EZEKIELI 37 - Bibilia Kui Mdedie fo Kimochi

Pichi lya mafuo maumu

¹ Kyasia Mumuyo fo Mndumii-Ruwa fukanjichea, nalyo fukanjiiria kui mrima fukonjisotsia handu ha pichihu nalyo liweichuo mafuo.

² Kyasia kanjiduo orio handu kiidi kya pichi lilya. Napfo kuweipfo mafuo hafoi mnu kiidi kya ipichi lilya, naho mafuoho hawemaumu soṟo.

³ Nalyong'u Mndumii-Ruwa kanjiwesa, “Ngesa mafuo ha heidimase iwada moo?” Na inyi ngamhaluo: “Ee Mndumii-Ruwa na iyo kumonyi uichi.”

⁴ Nalyo kanjihaluo kahamba, “Wuta wuikimbi ko mafuoha hawie kudi, nyo mafuo maumu adanyienyi idedo lya Mndumii-Ruwa.

⁵ Mndumii-Ruwa namuwia adi: Njihenda iwaifilia mumuyo, nanyo mochiwada moo.

⁶ Njikerihenda iwainenga mri na nyama, njiwewashikia na njonyi na iwawikia mṟufu kiidi kyanu nanyo muhende iwada moo. Nyi lyondo mochiwutaho imanya ke Inyi nyi Mndumii-Ruwa.”

⁷ Kyasia ngaweonguo wuikimbi chandu njilewawaso. Nalyong'u ili mandi njiweonguo, kukachapfo maṟu herahana, na mafuo halya hakasembeliana na iwooka ilungana.

⁸ Kiheri njilehaambuya ngawona mafuo halya hamewikio mri na nyama hakaweshikio na njonyi. Kyaindi hawewode moo pfo.

⁹ Nyilyondo Mndumii-Ruwa alenjiwia, “Iyo mndu! Henda onguo handu hako ko otanu uluwie kudi, Mndumii-Ruwa nyi ahamba adi; Iyo otanu njo uwuke njora tsose tsina uifilie mbihu i iwepfie kundu iwade moo.”

¹⁰ Nalyong'u ngawewuta wuikimbi chandu njiledumo, kii kidi otanu lukaida kiidi kyayo, nayo ikawada moo, naho ikahoṟoka, po sa ling'anyi mnu.

¹¹ Kyasia Mndumii-Ruwa kanjiwia! “Iyo mndu Mafuo ho nyi Waisraeli wose. Wo nyi waihamba ke, ‘Mafuo hadu nyi hamaumu, luwodese mkusiriepfo, naso lulesia piu.’

¹² Koikyo waongoye wuikimbi ochiwawia, Mndumii-Ruwa nahamba adi: Nyo wandu wako nyi njihenda itaṟawuo shifu shanu njiwewaṟutsa muwuke shipfunyi shanu. Njiwewawihiṟa na kanyi konu kulya orukenyi lo Israeli.

¹³ Kipfa kya ikyo nyo wandu wako nyi mochiwutaho imanya ke inyi nyi Mndumii-Ruwa ili mandi njechitaṟawuo shipfu shanu na iwaṟutsa muwuka ipfo shipfunyi shanu.

¹⁴ Ambuya njikeri ihenda iwika mumuyo foko kiidi kyanu nanyo nyi mochihenda iwada moo, njiwemuwikase kulya orukenyi lonu muwenyi. Kipfa kya ikyo mochiwutaho imanya ke nyi Inyi Mndumii-Ruwa ngahamba, na nyi wudo njihenda iwuta. Nyi Inyi Mndumii-Ruwa ngahamba.”

Yuda na Israeli iwa wumangi wumu

¹⁵ Idedo lya Mndumii-Ruwa likanjichea.

¹⁶ “Iyo mndu! Ira kidi kimu uṟehie madedoha huye yake, ‘Ko Yuda na Waisraeli wa pfunganyi nao; Uweiriase kidi kingi uṟehieho madedo ha; Ko Yosefu (kiidi kya Efraimu) na Waisraeli wapfunganyi nao.’

¹⁷ Kyasiang'u wada shidisho ushiwadanyishe shiwe cha kidi kimu.

¹⁸ Kyasiang'u wana wa mayo ili wechikuwesa uwadambuye kindo ki.

¹⁹ Iyo nochiwawia kudi, Mndumii-Ruwa nyi ahamba adi: Nyi njihenda iwada kidi kya Yosefu na Waisraeli walya walunganyi nao, na inyi njihende iwawadanyisha na kidi kilya kya Yuda kundu shidisho shishiwi shiwe kidi kimu owokonyi loko.

²⁰ “Kyasia uhoṟoke oshangunyi lowo uwode shidi sho uweshiṟehie,

²¹ Uhende uwawia Inyi Mndumii-Ruwa ngahamba njidi: Nyi njihenda iwuta Waisraeli wuka mkambonyi ya wandu wawerahanyikie, njiwehenda iwasanyiasanyia wuka njora tsose njiwawihiṟe orukenyi lowo.

²² Na inyi njihenda iwahaluo wawe mkambo fumu kiidi kya mafumvu ha Israeli, nawo nyi wechihenda ichilio nyi mangi umu wose. Kyamba wechihenda iwase wa mangi tsiwipfo manya wechihenda ilekanase wawe mkambo iwi pfo.

²³ Kyamba wechiidimase ikufanyitsa na sanamu tsa maruwa hawo manya mbonyi tsilya tsawo tsiwichuṟie manya ko madeko hawo sepfo. Ambuya njikeri ihenda iwakiṟa walakiwese wandu wenjidicha, chakipfa wahenda iwa wandu wako na inyi njiwewa Ruwa owo.

²⁴ Kyamba mṟundi oko Daudi nechiwa mangi yawo; iyee wechiwada mlisi umu tupu, nawo nyi wechichumia wechiosha chile tsako na iwuta shilya sha wuwawaso woko.

²⁵ Nawo nyi wechihenda ikaa orukenyi lo waku wawo ilu njiweinengie Yakobo. Kyamba wana wawo na wachuku wawo nyi wechihenda ikaapfo mlungana.

²⁶ Kyamba njihenda iwika mkundana fo ofoṟo nawo na mkundana fu nyi fochiwa fo mlungana. Kyamba nyi njihenda iwawikia ona na njiwewafoeṟa na mba yako nyi njechiiwika ikae kiidi kyawo mlungana.

²⁷ Ambuya nyi njechikaa kiidi kyawo, njiwewa Ruwa owo nawo wawe wandu wako.

²⁸ Na mkambo ya wandu wawuteho imanya ke nyi Inyi Mndumii-Ruwa njilesanja Waisraeli wawemanyase lingi ke mba yako ikeri kiidi kyawo mlungana.”