EZEKIELI 4 - Bibilia Kui Mdedie fo Kimochi

Mṟi fo Yerusalemu fochiṟingichio

¹ “Iyo mndu pfula tofaṟi noṟehieho ofano lo mṟi fo Yerusalemu.

² Loṟa chando mṟi fu fufutengetie, ochiloṟa njomombo na shiṟaṟo shifusembelie, keweloṟa shiṟaṟo sha waskari shifuṟingichie na maṟipo hang'anyi hewunduo mṟi fu hafuṟingichie njora tsose.

³ Kewepfula menya njilandari noihoṟotse iwe kiidi kyapfo na mṟifo. Hoṟokia mṟifo. Koikyo mṟi fo nyi fufutengetie na iyo uwewa chaili nyi ufutengetia. Kindo ki nyi kechiwa kichano ko wana wa Israeli.

⁴ “Komemaa iwuta kudo henda ulae na ora lo kumoso. Kiheri kyose nochikudika iṟio lya njonyamaṟo tsa wana wa Israeli.

⁵ Nochikaa kudo mfiri mahana haṟaṟu na makumi kenda (390). Orio mfiri nyi fotalio maka fumu iwo wahenda imarisiya wusingenyi. Ko njia yo nokudika ngapo yo ya Israeli.

⁶ Komemaa iwuta kudo uhalukie se ora lo lungi lo kulyo, uwekudikase ngapo ya Yuda ko mfiri makumi hana (40). Mfiri fumu fotalo ko ngapo ya maka fumu.

⁷ Koikyo nochihalukia mṟi fo fo Yerusalemu fui mtengetie, uweiria mawoko hapfo uhambe wuikimbi.

⁸ Ambuya njechikupfunga na mshe ulechiidima ihalukia ora lu ma ora lu itane kipfungo kyapfo kechisia.

⁹ “Nahong'u nochiira Ngano, shayiri, mahaṟaki, choṟoko, mtama, na uwele, noshiwike safurienyi nusungusie nasho mkate. Mkate fo nyi fochiwa kelya kyapfo kiheri kyo kyose ulee na ora lumu mfiri mahana haṟaṟu na makumi kenda (390).

¹⁰ Kelya ochilya kishikie gramu (230), limu ko mfiri.

¹¹ Mṟinga nawudo ochinyo ko kiheo nochinyo shikombe shiwi ko mfiri.

¹² Modo fopfo nochifuatsa na madifi ha wandu, nosungusie napfo wandu wose mkate wakuwonyi.

¹³ Kindo ki nyi kyaloṟa chandu Waisraeli wechilya mkate yawo injifanyitse ilimandi wechidao wusingenyi kiidi kya njoruka njihenu.”

¹⁴ Na inyi ngahaluo ngahamba, “Hoi Mndumii-Ruwa njilemelye kindo kyose kyapfa kitusu pfo, manya kyawoho nyi mando ha njiapfo. Njilemlye kindo kifanyi kuwokia wututu wokopfo.”

¹⁵ Nao Ruwa kanjihaluo, “Kyasia nochiidima ikusungusia mkate fopfo ko kyala kya mbe handu ha madifi ha mndu.”

¹⁶ Nalyo kanjiwiase, “Iyo mndu, ambuya njechiende njaa ya kelya iya Yerusalemu. Wandu wechiheshio mkate walye ko wuwowu, na iheshio mṟinga wai wasukie.

¹⁷ Nyi njechiwuta njido kundu wawuṟe kelya na mṟinga, na nyi wechisumukia na ipooka kipfa kya njonyamaṟo tsawo.”