyi wechilikoṟa modonyi handu mochisambuṟa kunu mba ya Ruwa haleshe na alya handu haele.

²² Ambuya ili lya ngama nyi ochihenda iwuta kioṟo kilawode ipaṟi, nakyo nyikechiwa kidaso kewuta wunyamaṟi; kii kidi rasio lyo nyi lyechisanjo chando lilesanjo ko samu iya ya ipung'a lilya.

²³ Kyasia komemaa isanja rasio lyo, nyi ochiduose ipung'a sa litutu lilawode ipaṟi na isuwa sa litutu lilawode ipaṟi;

²⁴ nuwaende oshangunyi loko. Kiidima wakohanyi nyi wechiwashia monyo wahende iwawuta kidaso kemaya modonyi kya Mndumii-Ruwa.

²⁵ Ko handu ha mfiri mfungade nyi ochihenda idasa kioṟo kimu orio mkonu kiwe nyi kidaso kewuta wunyamaṟi. Wawewutase ipung'a limu na isuwa lilawode ipaṟi.

²⁶ Kyamba ko mfiri yo mfungade nyi ochimarisa iṟundali lyesanja, iwika njoko na ishimbuo rasio li.

²⁷ Mfiri yo mfungade ikamaa iida nyi lyondo wakohanyi wanu wechidasa shidaso shanu shekoṟa modonyi na shidaso shanu sha ofoṟo na inyi njewaadanyia. Nyi wudo Inyi Mndumii-Ruwa ngahamba.”