EZEKIELI 34 - Bibilia Kui Mdedie fo Kimochi

Walisi wa Israeli

¹ Idedo lya Mndumii-Ruwa likanjichea lyechihamba:

² “Iyo mndu! Deda wuikimbi ko walisi wo wa Waisraeli ochiwawia kudi: Mndumii-Ruwa nahamba adi kyanu; Ochia nyi lonu walisi wa Israeli; mokekuihutsa muwenyi tupu! Angesa, muichi ke walisi nyi kiwawaṟi iihutsa machondi?

³ Ambuya nyo nyi mokenyo maruwa, mukawekuṟaya nguo tsa mamberi hatso, mukawekushinjia machondi halya manoru mukalya. Kyaindi mokelisa machondi ho pfo.

⁴ Ambuya machondi halya mafafa mulehaambuyapfo, manya halya haweluo mulehaṟundiapfo, na halya hawei na shifaṟe mulehawikia mdipfo, halya haweṟahaṟaha mulehawihiṟapfo, manya halya hawedekie mulehapfulapfo. Kyaindi nyi mulewahoṟokia ko pfinya na wulang'a

⁵ Kipfa kya ili machondiho halewuṟa mlisi nyi halerahanyika hakahenda iwa kelya kya mando ha ngeṟenyi.

⁶ Ee, machondi hako nyi halerahanyitso, hakawekuṟahiaṟahia mafumvunyi na kundu kukuirie. Machondi hako nyi halerahanyitso wuyanenyi kose, kulakaepfo mndu alekusaṟa kyaho manya ihapfula.

⁷ “Kyasiang'u, nyo walisi adanyienyi necha idedo lyako Inyi Mndumii-Ruwa:

⁸ Kyamba Inyi Mndumii-Ruwa ai na moo, ngamulia nyamu ke nyi ngalehela ko iwona machondi hako chando halewa shelya sha mando ha ngeṟenyi, kyamba halewuṟa mlisi, kyamba walisi wako walekunda ilisa machondi hakopfo, wakawekulisiṟa wawenyi walalise machondi hako.

⁹ Kipfa kya ikyo nyo walisi adanyienyi idedo lyako Inyi Mndumii-Ruwa.

¹⁰ Inyi Mndumii-Ruwa ngahamba njidi, njihenda ilimbana nanyo walisi, njiwemusoka iṟunda li lyelisa machondi hako, mochikaa mulise se machondi hakopfo, manya mochiwonase meke fo kulisiṟa muwenyipfo; Kyamba njikeri iashuo machondi hako njayonyi tsanu, kundu walawese kelya kyanu.”

Mlisi mcha

¹¹ “Kyamba Inyi Mndumii-Ruwa ngahamba njidi: Inyi njimonyi njihenda ipfula machondi hako na ihalisa.

¹² Ambuya, chando mlisi ekepfula machondi hake harahanyikie, nyi na wudo njechipfula machondi hako ipfo kundu hawerahanyikie kiidi kya mtiima na meema fung'anyi.

¹³ Njihenda iwaashuo ipfo mawokonyi ha mkambo ya wandu. Njiwehenda iwasanyia wawuka njorukenyi tsa kuleshe njiwewawihiṟa na orukenyi lowo wawenyi. Njiwehenda iwalisa huye ya mafumvu ha Israeli, wambaṟa ya meda na kiidi kya oruka luwode wandu.

¹⁴ Njihenda iwalisa maṟa mecha mafumvunyi ha Israeli hando kuwode shelya shaho. Nawo wechihenda isiaho moo oo kundu kuwode mapata mecha ha maṟa wawekuihutsio ipfo mafumvunyi ha Israeli.

¹⁵ Kyamba inyi njimonyi njihenda iwa mlisi o machondi hako; inyi njimonyi njihenda iwainenga onyonyia. Nyi wudo Inyi Mndumii-Ruwa ngahamba.

¹⁶ Kii kidi machondiho hawedekie njechihenda ihapfula, na halya hakeri kiṟahioṟahionyi njechihawihiṟa na kanyi. Nyi wudo na halya hawode shifaṟe njechihawikia mdi, na halya hai mafari njechihainenga pfinya, kyaindi, machondiho manoru, hawode pfinya njechiharumatsa. Kii kidi njechihenda ilisa machondi hako chandu kiwaṟi.

¹⁷ “Kya nunyo mukeri ipo lyako, Inyi Mndumii-Ruwa ngahamba njidi: Njechihenda ianduya ichondi na ichondi, na wudo njiweanduo kya machondi ha kisoṟo na shioṟo.

¹⁸ Kyamba kiidi kyanu mokelya shelya shicha, mukaweteṟateṟa shilya shatsuhaa, mukawekunyoya mṟinga mharami na fulya fotsuhaa mukefufohafoha na madende hanu.

¹⁹ Ale ngesa, machondi ha hako hengi hahendeilya shelya shilya shii shiteṟeteṟe ang'u inyo mṟingafu fumfohe.

²⁰ “Koikyo, Inyi Mndumii-Ruwa ngamuwia njidi: Nyi njechihenda ianduya kiidi kya machondi manoru na halya hai mafafa.

²¹ Kyamba nyo nyi mokepeṟehetsa ko mbari tsanu na makombe hanu mukewewakapa mtsindo machondi halya hai mafafa itane mowafunyia nja ya ipo.

²² Ambuya njihenda iashuo ipo lyako, walakiwese shelya sha watuuri. Njechihenda ianduya ichondi na ichondi lingi.

²³ Ambuya njikeri iwawikia mlisi umu huye yawo, mangi ai cha mṟundi oko Dawidi. Ichu nyi echiwalisa, nawewa mlisi owo.

²⁴ Inyi Mndumii-Ruwa nyi njechiwa Ruwa owo, na mṟundi oko Dawidi nechiwa mnene owo. Ambuya nyi wudo Inyi Mndumii-Ruwa ngahamba.

²⁵ Nyi wudo njechihenda iwikiana nawo mkundano fo ofoṟo. Njiwefuna mando malang'a ha ngeṟenyi orukenyi kundu machondi hako hakukae na ofoṟo mapatenyi hechikulaya ipfo ngeṟenyi.

²⁶ “Nawo nyi wechikukaya wambaṟa na ifumvu lyako liele na inyi njiwewawikia ona. Njiwewaendie mvuo kiheri kyayo, na mvuoyo iwewaendie mboṟa.

²⁷ Mashidi ha mdemehu nyi hechiwika ndunda, na mademaho hawewuta ndunda tsifoi, nawo nyi wechikukaya na ofoṟo orukenyi lowo. Kiherikyo njechiwaashuo mshenyi ya wusinga na iwaashuo mawokonyi ha iwo walewahaluo masinga, nyilyondi wechihenda imanya ke Inyi nyi Mndumii-Ruwa.

²⁸ Kyamba kuwodese mkambo ya wandu wechihenda iwatengetiapfo. Manya mando ha ngeṟenyi hechiidimase iwawaha na iwalyapfo. Kii kidi nyi wechihenda ikaa na ofoṟo kulawodese kindo kechiwaowesha.

²⁹ Kyamba njihenda iwainenga madema mecha kundu walahende iwadose njaa kiidi kya orukalo, manya isaluchose nyi wandu wa mkambo ya wandu.

³⁰ Nyi hondo wechiwutaho imanya ke Inyi nyi Mndumii-Ruwa, Ruwa owo, ambuya njikeri hamu nawo, na mba yo ya Israeli nyi wandu wako. Nyi Inyi Mndumii-Ruwa ngahamba.

³¹ “Nyo nyi ipo lya machondi hako, nyo nyi wandu wako, na inyi ni Ruwa onu. Nyi Inyi Mndumii-Ruwa Menyi Matorito ngahamba njido.”