EZEKIELI 36 - Bibilia Kui Mdedie fo Kimochi

Mndumii-Ruwa nechiwikia Israeli mboṟa

¹ “Iyo mndu! Henda ikimba mafumvu ha Israeli ochiwawia: Nyo mafumvu ha Israeli adanyienyi idedo lya Mndumii,

² Inyi Mndumii-Ruwa ngahamba njidi: ‘Kyamba wakituwa wanu nyi walemuseka, wakawekuhambiase nyo nyi masinga hawo.’

³ “Kyasiang'u, iyo Ezekieli, wuta wuikimbi ochihamba ke Inyi Mndumii-Ruwa nyi ngahamba njidi, wandu wa nyi walemuhaluo nyo ifumvu lya Israeli mbocha na imuṟinjawia njora tsose mukawa masaa ha mkambo ya wandu, mukawewa mo salucho na isutso kiidi kya wandu!

⁴ Ko ikyo nyo wandu wa Israeli, adanyienyi idedo lyako Inyi Mndumii-Ruwa: Nyo mawumbo na shitoṟomoso, mfongo na mfo, nuka ya mrapu na mṟi injisame, mukawa masinga na isalucho nyi mkambo yose iwaṟingichie.

⁵ Kii kidi njilesukio mnu, koikyo njihenda itaa kiṟache ko mkambo yo ya wandu, lya ngoseṟa nyi Edomu. Kyamba wo nyi walekuseka mrimenyi na ko wuminyi wakaweduo oruka lo luwei loko wakaluhaluo ke lowo.

⁶ Koikyo iyo mndu henda wuta wuikimbi kya oruka lu lo Israeli kochiwia mafumvuho na shitoṟomotso, hamu na meda na mapichiho ke Inyi Mndumii-Ruwa nyi ngahamba mbonyitsi kipfa kya nyashi yako, na wunyenyi woko ko oruka lu loko, kyamba ilerumo nyi mkambo ya wandu.

⁷ Kyamba Inyi Mndumii-Ruwa nyi ngahamba njidi: Ngalya nyamu ke wandu wo wa mkambo wakeri mṟasenyi na iyo nyi wechihenda irumo wo wawenyi.

⁸ “Kyaindi ko wandu wako wa Israeli nyi wechihenda ioṟa maṟamba na ikumbia ndunda ko wana wako wa Israeli. Kyamba wo nyi wahenda iwuya na kanyi kowo kiidi kya mfiri mwangu.

⁹ Kyamba inyi nyi njikeri ora lonu njechimuhalukia muwehendase idemio na iwayo mbeu.

¹⁰ Ambuya iyo Israeli njikeri ihenda iwapfumbutsa. Mṟi yo iwadese wandu na kulya kulewunduka kuwikose ko wuhya.

¹¹ Njiwehenda ipfumbutsa wandu hamu na shiuma shehende ifo. Nyo mafumvu njemuhaluo muwe handu hecha hekaa cha kuwoka. Njiwehenda iwawutia sha wucha kota kuwoka. Nlyondi nanyo mochiwutaho imanya ke inyi nyi Mndumii-Ruwa.

¹² Ambuya wandu wako wa Israeli nyi wechichumia huye yanu. Nawo nyi wechiwaikolonyia, manya mochiidimase iwatewa wapfiio nyi wana wawosepfo.

¹³ “Inyi Mndumii-Ruwa nyi ngahamba njidi: ‘Kyamba wandu wekemuwia ke nyi mokelya wandu, mukowesoka mkambo fonu wana wawo;

¹⁴ Kyasiang'u mochilyase wandupfo manya mochiidima isoka mkambo fonu wana wawosepfo. Nyi Inyi Mndumii-Ruwa ngahamba.

¹⁵ Ambuya njechilekiase mkambo ya wandu wahende ikurumasepfo, manya ikuminasepfo, manya mochiidima se itewa wandu wa mkambo fonu wahende injidekia sepfo. Nyi Inyi Mndumii-Ruwa menyi Matorito ngahamba.’”

Mkao mhya fo Waisraeli

¹⁶ Idedo lya Mndumii-Ruwa likanjichea lyechihamba:

¹⁷ “Iyo mndu! Ili mandi Waisraeli wawekeri kulya orukenyi kowo, nyi walelufanyitsa ko mchumie na mawuto hawo. Ambuya nyi njileṟinganyisha mawuto hawo cha mndu mka ili akeri kiidi kya mfiri yake.

¹⁸ Kyamba nyi njilewapusia nyashi yako kipfa kya samu iya walepusuo kulya orukenyi na kipfa kya maruwa halya ha wongo walefanyitsa naho oruka lu.

¹⁹ Njilewaṟaṟanja kiidi kya mkambo, ngawarahanyitsia kiidi kya njoruka tsingi. Ngawakapa kihianyi na mkao yawo na mawuto hawo.

²⁰ Kyamba kiheri kyo wawekeri kulya orukenyi kiidi kya mkambo ya wandu nyi walesalucha rina lyako liele, na wandu wakadeda wadi kyawo: Ambuyenyi! Wandu wa nyi walya wa Mndumii-Ruwa, kyaindi nyi kilewakoya wakure kulya orukenyi loke!

²¹ Iki nyi kilenjiinenga isumukia kipfa kya rina lyako liele, ili wanawo wa Israeli walelisalucha kiidi kya mkambo iya ya wandu walekaa kiidi kyawo.

²² “Kipfa kya ikyo, wia wana wo wa Israeli ke Inyi Mndumii-Ruwa ngahamba njidi: Kindo njikundi ihenda iwuta wulalu chi ko kiira kyanu nyo wandu wa Israeli pfo, kyaindi nyi kipfa kya wuindi wo rina lyako liele ili mulelisalucha kiidi kya mkambo iya ya wandu mulekaa kiidi kyawo.

²³ Ambuya nyi njikeri ihenda iwihiṟia wuindi woko wuele rina li lyako mlelisalucha kiidi kya mkambo ya wandu. Kipfa kya ikyo mkambo yo ya wandu wechihenda imanya ke inyi nyi Mndumii-Ruwa. Nyi Inyi Mndumii-Ruwa menyi matorito ngahamba. Kyamba kipfa njechihenda iwaloṟa kiṟumi kya rina lyako.

²⁴ Ambuya nyi njihenda iwawuta ipfo kiidi kya mkambo ya wandu, njiwewawutase ipfo njorukenyi tsose njihenu njimuwihiṟese na kunu orukenyi lonu nyo muwenyi.

²⁵ Ambuyenyi njikeri ihenda iwaletsia mṟinga sa mharami, fuhende imusanja oko lonu lose hamu na sanamu tsanu tsose.

²⁶ Kyamba nyi njihenda imwinenga ngoo njihya, njiwewika mumuyo mhya kiidi kyanu. Kyamba njihenda iwuta mrima muumu cha iho kiidi kyanu, njiwemuomoya mrima fo wuindi.

²⁷ “Cha kipfa njikeri iwaomoya mumuyo foko kiidi kyanu, njiwemwinenga pfinya yeosha wuwawaso woko na mbutie yako.

²⁸ Kii kidi nyi mochihenda ikaa orukenyi lu njiweinengie waku wanu. Nanyong'u mochiwa wandu wako, na inyi njiwe Ruwa onu.

²⁹ “Kyamba njikeri ihenda iwakiṟa na mawicho hanu hose, njilekiengeṟase njaa kiidi kyanu.

³⁰ Na wudo njechihenda iengeṟa shelya sha mademenyi kundu mulahoyose nyi njaa imwendie sonu kiidi kya mkambo ya wandu,

³¹ na ilimandi mochikumbuo mchumie yanu mmbicho na mawuto hanu mawicho, nyi mochihenda ikusuo nyo muwenyi kipfa kya mawicho ho hanu muwewutie.

³² Kyaindi manyenyi ke njilewuta kudi kipfa kyanu nyo pfo. Nyi Inyi Mndumii-Ruwa ngahamba; kyaindi wadonyi sonu na muwesumukia kipfa kya mawuto hanu, nyo wana wa Israeli.

³³ “Inyi Mndumii-Ruwa nyi ngahamba njidi: Mkonu fulya njechiwasanja njonyamaṟo tsanu tsose, nyi njechihaluose mṟi yo yanu iwadese wandu, na mṟi iya iwewundukie iwikose ko wuhya.

³⁴ Nalyo oruka luwei nuka ya msanga lochihendase iwayo mbeu, na mndu mokuidia pfo alawonese nuka iya.

³⁵ Nalyo wandu wechihamba, “Orukalu luei nuka ya msanga nyi lowa cha mdeminyi iya ya Edeni, na mṟiyo iwei wulya, iwei njisame na iwunduyo, ambuya wulalu wandu wakeripfo, iwewode na njomombo!

³⁶ Kyamba wandu wo wa mkambo waṟasanyi nanyo, nyi wechiwutaho imanya nyi Inyi Mndumii-Ruwa njilewikase ko wuhya shilya shiwenyamṟikie, ngawewaya se mbeu kiidi kya nuka ya msanga. Nyi Inyi Mndumii-Ruwa ngahamba, na nyiwudo njihenda iwuta.

³⁷ “Inyi Mndumii-Ruwa ngahamba njidi: Waisraeli wakeri ihenda injiterewa wapfumbuke cha ipo lya machondi, kipfa kya ikyo nyi njechiwafoeṟa kudo.

³⁸ Nawo wechiterewa wahende ifo cha machondi ha shidaso, yee cha mapo ha machondi mṟinyi fo Yerusalemu kiheri kya mfiri mnene yawo. Kyamba nyi wudong'u mṟi yo yanu ilawewode wandu yechihenda iichuo kituṟu kya wandu. Kikamba kido wechihenda imanya ke Inyi nyi Mndumii-Ruwa.”