EZEKIELI 39 - Bibilia Kui Mdedie fo Kimochi

Iwingo lya Gogu

¹ Mndumii-Ruwa kanjiwia, “Iyo mndu! Ikimba Gogu nummbie: Inyi Mndumii-Ruwa ngahamba njidi: Inyi nyi njihenda ilimbana na iyo Gogu mnene o wandu wa Mesheki na Tubali.

² Ambuya nyi njihenda ikuhalutsa uhende ora lungi njikusongoye uhende ikapa mafumvu ha Israeli.

³ Kyasia njihenda ifunja uda lopfo owokonyi lopfo lo kumoso na mfi yapfo iweoloka wanda iwuka owokonyi lopfo lo kulyo.

⁴ Kyamba nukeri henda ipfa mafumvunyi ha Waisraeli iyo na mbahanyi tsapfo na walya wose walunganyi na iyo. Mbihu yanu yechihenda ilio nyi shilehe shekelya nyama hamu na mando ha ngeṟenyi malang'a.

⁵ Nukerihenda ipfia ngeṟenyi. Nyi Inyi Mndumii-Ruwa ngahamba.

⁶ Njihenda iduma modo kopfo iyo Magogu handu hamu na ko iwo wose wakeri wambaṟa ya ipalyipalyi. Nawo wechiwutaho imanya ke Inyi nyi Mndumii-Ruwa.

⁷ Rina lyako liele lyechihenda imanyika kiidi kya Israeli. Manya njechiinengase wandu momu wasaluchese rina li lyako lielepfo. Kyasia wandu wa mkambo wechiwutaho imanya ke inyi nyi Mndumii-Ruwa ai mwele o Israeli.

⁸ “Kyamba nyi kyalohi mfiri fo njikeri ihamba fukeri iicha. Nyi Inyi Mndumii-Ruwa ngahamba.

⁹ Kyamba Waisraeli wo wakeri ipfo mṟinyi yawo wechisanyia shisha sho shiledeopfo wahende ishikoṟa modonyi. Kyamba ngao tso, mfiyo, na mapfumuho, na ṟungutso wechihaluo nyi ngu tseatsa modo handu ha maka mfungade.

¹⁰ Kyamba wechisanase ngu mademenyipfo, manya wechimanyase mashidipfo, cha kipfa wechihaluo shisha shi shiwe nyi sheatsa modo. Kii kidi nyi wakerihenda isoka masaa walya walewasoka masaa, wawerakuo walya walewarakuo, nyi wudo Mndumii-Ruwa ahamba.

¹¹ “Kyasia mfiri fo njechiinenga Gogu handu heṟiko kiidi kya oruka lo Israeli, napfo nyi ora lo ngamenyi lo ipalyipalyi lilya lya monyo. Kyamba Gogu nechiṟikopfo hamu na mbahanyi yake yose, wandu wa njia wawode momu foida ora lopfo. Nalyo pichilyo nyi lyechilaho rina, “Pichi lya Hamon-gogu.”

¹² Nawo Waisraeli wechiduo meri mfungade wechiṟika mnying'ayo tupu itane waidima isanjase oruka lo.

¹³ Wandu wose orukenyi nyi wechiwada iṟunda lyeṟika. Iṟunda lyo nyi lyechiwaendie kiṟumi, ili mandi njechiwaloṟa mng'ano foko. Nyi Inyi Mndumii-Ruwa ngahamba.

¹⁴ Meri yo mfungade ikamesia nyi wechisambuṟa wandu waide ide ipfo orukenyi wechipfulapfo mnying'a ilameṟiko kundu waiṟike, kundu waidime isanja orukalo.

¹⁵ Kiherikyo waidaida ipfo orukenyi, kokoya wakoya ifuo lya mndu wawikeho kichano kundu walya weṟika wahende iṟika ifuo li ipfo pichinyi lya Hamona-gogu.

¹⁶ Ipfo napfo kochikaapfo mṟi folaho nyi Hamoni nyi wudong'u wechisanja orukalu.

¹⁷ “Kyapfo iyo mndu, Inyi Mndumii-Ruwa ngahamba njidi: Henda laha shilehe shose na mando ho ha ngeṟenyi wasanyie wose wawuka njora tsose wache na shelyenyi sha mfuho fung'anyi njihende iwasungusia njimonyi iya fumvunyi lya Israeli, wache ilya nyama na ikunyoya samu.

¹⁸ Kyamba nyi wechilya nyama tsa mbahanyi, wawekunyoya na samu ya wanene wo wa wuyana wakeri ishinjo cha masuwa ang'u machondi ang'u mburu na mapung'a manoru ha Bashani.

¹⁹ Mfuhofo njihenda iwasungusia ambuya wechilya mafuda mṟasa waihude, wawekunyoyase samu mṟasa wanango.

²⁰ Iya mesenyi yako nyi wahenda iihutso na frasi, na walya wekedoya frasi, na mbahani tsilya njilang'a tsa shida nyi Inyi Mndumii-Ruwa ngahamba.”

Israeli wahenda iwihiṟio kiṟumi kyawo

²¹ Mndumii-Ruwa nyi ahamba adi: “Ambuya nyi njihenda itana mkambo ya wandu yose wawone mng'ano foko, wawewonase chandu mwanduye foko fo wusumuhanyi fulewahoya.

²² Waisaeli nyi wechimanya ke Inyi Mndumii-Ruwa njiwekerise Ruwa owo wokia maheriho na wulalu.

²³ Nawo wandu wa mkambo wechiwutaho imanya ke Waisraeli nyi waledao wusingenyi kipfa kya njonyamaṟo tsawo wo wawenyi walenjiwutia. Kyamba nyi walenjisheṟukia na inyi ngawewaowia walakinjiwonese, ngawewadambikia mawokonyi ha wakituwa wawo, nawo wakawawaha.

²⁴ Kyamba nyi njilewaowia nawo walaidime injiwona, ngawewawutia sumuhana na ngafu na madeko hawo.

²⁵ “Nyi wudo Inyi Mndumii-Ruwa njikeri ihamba, njikeri ihenda isaṟia Waisraeli wai nyi wana wa Yakobo njiwewawihiṟia se mboṟa yawo, kundu rina lyako liele liidime se iindio.

²⁶ Kyamba ili mandi wechikaase orukenyi lowo kui ofoṟo na olele, manya walawonyi se mndu mowaowesha, ambuya nyi wechihadima sonu tsawo na mawicho halya walenjiwutia.

²⁷ Kiheri kyo nyi mkambo ya wandu, njiwewasanyia sanyia wawuke kiidi kya wakituwa wawo, nyi njehenda iṟingishia wuele woko kiidi kya mkamboyo ya wandu.

²⁸ Kyamba nyi wechiwutaho imanya ke inyi nyi Mndumii-Ruwa, Ruwa owo, kyamba nyi inyi njilewasamiṟa wusingenyi kiidi kya mkambo ya wandu, wawemanyase ke inyi ngawewawihiṟase na orukenyi lowo. Kyamba njechida manya mndu umu owo nadeo wusingenyipfo.

²⁹ Kyamba ili mandi njihenda ipusuya Wasraeli mumuyo foko, njechiwaowiasepfo. Nyi Inyi Mndumii-Ruwa ngahamba.”