EZEKIELI 40 - Bibilia Kui Mdedie fo Kimochi

EZEKIELI AWONA HEKALU LIHYA Ezekieli adao Yerusalemu

¹ Kyasia maka fo makumi hawi na hatanu (25) wokia losamiṟo, nafo nyi mkonu fo ikumi fo meri fo kuwoka, nafo nyi fuweshikie maka fo ikumi na kaana (14) wokia mṟi fo Yerusalemu fuleoloka. Pfinya ya Mndumii-Ruwa ikaida na mrimenyi foko.

² Kiherikyo njiwei ndodonyi, nalyo Mndumii-Ruwa kanjiduo mṟasa orukenyi lo Israeli, kawenjidosia huye ya ifumvu sa lileshe mnu, ambuya ora lo kyukanyi kukakaapfo mba tsing'anyi tsiwekuloṟie cha nyi mṟi.

³ Kyasia amemaa injiduo pfo ngawona mndu awehoṟokiho akeri iakaaka cha aṟeṟa. Ipfo owokonyi lo mndu cho nyi awewodepfo orusu lo katanyi yepima na kidi kepima, nao nyi awehoṟoki kufui na mongo.

⁴ Kyasia kanjiwia, “Iyo mndu! Ambuya necha, uweadanyia necha. Kewewada na mrima orio kindo njiihenda ikuloṟa kyamba nocha na iya kundu njikuloṟe kindo. Kipfa kya ikyo nochiongoya wana wa Israeli orio kindo ochikiwona.”

Mongo fo ora lo ngamenyi

⁵ Kyasia ngawonapfo hekalu liweliṟingichie na omombo ipfo ora lo nja. Mndu ulya kairia kidi kilya kehesha kiwewode mita (3) kawehesha omombo lulya. Omombo lulya luwewode wuleshe wo mita tsiṟaṟu na wulandari wo mita (3).

⁶ Kawehendase alya mongonyi fuwekeri ora lo ngamenyi, kadoya ngasihu kashika kulya huye kawehesha kisingiti kya imongo lilya nalyo liwewode wuleshe wo wanda mita (3).

⁷ Kuweipfo shiṟiha sha waringi njora tsose, handu heida, na orio kiṟiha kiweṟinganyi wuleshe na wulandari wo mita (3). Njomombo tso tsiweletsanyi shiṟiha sho nyi luwewode wulandari wo mita (2:5). Kuwewode kiṟiha sa kileshe kiwewode wuleshe wo mita (3), kiṟihaki nyi kiweitsahanyi na kiṟiha kingi sa king'anyi hafui na hekalu.

⁸ Mndu ulya kaweheshase kiṟiha kyo, nakyo kiwesokie handu ha mita (4).

⁹ Kawehesha njomombo tsilya tsa ora lo nja natso tsiwewode wushimbi wo mita (1). Ipfo kyamba kufui na imongo lilya nyi kuwei kufui na hekalu.

¹⁰ Kukawekaapfo handu heida na mba napfo kuwewodeho shiṟiha shiṟaṟu sha waringi njora tsose nasho nyi shiweṟinganyi na omombo tsilya tsiweshiletsane, nyi tsiwewode wushimbi wulya wulya.

¹¹ Nahong'u mndu ulya kapima wulandari wo handu heida ida alya mongonyi. Wulandari wofo nyi wuweshikie mita (6:5), osehu wulya wo ida wo makidi hawi wawedo mita (5).

¹² Oshangunyi lo shiṟiha shilya sha waṟingi shiweṟinganyi njora tsose mita (3) ko (3), nyi kuwewodeho omombo sa lufui luwei cha kindo kekinga wuleshe wolo nyi sentimita makumi hatanu na wushimbi wowo sentimita (50).

¹³ Mndu ulya kapima wuleshe kuwokia omombo lo numa lo kiṟiha kimuho mṟasa omombo lo nduma lo kiṟiha kya numa kya ora lo lo kawi kuwewodeho handu heida na kuwewode mita (12:5).

¹⁴ Kiṟiha kyo kefurumia kiwei kufui na kulya mbelya mba. Kawepima kiṟihakyo, nakyo nyi kiwewode wulandari wo mita (10).

¹⁵ Iwuka alya mongonyi handu heida na mba itane oshika kiṟiha kya osehu lulya luwei lo kyamba lo mongo fulya nyi kuwewode ho mita (25).

¹⁶ Ambuya nyi kuwewodepfo na maṟoche matutu ipfo shisingitinyi sha mongo ya shiṟiha shose mṟasa na omombo iya tsiweletsanyi shiṟihasho. Kingise nyi kuwewodepfo maṟeho ha mitende ipfo shisingitinyi sha kyamba kuweitumanyi na kiṟiha kyaosehu lulya lokuidia.

Mbelyamba

¹⁷ Kyasia mndu ulya kanjiduo mbelya mba ya hekalu. Ipfo nyi kuwewodepfo shiṟiha (30) shitengetie omombo lulya lo nja na oshangunyi lo nyi kuweikuale maho.

¹⁸ Sakafu yo nyi iweinjiale itengetie mongo iya, na wuleshe woyo wukowewa cha wuleshe wo mongo iya; iyo nyiwe sakafu yo ya wanda.

¹⁹ Mndu ulya kawepima wuleshe wo njia iya iwewukie kulya mbelyamba ora lo wanda yechihendia nja ya mbelyamba yo ko mita (50).

Mongo fo ora lo huye

²⁰ Nalyo kawepimase wulandari na wuleshe wo mongo fulya fo ora lo huye lo omombo lulya.

²¹ Napfo nyi kuwewode shiṟiha sha waringi shiṟaṟu njora tsose tsa mongo fulya; wulandari na wuleshe wo mafuremu ha mongo fo shiweṟinganyi na sha mongo fulya fo kuwoka; wuleshi woyo wuweshikie mita na wulandari wowo nyi mita (12:5).

²² Kiṟiha kilya keida napfo, matiṟisha hakyo hamu na mṟeho iya ya mitende kulya omombonyi iwefananyi na iya ya mongo fulya fo ora lo ngamenyi. Napfo kuwewode ngasi mfungade tsedoya ipfo mongonyi na ngo tsayo tsiwekeri oshangunyi.

²³ Maambatsana ha mongo fulya fo ora lo huye na fulya fo ora lo ngamenyi nyi kuwewode njia yeida na kiṟiha kilya kya kyamba; kawepimase wuleshe wo njia ya kiidi kya mongoyo nayo iweshikie mita (50).

Mongo fo ora lo nuka

²⁴ Nao kawenjiduose ora lo nuka napfo kuwewodepfo mongo, nao kawepimase mongofo na ngo tsafo, shikawehiana na mongo iya ingi.

²⁵ Napfo kuwewodepfo matiṟisha njora tsose cha shiṟiha shilya shingi. Wuleshe wosho nyi mita (25), na wulandari wowo nyi mita (12:5).

²⁶ Nyi kuwewode shitengu mfungade shedoya pfo, na kiṟiha king'anyi kiwekeri kulya kyamba, napfo kuwewode maṟeho ha mitende ipfo mbarinyi.

²⁷ Napfo nyi kuwewode mongo ora lo kyukanyi lo kiṟiha kilya kya kyamba, nao kawepima wuleshe wo njia yo ikashika mita (50).

Kiṟiha kya kyamba na mongo fokyo

²⁸ Nalyo mndu ulya kanjiduo mṟasa kiṟiha kilya kya kyamba kufui na mongo fulya fo kyanuka, nafo nyi fuwehianyi na mongo iya ingi.

²⁹ Shiṟiha sha waringi, ngo tsasho na njomombo tsasho shiwehianyi na shiṟiha shilya shingi; napfo nyi kuwewode matiṟisha mbai ya njia yeida napfo na hengi hakaṟingichia kiṟiha kitutu kya kyamba fo omongo lo osehu njora tsose. Wuleshe woke wuwei mita (25) na wulandari woke mita (12).

³⁰ Kukawekaapfo shiṟiha mbai ya njiayo yeidanapfo, wuleshe wosho mita (25) na wulandari wo mita (12:5).

³¹ Kiṟiha kilya king'anyi nyi kiwei maambatsana na kiṟiha kilya kya kyamba, kukaweṟehoṟeho maṟeho ya mashidi ha mitende ipfo ngonyi mbai ya njia yo yedoya ngasi tsedoya mongofu nyi tsiweshikie nyanya.

Kiṟiha kya mbelya mba na mongo fokyo

³² Shiṟiha sha wahenu, ngo tsilya tsa kyamba na kiṟiha kilya king'anyi nyi shiwehianyi na shilya shingi.

³³ Kuweipfo matiṟisha njora tsose ipfo ngonyi na kiṟiha kilya kya kyamba. Wuleshe woyo mita na shitanu (25) na wulandari woyo nyi mita (12:5).

³⁴ Ngo tsilya oo handu heida nyi tsiwei maambatsana na kiṟiha kilya kya nja, kukaweṟeho ipfo mbarinyi, ya omombo lulya, mṟeho ha mitende, ngasi tsedoyapfo nyi nyanya.

Kiṟiha kya kyamba na mongo fokyo

³⁵ Kyasia kanjiduo kya ora lo huye lo mongo fulya, kawefupima, nafo nyi fuweṟinganyi na iya ingi.

³⁶ Ipfo napfo nyi kuwewode shiṟiha sha waringi, omombo tsilya tsa kyamba tsiwenjiṟeheṟehe, kukawewada pfo matiṟisha hatengetie njora tsose, wuleshe woho nyi mita (25) na wulandari wo mita (12:5).

³⁷ Kiṟiha kilya kya kyamba kiweambatsanyi na kiṟiha kilya kya nja, kukawekaapfo maṟeho ha mitende ipfo mbarinyi ya njia yeida napfo. Kuwewode ngasi nyanya tsedoya ipfo mongonyi.

Mba tsiwei kufui na mongo fulya fo ora lo huye

³⁸ Kuwewodepfo kiṟiha kilunganyi na kiṟiha kilya king'anyi kya kyamba ora lo huye, ipfo kiṟihenyi nyipfo kundu wawekesanjia shidaso shilya sha shiuma shemaya modonyi.

³⁹ Kyasia iya njienyi kufui na mongo kuwewode ho mesa tsiwi ora lumu na tsingi tsiwi ora lo kawi. Kiidi kya mesa tso nyi hondo wawekeshinjia shidaso shilya shemaya modonyi na shidaso shilya shewuta wunyamaṟi na shilya shewuta mti.

⁴⁰ Nja ya kiṟiha kyo king'anyi nyi kuwewodeho mesa tsiwi ora lumu na tsingi tsiwi oralo lungi lo njia iya yeidia mongo fulya fo ora lo huye.

⁴¹ Koikyo mesa tsose tseshinjia shidaso shilya shemaya modonyi nyi mbe mesa nyanya. Tsina tsiwei kyamba ya kiṟiha kilya king'anyi na tsina nyi tsiwei ora lo kya nja.

⁴² Alya kiṟihenyi king'anyi nyi kuwewodepfo mesa tsina tseteseheṟia shidasosho shemaya modonyi. Mesa tso tsiwenjiwike na maho hetsana. Wuleshe wo huye wo mesatso nyi sentimita (50) na wulandari woke nyi sentimita (75). Shisha shose sheachikia shidaso shemaya modonyi na sha shidaso shingi nyi shiwekeleṟio huye ya mesa tsi.

⁴³ Iya kiṟihenyi nyi kuwemasepfo shidi shemasa nyama shiwewode wuleshe wo futi imu, na nyamatso tsikahekio mesenyi.

⁴⁴ Ipfo nja ya njia iya yeida na mba kuwewodepfo shiṟiha sha waringi ipfo mbelyamba ora lo huye lo shiṟihasho shiweambuye ora lo nuka, kiṟihakyo kiwei kufui na mongo fulya fo ora lo ngamenyi kiweambuye ora lo huye.

⁴⁵ Nao kanjiwia, “Kiṟihaki kiambuye ora lo nuka nyi kya wakohanyi iwo wekeṟunda kunu mba ya Mndumii-Ruwa,

⁴⁶ na kiṟiha ki kiambuye ora lo huye nyi kya wakohanyi walya wekeṟundia rasionyi. Wakohanyi wa nyi walya wa kishari kya Sadoki, iwa nyi kiidi kya wandu wa oshari lo Lewi wawode momu foida oshangunyi lo Mndumii-Ruwa.”

Mbelyamba ya mba ya hekalu

⁴⁷ Nao mndu ulya kapima kulya mbelyamba, napfo nyi kuweṟinganyi kose, njora tsose nyi tsiwewode wulandari wowo mita (50). Rasio lilya nyi liwekeri oshangunyi lo mba iya ya Mndumii-Ruwa.

⁴⁸ Kiituma kanjiduose kiṟiha kilya king'anyi keida na mbenyi ya Mndumii-Ruwa. Kawepima mongo fulya, wuleshe wofo wo huye nyi mita (2:5), na wulandari wofo mita (7). Njomombo tso tsiwewode wushimbi wo mita (1:5) njora tsose.

⁴⁹ Kuwewodepfo ngasi tsedoya ipfo kiṟihenyi king'anyi keida na mba, wulandari wo kiṟihakyo nyi mita (10) na wuleshe wo wanda nyi mita (6). Kukawekaapfo ngo tsiwi, imu ora lu na ingi ora lu lo mongo.