EZEKIELI 35 - Bibilia Kui Mdedie fo Kimochi

Ngapo ya Ruwa ko Edomu

¹ Idedo lya Mndumii-Ruwa likanjicheya lyechihamba:

² “Iyo mndu! Halukia fumvu lya Seiri, uhende iwaikimba iwo waleepfo.

³ Wawie lewai Inyi Mndumii-Ruwa ngahamba njidi: Ambuya nyi njihenda ilimbana na iyo fumvu lya Seiri. Ambuya njihenda ikuhoṟoya owoko loko na iyo uhende iwa nuka ya msanga mkiwa.

⁴ Njikeri ihenda ifurunja mṟi yo yapfo, na iyo uhende iwa nuka ya msanga na iyo uwuteho imanya ke inyi nyi Mndumii-Ruwa.

⁵ Maheri hafoi nuwekeri mkituwa mba ya Israeli, kowetewa wakawoho nyi oshu lo wakituwa wawo kiheri kya mawukiwa hawo kiheri kya ngapo yawo ya ifurumiya.

⁶ Koikyo, nyi kya lohi njikuwia, Inyi Mndumii-Ruwa ngakulia nyamu ke opfu nyi lukuwedie manya uwode chandu ochiidima iludichapfo. Kyamba nuwode mti fo wuwahi na wudo wuwahiwo wochioshana na iyo.

⁷ Kyamba njihenda irumatsa Seiri na orio mndu oose akeripfo njechimbaha.

⁸ Ambuya ifumvu lyo njihenda iliichuṟa mnying'a ya iwo wawoho, na ipfo shifumvunyi, mapichinyi na ipfo kundu wandu wakeri nyi kochiichuopfo mnying'a ya iwo wose wechiwoho ko oshu.

⁹ Kyamba njihenda ikuhaluo nuka msanga mlungana, manya kuwode mndu echiidima ikaa ipfo mṟinyi yapfo pfo. Koikyo nyi ochiwutaho imanya ke inyi nyi Mndumii-Ruwa.

¹⁰ “Kyamba iyo nyi ulehamba ke njoruka tsi tsitsiwi Yuda na Israeli nyi tsapfo kowetsiduo, ma chando tsiwei nyi tsa Mndumii-Ruwa.

¹¹ Koikyo Inyi Mndumii-Ruwa njikuliya nyamu ke njihenda ikuwutia sumuhana na nyashi yapfo na wunyenyi wopfo, sumuhana na nyashi yapfo kowo. Njekukapa nochiwuta ho imanya ke inyi nyi u.

¹² Ambuya nochiwutaho imanya ke Inyi Mndumii-Ruwa nyi njileicho shirumo shapfo uleruma nasho Israeli, ochihamba orukalu lo Israeli nyi lulehalutso nuka ya msanga ambuya nyi luleinengo kundu luluchilie.

¹³ Ngawekuichose chandu uikudosa dosa kochideda madedo hafoi henjisalucha.

¹⁴ Ambuya iyo Edomu, ili mandi njechikuhaluo nuka ya msanga wuyana nyi wochikeseka,

¹⁵ Kyamba nyi wudo iyo ulewuta lilya mandi Waisraeli weleolotso. Ambuya nukeri ihenda iwa nuka iyo fumvu lya Seiri, handu hamu na oruka ya msanga lose lo Edomu. Kii kidi wandu wawuteho imanya ke Inyi nyi Mndumii-Ruwa.”