EZEKIELI 33 - Bibilia Kui Mdedie fo Kimochi

Ezekieli nechiwa mringi

¹ Idedo lya Mndumii-Ruwa likanjichea lyechihamba:

² “Iyo mndu! Deda na wana wa mayo nowawie kudi, kokoya ngaende shida orukenyi luliwe, na wandu wa oruka lo wakasambuṟa umu owo nawe mringi owo,

³ nao mringicho kawona watuuri waicha, kakapa iranda lyekekedia wandu,

⁴ kokoya mndu aicho irandalyo lyekekedia alasaṟe, watuuri wakacha kawoho, opfu loke nakuendie amonyi.

⁵ Kyamba nyi aleicho ṟu lya iranda lyo nao kamina, koikyo nyio amonyi akuendie opfu lo loke. Kyamba kokoya nyi aleadanyia kikekedio kyo kya iranda nyi awechikiṟa moo foke amonyi.

⁶ “Kyaindi kokoya mringi ulya echiwona mkituwa kecha nao alakape ombe lo lokekedia wandu kipfa kya watuuri wakeri icha, nahong'u watuuri wakacha wakawaha mndu oose kiidi kyawo, mndu cho awoho nyi ideko lya mringi cho. Ambuya njechiwuwuya opfu lo mnducho ko mringi cho.

⁷ “Ambuya iyo mndu nyi ngakusambuṟa iyo uwe mringi o mba ya Israeli, kiheri kyo ochiicho idedo liwukie koko nyi ochiwawia.

⁸ Ili mandi njechiwia mndu mnyamaṟi nechipfa kipfa kya wunyamaṟi woke, na iyo ulakunde immbia kundu nalekane na wunyamaṟi wo woke, ambuya mndu cho nechipfa kya wunyamaṟi wo woke, kyaindi umanye ke nyi njechiwuwuya samu ya mnduchu ipfo mawokonyi hapfo.

⁹ Kyaindi kokoya nomwikimba ke nade wunyamaṟi wo woke, nao alakunde ialacha mkao fo foke mbicho, oo nechihenda ipfa kya wunyamaṟi woke; kya indi iyo nyi ochikiṟa mrima fopfo.”

Orio mndu nechikapo kipfa kya wunyamaṟi woke

¹⁰ “Iyo mndu! Deda na mba yo ya Israeli nowawie idedo li: “Nyo nyi mokehamba ambuya nyi lui warohie madeko na wunyamaṟi wodu, kyamba so nyi lofoyo kipfa kya madeko ho hadu, nyi wuda lochiwika kundu luidime ikaase na moo?

¹¹ Kipfa kya ikyo nyi ochiwawia kudi, so Mndumii-Ruwa ai na moo njekeseka ili mandi mndu apfa kipfa kya wunyamaṟi wokepfo, kyaindi kindo kinjichihiṟie nyi mndu cho ai mnyamaṟi nalekane na wunyamaṟi na mkao foke mmbicho kundu naidime ikaa na moo. Dumbuyenyi, wukanenyi na mawuto hanu mawicho nyo Waisraeli. Nki ili mukundi ipfa?

¹² “Iyo mndu! Henda wia wana wa mayo kudi; mndu o wusumuhanyi kawuta wunyamaṟi wusumuhanyiwo woke wochiidima imkiṟapfo. Kyaindi kokoya mndu mnyamaṟi, ahenda ida wunyamaṟi woke echiwona ngapopfo. Nyi wudong'u mndu o wusumuhanyi kawoka iwuta wunyamaṟi wusumuhanyi wulya woke wochiidima imwashuopfo.

¹³ Ambuya inyi njiwika kyasa ke mndu o wusumuhanyi nechikaa na moo, kyaindi kokoya akusiria wusumuhanyi wo woke kawookase iwuta wunyamaṟi, ambuya mawuto halya hake mecha awewutie kuwoka nyi hechihenda ihadimo; nao napfe kiidi kya wunyamaṟi wo woke.

¹⁴ Kyaindi, kokoya ngawia mndu mnyamaṟi nechipfa kipfa kya wunyamaṟi woke, indi kokoya ahenda indumbuya nalakiwutese wunyamaṟi kawuta sha wusumuhanyi, echipfasepfo;

¹⁵ Kokoya mndu chu mnyamaṟi awoka iwihiṟa shilya amwakuye, kawewihiṟase na shilya aiwie, nao kaweoshase wuwawaso wo wusumuhanyi alakiwutese wunyamaṟi mndu chu nyi echikaa na moo, echipfa sepfo.

¹⁶ Kyamba njonyamaṟo tsilya awewutie oo mboko nyi tsechihadimo cha kipfa nawuta mawuto mecha na ha wusumuhanyi koikyo nyi echikaa na moo.

¹⁷ “Ambuya wana wa mayo nyi wechihamba, ‘Mndumii-Ruwa awuta kya wasumhanyipfo!’ Kyaindi kii lohi wo nyiwo walawuta kilasumuhanyi.

¹⁸ Kyamba mndu ekewuta sha wusumuhanyi, kawoka iwuta wunyamaṟi, nyi echihenda ipfa kipfa kya wunyamaṟi wo woke.

¹⁹ Kokoya mndu mnyamaṟi ahaluka kada mawuto ha wunyamaṟi kawuta mawuto mecha ha wusumuhanyi, ichu nyi echikaa na moo kipfa kya mawuto ho hake hai mecha.

²⁰ Kyaindi nyo mukeri ihamba mbutie fo Mndumii fuwode wuhoṟotsupfo, ambuyenyi nyo mba ya Israeli, njechihenda iwaanduya nyo orio mndu kui mawuto hake.”

Mṟi fo Yerusalemu fowado

²¹ Kiheri kuweshikie mkonu fo katanu fo meri fo ikumi, maka fo ikumi na kawi wokia losamiṟo, mndu umu aledicha kulya Yerusalemu kanjichea kanjiwia, “Mṟi fo Yerusalemu nyi fowado nyi watuuri.”

²² Kiheri kya kyukanyi iamkia mkonu fu, mndu chu awedichie alecha, pfinya ya Mndumii-Ruwa ilenjisokia, koikyo icha lya mndu chu likanjitaṟawuo, dumbu lyako likaidimase ideda.

Madeko ha wandu

²³ Idedo lya Mndumii-Ruwa likanjichea lyechihamba:

²⁴ “Ambuya wandu walya waletsuhaa kulya mṟinyi ya Israeli ilekapo wakeri ihamba, ‘Abrahamu nyi awei amonyi, nao kaweoṟa orukalu, kya indi so nyi lui wafoi koikyo nyi luiwainenge oruka lu luwe kyoṟa kyadu.’

²⁵ Kyaindi wawie kudi, Mndumii-Ruwa nahamba adi ngesa nyo chi muilya nyama na samu yayo, mukowedasia maruwa hengi na iwaha! Nyi wuda oruka lu lochiidima iwa kyoṟa kyanu?

²⁶ Kyamba nyo nyi mukusirie shisha shanu, mukawewuta mawuto hawichuṟie, na orio msoṟo kiidi kyanu nyi aichumia na mka o monomaye! “Nyi mokusaṟa ke mochiinengo oruka lu luhende iwa kyoṟa kyanu?

²⁷ Henda wia wandu wo ke Inyi Mndumii-Ruwa njii na moo, nyi ngawalia nyamu ke iwo waletsuhaa ipfo mamṟinyi hanyamaṟikie nyi wechipfa kui oshu, na walya okoya wakeri nja nyi wechilio nyi mando ha ngeṟenyi, na iwo okoya waowie mbakonyi na iṟingichio nyi njomombo nyi wechewoho kui ndaṟe njiwicho.

²⁸ Kii kidi njikeri ihenda ihaluo oruka lo luwe nuka na mrapu. Mbahanyi tso tsake tsekekuichilia nyi wechiwoho wose. Ngoseṟa mafumvu ho ha Israeli nyi njechihaterefuo hawe nuka ioweshie manya kulawode mndu echikaria iida napfo.

²⁹ Kiherikyo njechihaluo oruka lo lowo luwe nuka ya msanga kipfa kya njonyamaṟo tsawo walewuta, nyi lyo mandi wechiwutaho imanya ke Inyi nyi Mndumii-Ruwa.”

Ndunda tsa mwongoye fo mwikimbi

³⁰ Mndumii-Ruwa kanjiwia, “Iyo mndu! Wana wa mayo wekekudeda ili wadamie hafui na mongo yawo wechihamba, kenndenyi luhende iadanyia idedo liwukie ko Mndumii-Ruwa.

³¹ Ambuyang'u wakeri icha oshangunyi lopfo makamba kui makamba cha wandu wako, wakawekuadanyia kilya ukeri iwaongoya, kyaindi wekewuta kilya owawia wawutepfo. Ambuya nyi wekehamba ke nyi wawode ikunda kyaindi nyi wakeri ipfula shilya shechiwainenga kiira kyawo tupu.

³² Iyo kowo nyi ulewa cha mndu awaimbia shiimbo sha mahaba , uwewode ṟu licha na kinanda kicha, kyamba iadanyia nyi waiadanyia kilya ukeri iwaongoya, kyaindi wekewuta chando waiongoyopfo.

³³ Kyamba ili mandi isho shose ukeri ionguo shechihoya naate shihoye, nyi lyo mandi wechimanya ke nyi kuwewode mwikimbi kiidi kyawo.”